İyunun
11-də Dövlət Sərhəd Xidmətinin (DSX) Mərdəkan
qəsəbəsindəki xüsusi məktəbində "Sərhəd" hərbi-idman
oyunlarının yekunlarına həsr olunmuş təntənəli mərasim
keçirilmişdir. Mərasimdə DSX-nin, Təhsil, Gənclər və
İdman nazirliklərinin nümayəndələri, KİV təmsilçiləri və
digər qonaqlar iştirak etmişlər. Əvvəlcə Azərbaycanın
Dövlət himni səsləndirilmişdir.
Tədbirdə Dövlət Sərhəd Xidməti rəisinin müavini,
general-mayor İsmayıl Əkbərov, gənclər və idman
nazirinin müavini İntiqam Babayev və Təhsil Nazirliyinin
şöbə müdiri Ağababa İbrahimov çıxış edərək "Sərhəd"
hərbi-idman oyunlarının məqsədi, əhəmiyyətindən, bu
oyunun gənclərin hərbi-vətənpərvərlik ruhunda
tərbiyəsindəki mühüm rolundan danışmış, qalibləri təbrik
etmişlər. Bildirilmişdir ki, Dövlət Sərhəd Xidməti
gənclərin Vətənimizə, tariximizə, mənəvi dəyərlərimizə
hörmət ruhunda tərbiyə olunması, onlarda sərhədə və
sərhədçi peşəsinə marağın artırılması istiqamətində
mühüm tədbirlər həyata keçirir. Ölkəmizin sərhədyanı
rayonlarının məktəbliləri arasında keçirilən "Sərhəd"
hərbi-idman oyunları həmin tədbirlərdən biridir.
"Sərhəd" hərbi-idman oyunları artıq 10-cu ildir ki,
Dövlət Sərhəd Xidmətinin, Təhsil, Gənclər və İdman
nazirliklərinin birgə qərarı əsasında təşkil olunur.
Qeyd olunmuşdur ki, "Sərhəd" hərbi-idman oyununun final
mərhələsi iyunun 3-dən 11-dək DSX-nin Mərdəkan
qəsəbəsindəki xüsusi məktəbində keçirilmişdir.
Bildirilmişdir ki, Dövlət Sərhəd Xidmətinin, Təhsil,
Gənclər və İdman nazirliklərinin birgə qərarı əsasında
Azərbaycan Sərhəd Mühafizəsinin 94-cü ildönümü
ərəfəsində üç mərhələdən ibarət olan "Sərhəd"
hərbi-idman oyunları təşkil olunmuşdur. Oyun
iştirakçıları üçün yaradılmış şərait məktəblilərə bütün
mərhələlərdə öz bacarıqlarını tam və sərbəst nümayiş
etdirməyə imkan vermişdir. Ordubad rayon
internat-məktəbin "Gəmiqaya", Füzuli rayonundakı Mahir
Səfərov adına Horadiz şəhər 1 nömrəli tam orta məktəbin
"Ərgünəş", Cəlilabad rayonunun Ləkin kənd tam orta
məktəbinin "Ləkin", Lənkəran rayonunun Haftoni qəsəbəsi
tam orta məktəbinin "Sərhədçi", Qusar rayonunun Yuxarı
Kalanxur kənd tam orta məktəbinin "Samur", Oğuz
rayonunun Bucaq kənd tam orta məktəbinin "Sərhədçi", Qax
rayonunun Almalı kənd tam orta məktəbinin "Kürmük",
Ağstafa rayonunun Böyük Kəsik kənd tam orta məktəbinin
"Sərhədçi" komandaları final turuna vəsiqə qazanmışlar.
Yarışların ümumi nəticələri göstərir ki, məktəbli
gənclərimizin qələbə qazanmaq əzmi, hərbi intizama
alışmağa göstərdikləri cəhd, sərhədçi peşəsinin
incəlikləri ilə maraqlanmaq, sərhəd mühafizəsi işinin
təşkili ilə tanış olmaq istəkləri yüksəkdir. Final
oyunlarının birinci mərhələsində respublikamızın 28
sərhədyanı rayonundan 125 məktəbin 625 şagirdi iştirak
etmiş, ikinci mərhələyə 26 məktəbin 130 şagirdi
qatılmışdır. Səkkiz zonada keçirilən yarışların
qalibləri final mərhələsində iştirak etmişlər.
Final turunda komandalar "Sıra hazırlığı", "Sərhəd
naryadı tərəfindən nəqliyyat vasitələrinə baxışın
təşkili", "Avtomatın sökülməsi və yığılması", "Sərhəd
pozucusunun yaxalanması və onun təxliyəsi", "Tüfəngdən
hədəfə atəş açmaq", "Maskalanma", "Yaralanmış sərhəd
naryadı üzvünə ilkin tibbi yardımın göstərilməsi və onun
təxliyəsi" və "Ləpirçilik" mərhələlərində öz
bacarıqlarını nümayiş etdirmişlər.
Oyun zamanı toplanan ümumi balların miqdarına görə
Ağstafa rayonunun Böyük Kəsik kənd tam orta məktəbinin
"Sərhədçi" komandası birinci, Füzuli rayonundakı Horadiz
şəhər 1 nömrəli tam orta məktəbin "Ərgünəş" komandası
ikinci, Qusar rayonunun Yuxarı Kalanxur kənd tam orta
məktəbinin "Samur" komandası isə üçüncü yerləri
tutmuşlar.
Doqquz gün ərzində iştirakçılar asudə vaxtlarında xüsusi
məktəbdə yaradılmış şəraitlə tanış olmuş, DSX-nin Sahil
Mühafizəsinə, Dövlət Bayrağı Meydanına, Mərdəkan
qəsəbəsindəki Dendrari parkına, Dənizkənarı Milli Parka
ekskursiyalara aparılmış, çoxsaylı mədəni-kütləvi
tədbirlərə, bilik və idman yarışlarına qatılmış,
"Sərhədçi" vokal instrumental ansamblının konsertinə
baxmışlar. Tədbirin sonunda yarışların final
mərhələsinin qalibləri qiymətli hədiyyələrlə
mükafatlandırılmışlar.
Rəşad ZİYADOV |