|
 İyulun
1-də Azərbaycan Memarlıq və İnşaat Universitetində
2012-2013-cü tədris ili məzunlarının təntənəli buraxılış
gecəsi keçirilmişdir.
Mərasim başlanmazdan əvvəl rektorluğun, ictimai
təşkilatların, professor-müəllim heyəti və tələbə
fəallarının, habelə nazirlik, komitə, idarə və
müəssisələrin nümayəndələri xalqımızın ümummilli lideri
Heydər Əliyevin universitetin həyətindəki abidəsi önünə
əklil və tər qərənfil dəstələri qoymuş, xatirəsini
ehtiramla yad etmişlər.
AMİU-nun rektoru, Milli Məclisin deputatı, professor
Gülçöhrə Məmmədova çıxış edərək qeyd etmişdir ki, bu gün
zəngin elm və təhsil ənənələrinə malik olan
universitetin həyatında 38-ci belə bir xoş, əlamətdar
gündür ki, məzunların təntənəli buraxılış gecəsinə
toplaşmışıq. Başa vurduğumuz tədris ilində
universitetimizin bakalavr və magistr pillələrini 1314
nəfər gənc bitirmişdir. Onlardan 108 nəfəri xarici ölkə
vətəndaşıdır. Təhsilin bakalavr və magistr pillələrində
92 nəfər tələbə fərqlənmə diplomuna layiq görülmüşdür.
Rektor çıxışında ölkəmizdə gənclərə göstərilən dövlət
qayğısından, rəhbərlik etdiyi ali təhsil müəssisəsinin
qazandığı uğurlardan, habelə universitetin beynəlxalq
əlaqələrinin ildən-ilə genişlənən rolundan söhbət
açmışdır.
Gülçöhrə Məmmədova çıxışının sonunda məzunları ürəkdən
təbrik etmiş, onlara qarşıdakı seçkilərdə fəal olmağı,
öz istedad və qabiliyyətləri ilə vətənimizə, xalqımıza
layiqli töhfələr verməyi arzulamışdır.
Sonra Milli Məclisin deputatı Ziyad Səmədzadə çıxış
edərək əsası ulu öndər Heydər Əliyev tərəfindən qoyulmuş
və onun layiqli davamçısı möhtərəm Prezidentimiz İlham
Əliyevin bu gün uğurla davam etdirdiyi təhsil
islahatlarından danışmışdır, bu sahə ilə bağlı imzalanan
sənədlərin əhəmiyyətini diqqətə çatdırmışdır.
Ziyad Səmədzadə Azərbaycan Memarlıq və İnşaat
Universitetini sabahın qurucularını hazırlayan
elm-təhsil ocağı kimi dəyərləndirmişdir. Burada ölkəmiz
üçün çox vacib olan ixtisaslar üzrə mütəxəssislərin
hazırlandığını vurğulamış və bildirmişdir ki, AzMİU-nun
builki məzunları da respublikamızda geniş vüsət alan
tikinti, quruculuq və abadlıq işlərində fəal
çalışacaqlar.
Tədbirdə çıxış edən inşaat fakültəsinin məzunu Nigar
Süleymanlı, nəqliyyat fakültəsinin dekanı Yaqub Piriyev,
Azərbaycan Memarlar İttifaqı İdarə Heyətinin sədri Elbay
Qasımzadə ölkəmizdə gənclərin təhsil almaları üçün
yaradılan şəraitə görə ölkə rəhbərliyinə öz dərin
minnətdarlığını bildirmişlər.
Mərasimdə Milli Məclisin deputatı Aydın Mirzəzadə,
Dövlət Torpaq və Xəritəçəkmə Komitəsinin sədri Qərib
Məmmədov, Yasamal Rayon İcra Hakimiyyətinin başçısı
İbrahim Mehdiyev, Bakı şəhərinin baş memarı Akif
Abdullayev, təhsil nazirinin müşaviri İlham Pirməmmədov,
Bakı Metropoliteninin rəisi Tağı Əhmədov da çıxış
edərək məzunları təbrik etmiş, onlara ən xoş arzularını
bildirmişlər.
Tədbirdə universiteti əla qiymətlərlə bitirən, ictimai
işlərdə fəal çalışan məzunlara fərqlənmə diplomu və
fəxri fərmanlar təqdim olunmuşdur.
Məzunların buraxılış gecəsi konsert proqramı ilə başa
çatmışdır.
Akif HACIYEV,
AMİU-nun Azərbaycan dili və pedaqogika kafedrasının
dosenti |
