15 iyun - Milli Qurtuluş Günü ilə əlaqədar ölkənin bütün
müəssisələrində olduğu kimi, Astara Pedaqoji Kollecində
də silsilə tədbirlər keçirilir. Kollecdə Qurtuluş
Gününün yüksək səviyyədə qeyd edilməsi üçün təşkilat
komitəsi yaradılmış və tədbirlər planı təsdiq
edilmişdir. Tələbələr arasında inşa və rəsm müsabiqələri
keçirilmişdir.
Musiqi ixtisası üzrə təhsil alan tələbələrin iştirakı
ilə bayram konserti təşkil edilmişdir. Kollecin fiziki
tərbiyə müəllimliyi və bədən tərbiyəsi və idman
ixtisasları üzrə təhsil alan tələbələr arasında futbol
və voleybol yarışları keçirilmiş, qaliblər
müəyyənləşmişdir.
Tədris korpusunun birinci mərtəbəsindəki foyedə 20 il
əvvəl baş vermiş tarixi hadisələrin xronikasını əks
etdirən fotoguşə və stendlər yaradılmışdır. Tədbirlər
planına əsasən tədris qruplarında 11-14 iyun
tarixlərində ilk dərslər Qurtuluş Gününə həsr
edilmişdir.
Qurtuluş Günü ərəfəsində Astara Pedaqoji Kollecinin
Tələbə Gənclər Təşkilatının üzvləri və müəllimlərdən bir
qrupu Osman Mirzəyev adına Lənkəran şəhər Qarışıq tipli
Uşaq Evində "Biz onlara təbəssüm bəxş etmək istəyirik"
adlı xeyriyyə aksiyası keçirmişlər. Uşaq Evinin
direktoru Ofeliya Qafarova gələn qonaqları salamlamış,
öz təşəkkürünü bildirmişdir. Sonra tələbə və müəllimlər
tərəfindən gətirilən hədiyyələr (paltarlar, oyuncaqlar,
yeyinti məhsulları) uşaqlara təqdim olunmuşdur. Tədbirdə
50 nəfər uşaq (1 yaşından 21 yaşa qədər) iştirak
etmişdir. Kollecin istedadlı tələbələri konsert proqramı
ilə uşaqlar qarşısında çıxış etmişlər.
Silsilə tədbirlərin davamı olaraq iyunun 12-də kollecin
akt zalında "Heydər Əliyev müstəqil Azərbaycan
Respublikasının xilaskarıdır" mövzusunda konfrans
keçirilmişdir.
Konfransı giriş sözü ilə kollecin direktoru,
respublikanın əməkdar müəllimi Əlihəsən Həmzəyev açaraq
qeyd etmişdir ki, 15 iyun 1993-cü il Azərbaycanın
müstəqillik tarixində xüsusi yer tutur. Həmin günlərdə
xalqımız dövlətçiliyini, müstəqilliyini itirmək
təhlükəsi ilə üzbəüz qalmışdı. Belə bir məqamda xalqımız
Heydər Əliyevə üz tutdu. Xalq öz böyük oğlunu,
Azərbaycanı canından daha çox sevdiyini dəfələrlə sübut
edən Heydər Əliyevi təkidlə çağırdı və bütün ümidlərini
ona bağladı. "Heydər baba, xalqı bu bəladan qurtar"
sözləri yazılmış plakatlar xalqın öz oğluna və liderinə
bəslədiyi böyük inamdan xəbər verirdi. Xalq onu 2 dəfə
yekdilliklə Prezident seçdi. O xalqla əl-ələ verərək
Azərbaycanda demokratik, hüquqi, ümumbəşəri dövlət
qurmaq, millətin azadlığını və müstəqilliyini daha da
dönməz etmək məqsədilə çox iş gördü.
Əlihəsən Həmzəyev həmin dövrdə baş verən hadisələrin
fəal iştirakçısı kimi qeyd etdi ki, ulu öndər Heydər
Əliyevin hakimiyyətə qayıdışı tarixi zərurət idi. Onun
uzaqgörən, müdrik siyasətinin nəticəsi olaraq Azərbaycan
Respublikası azad, suveren dövlət quruculuğunda inamlı,
qətiyyətli addımlar atdı. Natiq xüsusilə vurğuladı ki,
Heydər Əliyev xalqı milli fəlakətdən, qardaş qırğınından
kənarlaşdırmağa nail oldu və böyük bəladan insanları
xilas etdi. Ölkədə elə bir demokratik siyasi sistem
təşəkkül tapıb ki, burada istənilən problemin konkret
həlli mexanizmi mövcuddur. Bu sistem 15 oktyabr 2003-cü
il prezident seçkisindən sonra daha da möhkəmləndi.
Xalqımız ulu öndər Heydər Əliyevin dövlətçilik
varisliyini təmin etmək üçün öz qəti və prinsipial
mövqeyini ortaya qoydu. Ümummilli liderimizin siyasi
varisi ölkə Prezidenti cənab İlham Əliyevin Azərbaycan
və dünya siyasətində bütün siyasi qüvvələrin
hesablaşmalı olduğu siyasi liderə çevrilməsi də bu
obyektiv proseslərin məntiqi sonluğudur. Onun siyasi və
dövlətçilik fəaliyyəti, istər daxili, istərsə də xarici
siyasət məsələləri ilə bağlı hadisələrə münasibəti
məntiqi ardıcıllıqla bir-birini tamamlayır.
Sonra kollecin tarix müəllimi Amal Rzayev "Heydər Əliyev
müstəqil Azərbaycan Respublikasının xilaskarıdır"
mövzusunda məruzə etdi. Məruzədən sonra "Əbədiyyətə
gedən yol" videoçarxına baxış oldu.
Azərbaycan Müəllimlər İnstitutunun əməkdaşı, fəlsəfə
doktoru Şahrza Ağayev, Lənkəran Dövlət Universitetinin
dosenti, fizika-riyaziyyat üzrə fəlsəfə doktoru Mirnamiq
Bəşirov, kollecin müəllimlərindən Nuranə Fərəcova,
Möhübbət Eyvazov, Aygün Abbasova, Arzu Hüseynova,
tələbələrdən Abbas İbrahimli, Gülnar Mirzəyeva və Rufanə
Rəsulova çıxış edərək ümummilli lider Heydər Əliyevin
qurtuluşa gedən yolda və hakimiyyətə qayıtdıqdan sonra
Vətənimizin müstəqilliyi, azadlığı uğrunda, beynəlxalq
aləmdə dövlətimizin böyük nüfuz qazanmasında, iqtisadi
cəhətdən inkişaf istiqamətində titanik fəaliyyətindən,
gənclərə göstərdiyi misilsiz qayğıdan ətraflı söhbət
açmış, tələbə-gənclərin onun yaratdığı müstəqil
Azərbaycanı göz bəbəyi kimi qoruyacaqlarını qeyd
etmişlər.
Çıxış edənlər bu il keçiriləcək prezident seçkisində
ölkə Prezidenti cənab İlham Əliyevi dəstəkləyəcəklərinə
söz vermişlər.
Kollecin direktoru Əlihəsən Həmzəyev konfransı
yekunlaşdıraraq demişdir ki, 1993-cü ilin 15 iyun günü
milli varlığımızın təvəllüd günüdür. Zaman keçdikcə,
müstəqilliyimiz möhkəmlənib, dövlətimiz inkişaf etdikcə
Qurtuluş Gününün mənası və dəyəri də artır. 20 il əvvəl
öz nicatını tapan, müstəqilliyini və dövlətçiliyini
itirmək təhlükəsindən qurtulan xalqımız bu gün hörmətli
Prezident cənab İlham Əliyevin rəhbərliyi altında hüquqi
dövlət quruculuğu yolunda inamla irəliləyir.
Sonda musiqi ixtisası üzrə təhsil alan tələbələrin
iştirakı ilə bayram konserti olmuşdur.
Azad ABDULLAYEV |