Javascript DHTML Drop Down Menu Powered by dhtml-menu-builder.com

ARXİV

23 Avqust 2013 - №32

 

Naxçıvan Özəl Universitetinin müəllimləri Doğu Ağdəniz Universitetində ixtisasartırma kurslarında iştirak etmişlər

 

Böyütmək üçün şəkili seçinXəbər verdiyimiz kimi, ötən il Naxçıvan Özəl Universitetinin rektoru, professor İsmayıl Əliyev və universitetin bir qrup  əməkdaşı Şimali Kipr Türk Cümhuriyyətinin Doğu Ağdəniz Universitetində olmuşlar. Hər iki universitetin rektoru qarşılıqlı əməkdaşlığın əhəmiyyətinin mühüm olduğunu vurğulamış, aparılmış danışıqlarda, bir çox sahələrdə ikitərəfli elmi əlaqələr və digər məsələlər barədə razılığa gəlinmişdir. Əldə olunmuş razılaşmalara əsasən universitetlər arasında tələbə mübadiləsi həyata keçiriləcək, univerıitetin professor-müəllim heyəti Doğu Ağdəniz Universitetində müntəzəm şəkildə keçirilən  ixtisasartırma kurslarında iştirak edərək beynəlxalq dərəcəli sertifikat alacaqdır.

Bununla əlaqədar olaraq bu yaxınlarda universitetin tədris və elmi işlər üzrə prorektoru, tarix üzrə fəlsəfə doktoru, dosent İbrahim Kazımbəylinin rəhbərliyi ilə universitetin bir qrup əməkdaşı bir neçə istiqamət üzrə Doğu Ağdəniz Universitetində ixtisasartırma kurslarında iştirak etmişdir. İxtisasartırma kurslarında  "Kurikulum və akkreditasiya", "İKT-dən istifadənin yeni istiqamətləri", "İngilis dilinin tədrisi metodikası"  mövzularında seminarlar keçirilmişdir.

Səfər zamanı Şimali Kipr Türk Cümhuriyyətinin Prezidenti Dərviş Əroğlu Naxçıvan Özəl Universitetinin və Bakı Dövlət Universitetinin nümayəndələrini qəbul etmişdir. Prezident Dərviş Əroğlu öz çıxışında  ölkəsində mövcud yeganə dövlət universiteti olan Doğu Ağdəniz Universiteti ilə Naxçıvan Özəl Universitetinin hərtərəfli əlaqələr qurmasından məmnunluğunu dilə gətirmişdir. O, həmçinin Azərbaycandan gələn Naxçıvan Özəl Universiteti ilə Bakı Dövlət Universitetinin müəllim və tələbələrinin onu ziyarət etməsini də yüksək qiymətləndirmiş və Azərbaycanla əlaqələrin çox uzun illərə söykəndiyini qeyd edərək mövcud əlaqələrin zaman keçdikcə daha da artacağını bildirmişdir.

Görüş zamanı Naxçıvan Özəl Universitetinin prorektoru, dosent İbrahim Kazımbəyli çıxış edərək Azərbaycanla Şimali Kipr Türk Cümhuriyyəti arasında önəmli əlaqələrin olduğunu qeyd etmişdir. Bundan başqa, Naxçıvan Muxtar Respublikasının tarixi, coğrafi, strateji əhəmiyyətinin Azərbaycan və Türkiyə dövlətləri üçün nə qədər önəmli olduğunu vurğulamışdır. Ermənistan-Azərbaycan, Dağlıq Qarabağ münaqişəsindən,  ermənilərin işğalçılıq siyasətindən ətraflı bəhs edən İ.Kazımbəyli çıxışının sonunda Naxçıvanın tarixini əks etdirən  hədiyyəni Dərviş Əroğluya təqdim etmiş, xatirə şəkilləri çəkdirilmişdir.

Qeyd edək ki, Naxçıvan Özəl Universitetinin tədris və elmi işlər üzrə prorektoru İ.Kazımbəylinin Doğu Ağdəniz Universitetinin rektoru, professor Abdullah Öztopraq ilə  görüşündə iki universitet arasında olan mövcud əlaqələr, bu əlaqələrin daha da inkişafı, tələbə mübadiləsi, ikili diplom verilməsi, birgə elmi konfransların keçirilməsi ilə bağlı məsələlər ətraflı müzakirə olunmuşdur. Keçirilən ixtisasartırma kurslarının gedişi və əhəmiyyətindən də geniş bəhs olunmuşdur.

İxtisasartırma kursunda iştirak edən 9 nəfərə beynəlxalq dərəcəli sertifikatlar təqdim olunmuşdur. 

Nuray ƏSGƏROVA

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov