|
 İyunun
20-də Azərbaycan Respublikasının Prezidenti yanında
Dövlət İdarəçilik Akademiyasında dövlət qulluqçularının
peşə bayramı gününə həsr olunmuş "Dövlət qulluğunun
aktual problemləri" mövzusunda elmi-praktik konfrans
keçirilmişdir.
Elmi-praktik konfransı Azərbaycan Respublikasının
Prezidenti yanında Dövlət İdarəçilk Akademiyasının
rektoru, akademik Urxan Ələkbərov açaraq peşə bayramı
münasibəti ilə dövlət qulluqçularını təbrik etmiş,
onlara fəaliyyətlərində uğurlar arzulamışdır. Rektor
ölkəmizdə bayram kimi qeyd edilən bu günün vacibliyi,
davamlı insan potensialına əsaslanan inkişafın
əhəmiyyəti, elmə əsaslanan inkişaf və dövlət qulluğu
sisteminin idarə edilməsinin elmi əsasları barədə
danışmış, dövlət qulluğunun Azərbaycandakı inkişaf
proseslərinə ümummilli lider Heydər Əliyevin
töhfəsindən, dövlət idarəçiliyi istiqamətində
respublikamızda həyata keçirilən islahatların
nəticəsində həmin sahədə olan irəliləyişlərdən söz
açaraq, bu məsələlərin ölkə Prezidenti İlham Əliyev
tərəfindən daim diqqətdə saxlandığını vurğulamışdır.
Artıq ölkəmizdə çevik dövlət qulluğu sisteminin
formalaşdığını qeyd edən rektor Dövlət Qulluğunu
İdarəetmə Şurasına Prezident Administrasiyasının
rəhbəri, uzun illər ərzində idarəçilik sistemində
fəaliyyət göstərən və bu sahədə zəngin təcrübəyə malik
olan akademik Ramiz Mehdiyevin başçılıq etməsinin bu
qurumun uğurlu fəaliyyətini şərtləndirən əsas amillərdən
biri olduğunu bildirmişdir. Urxan Ələkbərov dövlət
qulluğu sahəsində aparılan islahatların uğurlu
nəticəsindən, "Dövlət qulluğu haqqında" Azərbaycan
Respublikası Qanununun qəbul edilməsi və bu qanunun
qəbul olunması ilə ölkədə dövlət qulluğu sahəsində vahid
dövlət siyasətinin formalaşdırılmasının əhəmiyyəti
barədə danışmışdır.
Tədbirdə Azərbaycan Respublikasının Prezidenti yanında
Dövlət Qulluğu Məsələləri üzrə Komissiyanın sədri Bəhram
Xəlilov çıxış edərək müstəqil Azərbaycan Respublikasında
dövlət idarəetmə sisteminin formalaşması və dövlət
qulluğunun inkişafında ümummilli lider Heydər Əliyevin
əvəzsiz xidmətlərindən danışmış, respublikamızda dövlət
idarəçiliyi istiqamətində həyata keçirilən islahatlar
nəticəsində əldə olunan uğurlardan söz açmışdir. Bəhram
Xəlilov rəhbərlik etdiyi komissiyanın əsas məqsədlərinin
dövlət qulluğu ilə bağlı qəbul edilmiş normativ-hüquqi
aktların tətbiqinin təşkil edilməsi, dövlət qulluğu üçün
kadrların müsabiqə əsasında seçilməsi, yerləşdirilməsi,
həmçinin digər məsələlər barədə qanunvericiliklə nəzərdə
tutulmuş siyasətin həyata keçirilməsini təmin etməkdən
ibarət olduğunu qeyd etmişdir.
Konfransda DİA-nın I prorektoru, professor Əlikram
Abdullayev "Dövlət qulluğunun etik potensialı", Dövlət
Qulluğu Məsələləri üzrə Komissiyanın Dövlət qulluğuna
kadrların seçilməsi şöbəsinin müdiri, dosent Afaq Hüseyn
"Dövlət qulluğu sahəsində kadr siyasətinin
təkmilləşdirilməsi", DİA-nın Rəhbər Dövlət İdarəçiliyi
Kadrlarının ixtisasının Artırılması İnstitutunun
direktoru, professor Gülnarə Qurbanova "Dövlət
qulluqçularının ixtisasının artırılmasının müasir
innovativ metodları", DİA-nın Elmi Təşkilat şöbəsinin
müdiri, dosent Rəcəb Rəhimli "Dövlət qulluqçularının
fəaliyyət səmərəliliyinin qiymətləndirilməsi"
mövzularında məruzələrlə çıxış etmişlər.
Elmi-praktik konfransda dövlət qulluğu və digər kadr
məsələləri sahəsində vahid siyasətin həyata keçirilməsi,
dövlət qulluğunun kadr təminatının proqnozlaşdırılması
ilə bağlı təkliflərin hazırlanması, eyni zamanda bu
istiqamətdə dövlət qulluqçularının peşə hazırlığı,
ixtisasının artırılması sahəsində dövlət orqanları ilə
birlikdə fəaliyyətin əlaqələndirilməsi və s. kimi
mövzular ətrafında da fikir mübadiləsi aparılmışdır.
Samirə KƏRİMOVA |
