2013-2014-cü tədris ili üçün Azərbaycan Respublikasının
ali təhsil müəssisələrinə IV ixtisas qrupu üzrə bu il
iyulun 28-də keçirilmiş qəbul imtahanının nəticələri
açıqlanmışdır.
Tələbə Qəbulu üzrə Dövlət Komissiyasının bu barədə
yaydığı məlumatda qeyd olunur ki, IV ixtisas qrupu üzrə
sənəd vermiş 11796 abituriyentdən 11123-ü imtahanda
iştirak etmişdir.
Müsabiqə şərtlərinə əsasən ümumi balı 150-dən, hər hansı
bir imtahan fənni istisna olmaqla qalan dörd imtahan
fənninin hər biri üzrə ayrılıqda topladığı nisbi bal
10-dan az olmayan abituriyentlər (dövlət sifarişli
ixtisaslar üzrə ümumi balı 350-dən, hər bir imtahan
fənni üzrə ayrılıqda topladığı nisbi balı 10-dan az
olmayanlar) IV ixtisas qrupu üzrə ixtisas seçimində
iştirak edə bilərlər.
IV ixtisas qrupunda xüsusi qabiliyyət tələb edən idman
ixtisaslarının müsabiqəsində ümumi balı 75-dən az
olmayan abituriyentlər iştirak edə bilərlər.
Qeyd edək ki, IV ixtisas qrupu üzrə qəbul imtahanında
403 nəfər 600-dən yuxarı, 973 nəfər isə 500-dən yuxarı
bal toplamışdır.
İmtahanda 2 nəfər maksimum nəticə (700 bal)
göstərmişdir.
Aşağıda onları oxucularımıza təqdim edirik.
Müslümov
Osman Məmmədhüseyn oğlu
1996-cı il iyulun 7-də Bakı şəhərində anadan olmuşdur.
2002-ci ildə Bakıdakı 98 nömrəli tam orta məktəbin I
sinfinə gedəndə Osmanın ağlına belə gəlməzdi ki, 11 il
keçəcək və o, doğma təhsil ocağını "əla" qiymətlərlə
bitirərək ali məktəblərə qəbul imtahanlarında ən yüksək
bal toplayıb respublikanın istedadı, biliyi ilə seçilən
gənclərindən biri olacaq, hamı tərəfindən tanınacaqdır.
Osman Müslümov orta təhsil illərində çalışqanlığı, özünə
qarşı tələbkarlığı, dərslərinə hazırlığı ilə məktəbdə
seçilib-sayılan şagirdlərdən biri olmuşdur. İstedadlı
yeniyetmə doğmalarının, təhsil aldığı məktəbin, onu
əhatə edən yaxınlarının və dostlarının etimadını
doğruldaraq yüksək bilik nümayiş etdirmişdir.
Ali məktəblərə qəbul imtahanlarında IV ixtisas qrupu
üzrə maksimum - 700 bal toplamış Osman bu sevincli
hadisəni bizimlə paylaşaraq bunları söylədi: "Sınaq
imtahanlarında hər zaman 600-dən yuxarı bal toplamışam.
Ali məktəblərə qəbul imtahanlarında 700 bal
toplayacağıma nədənsə inanmırdım. Amma daxilimdəki bir
hiss mənim yüksək nəticə göstərəcəyimi deyirdi.
Sevinirəm ki, ali məktəblərə qəbul imtahanlarında ən
yüksək nəticə göstərən gənclərdən biri də məhz mən
oldum. Əlbəttə, əldə etdiyim bu uğur eyni zamanda 11 il
təhsil aldığım doğma məktəbimin də nailiyyətidir. Mənim
üzərimdə əməyi olan müəllimlərimdən Xalidə Ağayevaya,
Ülviyyə Abdullayevaya, Sevil Vəliyevaya və digərlərinə
minnətdarlığımı bildirirəm. Ən böyük arzum respublikanın
tanınmış həkimlərindən biri olmaq, xalqımızın
sağlamlığının keşiyində durmaqdır".
Osmanın uğuruna ən çox sevinənlər isə valideynləri ilə
yanaşı, onun təhsil aldığı 98 nömrəli tam orta məktəbin
rəhbərliyi və müəllim kollektividir.
Məktəbin direktoru Nazim Səfərov və təlim-tərbiyə işləri
üzrə direktor müavini Flora Hüseynova bu yeniyetmənin
olduqca tərbiyəli, yüksək biliyə malik olduğunu
söylədilər.
Bizimlə söhbət zamanı qeyd etdilər ki, onlar Osmanı
təhsil aldığı 11 il ərzində savadlı, hazırlıqlı,
nümunəvi bir şagird kimi tanıyıblar və onun gələcəyinə
inanıblar. Əldə etdiyi bu yüksək nəticə ilə öz doğma
məktəbinə başuçalığı gətirən Osman Müslümovla hamı fəxr
edir.
Paşazadə
Aytən Vaqif qızı
1996-cı il fevralın 17-də Mingəçevir şəhərində ziyalı
ailəsində anadan olmuşdur.
2002-ci ildə Mingəçevir şəhər 7 nömrəli tam orta
məktəbdə I sinfə qəbul edilmiş, bu il həmin təhsil
ocağından məzun olmuşdur.
Oxuduğu müddətdə dərs əlaçısı kimi tanınmış, məktəbin
ictimai həyatında yaxından iştirak etmiş, nümunəvi
davranışı ilə fərqlənmişdir.
Mingəçevir şəhər 7 nömrəli tam orta məktəbin
təlim-tərbiyə işləri üzrə direktor müavini Təranə
Rüstəmova məzunlarını belə səciyyələndirir:
"A.Paşazadə yüksək potensiala malik şagird idi.
Keçirilən bütün müsabiqələrdə, fənn olimpiadalarında
yüksək nəticələr göstərir, mükafata layiq yerlər
tuturdu. Bir neçə dəfə olimpiadanın şəhər mərhələsinin
qalibi olmuşdur. O, TQDK-nın keçirdiyi sınaq
imtahanlarında da bizim etimadımızı doğruldaraq yüksək
bal toplayırdı. Qəbul imtahanında göstərdiyi ən yüksək
nəticə ilə - 700 balla isə o, biz müəllimlərini, eləcə
də valideynlərini hədsiz sevindirmişdir. Fürsətdən
istifadə edib qəzetiniz vasitəsi ilə Aytənin
valideynlərinə gözaydınlığı verir, Aytənə isə gələcək
həyatında və təhsilində uğurlar arzulayırıq".
Aytən bizimlə söhbətində imtahan öncəsi 700 bal
toplayacağına əmin olduğunu bildirdi.
Dedi ki, düzdür, müəyyən tərəddüdlərim olsa da, əminliym
çox idi.
Qəbul imtahanının təşkili və gedişindən razı qaldığını
deyən Aytən imtahanın çox obyektiv və şəffaf
keçirildiyi, imtahan zamanı elə də çox
həyəcanlanmadığını söylədi.
A.Paşazadənin arzusu dövlət hesabına xaricdə tibb
təhsili almaqdır və bunun üçün Təhsil Nazirliyinə
müraciət etməyi nəzərdə tutub.
Hədəfi Böyük Britaniya, Almaniya və ya Türkiyə
universitetlərinin birində oxumaqdır.
Böyük arzulara gedən yolun astanasında olan Aytəni qəbul
imtahanında ən yüksək bal toplaması və tələbə olmaq
şansı qazanması münasibəti ilə təbrik edir, ona gələcək
təhsilində uğurlar arzulayırıq.
Hazırladılar: Yusif ƏLİYEV, Samirə KƏRİMOVA |