Çin Xalq Respublikasının ən böyük və aparıcı ali təhsil
müəssisələrindən biri olan Cənub-Qərb Maliyyə və İqtisad
Universiteti bir neçə ildir ki, müntəzəm olaraq "SWUFE-i
kəşf et - yay məktəbi" proqramını həyata keçirir.
Proqramın məqsədi universitetin dünyanın müxtəlif
ölkələrindən gəlmiş tələbələr arasında tanıdılmasından
ibarətdir.
Növbəti proqramda MDB məkanından yalnız Azərbaycan
Dövlət İqtisad Universiteti təmsil olunmuşdur. Proqrama,
ümumilikdə, 21 ölkənin aparıcı universitetlərinin 74
tələbəsi qatılmışdır.
Çinin Çenqdu şəhərində keçirilmiş 2013-cü il proqramında
ADİU-nun maliyyə fakültəsinin II kurs tələbəsi Toğrul
Qafarlı və ümumi iqtisadiyyat fakültəsinin II kurs
tələbəsi Xəzər İsalı iştirak etmişlər.
Proqram çərçivəsində iştirakçılar Çinin tarixi,
iqtisadiyyatı, mədəniyyəti, adət-ənənələri və milli
mətbəxi haqqında ətraflı məlumat əldə etmişlər. Onlar
Çinin məşhur alimləri və ictimai xadimləri ilə görüşmüş,
müxtəlif mövzularda mühazirələr dinləmişlər.
Proqram müxtəlif mədəniyyətləri təmsil edən gənclər
arasında fikir mübadiləsinin aparılması və dostluq
münasibətlərinin yaradılması baxımından mühüm əhəmiyyət
kəsb etmişdir. Azərbaycanlı tələbələr proqramın işində
səmərəli fəaliyyət göstərmiş, iştirakçılara Azərbaycan,
onun tarixi, mədəniyyəti və bu günü, o cümlədən ADİU
haqqında geniş məlumat vermişlər.
Proqram çərçivəsində Çinin maliyyə və bank sistemi, bu
ölkənin iqtisadiyyatının parlaq inkişafı və s.
mövzularda keçirilmiş seminarlarda ADİU-nun tələbələri
xüsusi fəallıqları ilə seçilmişlər.
Proqramı uğurla başa vuran hər iki tələbə SWUFE-nin
müvafiq sertifikatı ilə təltif olunmuşdur.
Hicran ƏKBƏROVA |