|
İyunun 13-də Azərbaycan Respublikasının Prezidenti
yanında Dövlət İdarəçilik Akademiyasında 15 iyun - Milli
Qurtuluş Günü münasibətilə tədbir keçirilmişdir.
AzərTAc xəbər verir ki, tədbir iştirakçıları əvvəlcə
ümummilli lider Heydər Əliyevin akademiyadakı büstü
önünə gül dəstələri qoymuş, xatirəsini ehtiramla yad
etmişlər.
Dövlət İdarəçilik Akademiyasının rektoru, akademik Urxan
Ələkbərov Milli Qurtuluş Gününün tarixi əhəmiyyətindən,
müstəqil dövlətimizin qurulmasında və möhkəmlənməsində
ümummilli lider Heydər Əliyevin misilsiz xidmətlərindən
və ulu öndərin hakimiyyəti illərində əldə olunmuş
nailiyyətlərdən söhbət açmışdır. Bildirmişdir ki, 1993-cü
ildə - ölkəmizdə xaos və anarxiyanın hökm sürdüyü
günlərdə Heydər Əliyevin xalqın təkidli çağırışı ilə
yenidən hakimiyyətə qayıdışı nəticəsində ictimai-siyasi
sabitlik bərpa olunmuş, vətəndaş müharibəsinin qarşısı
alınmışdır.
Rektor ulu öndərin layiqli varisi Prezident İlham
Əliyevin yeni inkişaf strategiyasından və onun
bəhrələrindən danışmış, qazanılan uğurlar sayəsində
ölkəmizin iqtisadi potensialının və nüfuzunun daha da
artdığını qeyd etmişdir. Vurğulanmışdır ki, dövlətimizin
başçısının "qara qızılı insan kapitalına çevirmək"
siyasəti həyatda öz təsdiqini tapır, Azərbaycan
təhsilinə və elminə dəyərli töhfələr verir.
Tədbirdə Milli Məclisin deputatları Aydın Mirzəzadə,
Qənirə Paşayeva və "Yeni Azərbaycan" qəzetinin baş
redaktoru Hikmət Babaoğlu çıxış edərək 1993-cü ildə
Azərbaycanın böyük təhlükələrlə üz-üzə qaldığını,
vətəndaş müharibəsinin astanasında dayandığını
xatırlatmışlar. Bildirilmişdir ki, dahi şəxsiyyət və
böyük dövlət xadimi Heydər Əliyevin həmin həyəcanlı iyun
günlərində yenidən hakimiyyət sükanı arxasına keçməsi
Azərbaycanı parçalanmaq və məhv olmaq təhlükəsindən
xilas etmişdir. Qısa müddətdə ölkədə siyasi-iqtisadı
sabitlik yaratmağa nail olan ulu öndər dövlətimizin və
millətimizin qurtuluşuna imza atmışdır.
Qeyd edilmişdir ki, ən yeni tariximizin ən mühüm
hadisələrindən birinin - ümummilli lider Heydər Əliyevin
Azərbaycan Ali Sovetinin sədri seçilməsinin 20 ili tamam
olur. Milli Qurtuluş Günü adı almış həmin hadisə
yaddaşlara əbədi həkk olunmuşdur.
Tədbirdə çıxış edənlər vurğulamışlar ki, Azərbaycanın
xilaskarı, milli dövlətimizin memarı və qurucusu kimi bu
fenomen şəxsiyyətin adı tarixə qızıl hərflərlə
yazılmışdır. Ulu öndərin "Mən həmişə fəxr etmişəm, bu
gün də fəxr edirəm ki, mən azərbaycanlıyam" kəlamı hər
bir soydaşımızın qəlbində əks-səda verir, hamımızı
birliyə və həmrəyliyə səsləyir. |
