|
Gənclər və İdman Nazirliyinin, Azərbaycan Milli Elmlər
Akademiyasının Arxeologiya və Etnoqrafiya İnstitutunun
və Azərbaycan Tələbə Gənclər Təşkilatları İttifaqının
birgə təşkilatçılığı ilə Qəbələ rayonunda təşkil
olunmuş arxeoloji düşərgədə 15-ə yaxın ali təhsil
ocağından 80 nəfər tələbə iştirak edərək arxeoloji
qazıntılarla yaxından tanış olmuş və təcrübə
toplamışlar. Tələbələrin iştirakı ilə Qəbələ şəhərinin
Səlbir sahəsində X-XI əsrlərə aid ictimai bina
qalıqları, məişət tikililəri, qəbirlər aşkar olunmuşdur.
Onlar arxeoloji tapıntıların təmizlənməsi və bərpasında,
tikili qalıqlarının plan və cizgilərinin çəkilməsində,
qəbirlərin açılmasında kiçik qrup halında işləmişlər.
Qeyd edək ki, tələbələr Azərbaycan-Koreya birgə
arxeoloji ekspedisiyası tərəfindən aparılan qazıntılar
və Qəbələ ərazisində aşkar olunmuş arxeoloji
materiallardan ibarət eksponatlarla da tanış olmuşlar.
Sifai SƏFƏROVA |
