Macarıstanın Cöncöş şəhərində keçirilən XIII beynəlxalq
mahnı və rəqs festivalında Şuşanın "Qarabağ" ansamblı
uğurlu çıxışlar etmişdir.
Çin, Fransa, Serbiya, Portuqaliya, Macarıstan, Ukrayna,
Yunanıstan və digər ölkələrdən gəlmiş ifaçılarla
birlikdə rəngarəng konsert proqramlarında, habelə
festivalın bağlanışındakı qala-konsertdə Şuşa
təmsilçiləri qeyri-adi ifaları ilə iştirakçılar
tərəfindən heyranlıqla qarşılanmışlar. Qeyd edək ki,
"Azərbaycan günü" festival çərçivəsində təşkil olunan ən
əlamətdar gün olmuşdur. Həmin gün xüsusi konsert
proqramı ilə çıxış edən gənc sənətçilərimiz
bitib-tükənməyən alqışlar qazanmışlar. Ənənəvi üçlüyün-
tar, kamança və dəfin müşayiəti ilə ifa olunan
muğamlar, Qafqaz koloritini əks etdirən rəqslər macar
tamaşaçılarının diqqətini cəlb etmişdir.
Azərbaycanın Macarıstandakı səfirliyinin dəstəyi ilə baş
tutan layihə maraqla qarşılanmışdır. |