Naxçıvan
Özəl Universitetində 15 iyun - Milli Qurtuluş Günü
münasibətilə "Ulu öndər Heydər Əliyevin xilaskarlıq
missiyası" mövzusunda "Heydər Əliyev" lektoriyası
keçirilmişdir.
Lektoriyanı giriş sözü ilə universitetin tədris və elmi
işlər üzrə prorektoru, tarix üzrə fəlsəfə doktoru,
dosent İbrahim Kazımbəyli açaraq bildirmişdir ki, Milli
Qurtuluş Günü xalqımızın həyatında ən mühüm mərhələnin
başlanğıcıdır. Ümummilli liderimiz Heydər Əliyevin
1993-cü ilin iyununda yenidən hakimiyyətə qayıtması ilə
ölkəmizin iqtisadi, siyasi, mədəni həyatında mühüm və
gələcəyə yönəlmiş əhəmiyyətli addımlar atılmışdır.
Lektoriyada "Milli Qurtuluş Günü Azərbaycan milli
dövlətçiliyinin xilas günüdür" mövzusunda məruzə ilə
çıxış edən tarix üzrə fəlsəfə doktoru, dosent Elçin
Zamanov bildirmişdir ki, ulu öndər Heydər Əliyevin
Azərbaycanda yenidən siyasi hakimiyyətə qayıdışından
sonra ölkəmizdə anarxiyanın, hərc-mərcliyin qarşısı
alınmış, xalqımız düşdüyü bəlalardan xilas olmuşdur.
Xalqımızın dahi oğlu qısa müddətdə ölkədə baş verən
vətəndaş qarşıdurmasını aradan qaldırmış, cəmiyyət
həyatının bütün sahələrini əhatə edən uğurlu
islahatların həyata keçirilməsini təmin etmişdir.
Natiq çıxışında onu da vurğulamışdır ki, zamanı
tarixləşdirən, əbədiləşdirən qüdrətli və müdrik
şəxsiyyətlərdir. Tarix əbədiliyi, zaman keşməkeşliyi,
bəşəriyyət isə azad və firavan həyatı üçün belə
insanlara, şəxsiyyətlərə borcludur. Biz ulu öndərə ona
görə borcluyuq ki, dahi şəxsiyyət öz tarixi qayıdışı ilə
müstəqilliyimizi, bütövlükdə Azərbaycanımızı xilas
etmişdir.
Vurğulanmışdır ki, ötən müddət ərzində respublikamız
böyük inkişaf yolu keçmiş, ulu öndərin siyasi kursunu
uğurla davam etdirən Prezident İlham Əliyevin səyi
nəticəsində Azərbaycan yeni inkişaf mərhələsinə qədəm
qoymuşdur. Bu inkişafın bəhrələrini muxtar
respublikamızda hər bir sahədə görmək mümkündür.
Ümummilli liderin müəyyən etdiyi inkişaf və tərəqqi
strategiyası, ulu öndərin ideyalarına sədaqət bu qədim
diyarın tanınmaz dərəcədə dəyişməsinə səbəb olmuşdur.
Lektoriyaya İbrahim Kazımbəyli yekun vurmuşdur.
Nuray ƏSGƏROVA,
Naxçıvan Özəl Universitetinin Mətbuat xidmətinin rəhbəri
|