|
 Böyüməkdə
olan gənc nəslin yay istirahətinin mənalı və səmərəli
təşkili, onların vətənə məhəbbət, dövlətçiliyə sədaqət
ruhunda tərbiyəsi istiqamətində Səbail Rayon İcra
Hakimiyyəti, DİN Daxili Qoşunları və "Çağ" Öyrətim
İşlətmələri Şirkəti tərəfindən birgə həyata keçirilən
layihəyə yekun vurulmuş və layihə çərçivəsində təşkil
olunan "Şahinlər" hərbi-vətənpərvərlik təmayüllü
düşərgədə yeniyetmələrin yay istirahəti başa çatmışdır.
Səbail rayonunun Qarabağ müharibəsi veteranları və
əlillərinin, rayonun aztəminatlı ailələrinin övladları,
əsas etibarı ilə aztəminatlı ailələrin məskunlaşdığı
Bayıl və 20-ci sahə ərazisində, Badamdar və Bibiheybət
qəsəbələrində yaşayan və rayonun orta məktəblərində
təhsil alan şagirdlər, həmçinin "SOS-Azərbaycan" uşaq
kəndində tərbiyə alan 200 nəfər uşaq üçün Bakı Türk
Liseyinin Quba filialının ərazisində təşkil olunmuş
hərbi-vətənpərvərlik təmayüllü ödənişsiz "Şahinlər"
düşərgəsində 2 həftə ərzində keçən mənalı və yaddaqalan
istirahət uşaqların xatirində silinməz izlər
buraxmışdır.
Səbail Rayon İcra Hakimiyyəti və Daxili Qoşunlar
tərəfindən hər cür şəraitin yaradıldığı düşərgədə
şagirdləri gələcəkdə hərbi xidmətə layiqincə hazırlamaq
məqsədi ilə hərbi-səhra çadırı qurulmuş, səhra mətbəxi
yerləşdirilmiş, həyətdə Azərbaycan xalqının ümummilli
lideri Heydər Əliyevə, Silahlı Qüvvələrin Ali Baş
Komandanı, Azərbaycan Respublikasının Prezidenti cənab
İlham Əliyevə, ölkədəki ordu quruculuğuna, Azərbaycanın
Milli Qəhrəmanlarına, Milli Qəhrəman Mübariz İbrahimova,
Daxili Qoşunların fəaliyyətinə, bu il 8-ci dəfə təşkil
olunan "Şahinlər" düşərgəsinin tarixinə həsr olunmuş
stendlər asılmışdır. Düşərgədə məşğələlərin hərbi
nizamnaməyə uyğun keçirilməsi uşaqların istirahətini
daha da maraqlı və yaddaqalan etmişdir.
Uşaqların Qubanın görməli yerlərinə, tarixi guşələrinə,
soyqırım qurbanlarının məzarlığına gəzintiləri təşkil
olunmuş, istirahətin bir günü Daxili Qoşunların
nümayəndələri tərəfindən hərbi-səhra məşğələləri
keçirilmiş, gün ərzində şəxsi heyətin yeməyi hərbi-səhra
mətbəxi vasitəsi ilə verilmişdir. Məktəblilər təlimləri
Daxili Qoşunların Quba şəhərindəki hərbi hissəsində
keçmiş, burada onlar hərbi hissənin şəxsi heyətinin
xidməti, yaşayış şəraiti, silah və texnikası ilə
yaxından tanış olmuş, xüsusi təyinatlı bölüyün
məşqlərində iştirak etmişlər.
Düşərgədə vətənimizin, xalqımızın tarixi ilə bağlı
müxtəlif mövzularda məşğələlər, maraqlı görüşlər
keçirilmiş, filmlər nümayiş etdirilmişdir.
Yeniyetmələrin hərbi vətənpərvərlik tərbiyəsi
çərçivəsində "Azərbaycan Ordusu: nizam-intizam
hərbçilərə xas olan vacib xüsusiyyətdir", "Dağlıq
Qarabağ problemi və müasir dünya" mövzularında
məşğələlər, hərbçilərin bilavasitə iştirakı ilə ibtidai
hərbi hazırlıq, mülki müdafiə və ilk tibbi yardım
təlimləri də təşkil olunmuşdur.
Düşərgənin təntənəli bağlanış mərasimində iştirak edən
təşkilatların nümayəndələri - Səbail Rayon İcra
Hakimiyyətinin başçısı Asif Əsgərov və digər qonaqlar
uşaqların istirahəti üçün yaradılmış şəraitlə yaxından
tanış olmuş, idman yarışlarında qalib gəlmiş şagirdlərə
xatirə medalları, öz fəaliyyətləri ilə fərqlənmiş dəstə
rəhbərlərinə və hərbiçilərə qiymətli hədiyyələr təqdim
etmişlər.
Yeniyetmələr qonaqlar qarşısında istirahət dövründə
öyrəndiklərini nümayiş etdirmişlər. Respublikamızın
tanınmış incəsənət xadimləri və Daxili Qoşunların hərbi
orkestrinin iştirakı ilə keçirilən konsertdə düşərgədə
istirahət edən uşaqlar da öz məharətlərini
göstərmişlər.
Maraqlı istirahətdən sonra Bakıya qayıdan məktəblilər,
onların valideynləri təşkilatçılara minnətdarlıqlarını
bildirmişlər.
H.ƏKBƏROVA |
