|
"Azərbaycan-Avropa gənclərinin əməkdaşlığı" İctimai
Birliyi Azərbaycan Respublikasının Prezidenti yanında
Gənclər Fondunun dəstəyi ilə yeni layihənin həyata
keçirilməsinə start vermişdir. "Beynəlxalq mədəniyyət
festivalı" adı altında reallaşdırılacaq layihə müxtəlif
ölkələrin mədəniyyətlərinin tanıdılmasına, gənclərin
bir-biriləri ilə əməkdaşlığının inkişaf etdirilməsinə
yönəldilib. Əsas məqsəd mədəniyyətlərarası dialoqun
gənclər arasında yaradılması ilə humanitar əlaqələrin
inkişaf etdirilməsindən ibarətdir. Bu layihə gələcək
əməkdaşlıqda bir platforma rolunu oynayacaq və
beynəlxalq səviyyədə əlaqələr üçün şəbəkə yaradacaq.
"Beynəlxalq mədəniyyət festivalı" layihəsi 25-30 iyun
2013-cü il tarixlərində Bakı və Şəkidə həyata
keçiriləcək. Layihə 15 nəfər xarici ölkədən, 5 nəfər isə
Azərbaycandan olmaqla ümumilikdə 20 nəfər iştirakçını
əhatə edəcək. Xarici iştirakçılar İtaliya, Türkiyə, Çin,
Gürcüstan, Polşa və digər ölkələrdəndir. Layihə
çərçivəsində hər bir xarici ölkədən olan iştirakçı öz
ölkəsinin mədəniyyətini, tarixini təqdim edəcək. Bununla
yanaşı, xarici ölkələrin iştirakçılarına Azərbaycan
haqqında geniş məlumatlar veriləcək və onlar üçün
Bakının tarixi-mədəni yerlərinə ekskursiyaların təşkil
olunması planlaşdırılmışdır.
Layihə çərçivəsində daha sonra 1 günlük Şəki şəhərinə
səfərin təşkili, oranın tarixi yerləri, bütövlükdə
Azərbaycanın füsunkar təbiəti ilə ətraflı tanışlıq
nəzərdə tutulmuşdur.
Samirə KƏRİMOVA |
