|
Qafqaz
Universiteti 2013-2014-cü tədris ilində ümumi orta
təhsil səviyyəsi üzrə yeni fənn kurikulumları ilə 5-ci
və 6-cı siniflərdə dərs deyəcək və indiyədək təlimdən
keçməyən fənn müəllimləri üçün kurikulumun tətbiqi ilə
bağlı təlimlər aparacaq.
Bu barədə avqustun 2-də Baki Avropa Liseyində keçirilən
seminarda Qafqaz Universitetinin rektoru, professor
Ahmet Saniç məlumat vermişdir. Rektor bildirmişdir ki,
rəhbəri olduğu ali təhsil müəssisəsi Beynəlxalq İnkişaf
Assosiasiyasının layihəsi çərçivəsində Təhsil Nazirliyi
tərəfindən ümumi orta təhsil kurikulumu üzrə təlimləri
həyata keçirmək üçün elan edilən tenderlərdə qalib
gəlib. Tenderin nəticələrinə əsasən universitet
Abşeron, Dağlıq Şirvan, Quba-Xaçmaz və Şəki-Zaqatala
iqtisadi rayonlarında ana dili, coğrafiya, xarici dil,
informatika, texnologiya, təsviri incəsənət və musiqi
fənləri üzrə kurikulum kurslarını aparacaqdır. Bununla
da ümumi orta təhsil səviyyəsi üzrə yeni fənn
kurikulumları ilə bağlı prosesə Qafqaz Universiteti də
qatılacaqdır. Universitet təlimləri bu sahədə zəngin
təcrübəsi olan "İnkişaf" Elmi Mərkəzi ilə birlikdə
təşkil edəcəkdir.
Həmin gün professor Ahmet Saniç və universitetin
kurikuluma dair kursların təşkili və aparılmasında
iştirak edəcək bir qrup əməkdaşı "İnkişaf" Elmi
Mərkəzinin Bakı Avropa Liseyində təlimçilər üçün
təşkil etdiyi seminarda iştirak etmişlər.
Yusif ƏLİYEV |
