Bu
günlərdə Azərbaycan Müəllimlər İnstitutunun əlavə təhsil
üzrə prorektoru Rahim Əzizovun "Ümumtəhsil məktəblərində
peşəyönümü məsələləri" adlı metodik vəsaiti çap
edilmişdir. Metodik vəsait Azərbaycan Respublikası
təhsil nazirinin 29 oktyabr 2012-ci il tarixli 1668
nömrəli əmrinə əsasən təsdiq edilib çap olunmuşdur. Bu
vəsait ümumi orta, tam orta, ilk peşə-ixtisas
məktəblərinin şagirdləri və müəllimləri, metodistlər,
pedaqoji təmayüllü orta ixtisas və ali təhsil
ocaqlarının tələbələri üçün nəzərdə tutulmuşdur.
Metodik vəsait hazırkı dövr və perspektiv üçün mühüm
əhəmiyyət kəsb edən bir problemin - ümumtəhsil
məktəbləri şagirdlərinin şüurlu şəkildə peşə seçiminə və
onunla bağlı iqtisadiyyatın əsasları üzrə ilkin
biliklərə, praktik bacarıq və vərdişlərə yiyələnməsinin
imkanları və yollarına həsr olunmuşdur.
Yeni nəşrdə Azərbaycan iqtisadiyyatının əsas sahələri
üzrə geniş yayılan peşə və ixtisaslar barədə yığcam və
asan qavranıla bilən materiallar (peşə-ixtisasqramlar)
verilir, ayrı-ayrı fənn proqramlarında, dərslik və dərs
vəsaitlərində problem üzrə iş aparılması imkanları, yeri
və ümumi məzmunu müəyyənləşdirilir, həyata keçirilməsi
metodları göstərilir. Bütün bunlar xüsusi cədvəllərdə
verilir. Cədvəl müəllimlərə hərtərəfli istiqamət və
kömək edə biləcək məzmunda işlənmişdir.
Kitabda ilk peşə-ixtisas seçiminə verilən əsas tələblər
də nəzərə çatdırılır, məktəb təcrübəsi təhlil edilir,
nöqsanlar və onları törədən səbəblər, aradan
qaldırılması və işin düzgün təşkili yolları
işıqlandırılır. Problemin həllinin metodik məsələləri,
maddi-texniki bazası haqqında oxucuya faydalı tövsiyələr
təqdim edilir.
Vəsaitdə Azərbaycanda iqtisadiyyatının əsas sahələri
üzrə geniş yayılan peşə-ixtisaslar, peşə-ixtisas seçimi
və ona verilən əsas tələblər, ümumi təhsilin məzmununda
peşə-ixtisas seçimi və iqtisadiyyatın əsasları üzrə işin
aparılması imkanları, məktəbdə iqtisadi biliklərin
öyrənilməsi, peşəyönümü üzrə işin vəziyyəti,
maddi-texniki bazası və metodik təminatı, I-IX
siniflərdə iqtisadi biliklərin məzmunu və öyrədilməsi
yollarından geniş söhbət açılmışdır.
Vəsaitdə qaldırılan məsələlərə dair məzmunlu nəticə və
təkliflər verilmişdir.
Niyazi RƏHİMOV |