|
Məlum olduğu kimi, paralimpiyaçılarımız 2012-ci il
London Yay Paralimpiya Oyunlarında 12 medal qazanmış və
komandamız 166 ölkə arasında 27 yerin sahibi olmuşdur.
Bu tarixi və möhtəşəm qələbə ölkə rəhbəri İlham Əliyevin
respublikada olimpiya və paralimpiya hərəkatının,
idmanın inkişafına göstərdiyi diqqət və qayğının bariz
nümunəsidir. Uğurların qorunub saxlanılması, inkişaf
etdirilməsi və 2016-cı il Rio-de-Janeyro Yay
Paralimpiya oyunlarına hazırlıqla əlaqədar Milli
Paralimpiya Komitəsi 2013-2016-cı illər "Strateji
Fəaliyyət Planı"nı təsdiq etmişdir. Planda respublikanın
bütün regionlarında paralimpiya hərəkatının daha geniş
vüsət alması məqsədilə peşəkar əlil idmanının inkişafı
və beynəlxalq idman qurumları ilə əlaqələrin
genişləndirilməsi, sağlamlıq imkanları məhdud olan
uşaqların seçilərək peşəkar idmana cəlb olunmaları əsas
yer tutur.
Qeyd edək ki, Milli Paralimpiya Komitəsi respublikada
sağlamlıq imkanları məhdud olan uşaqların kütləvi idman
və bədən tərbiyəsində daha fəal iştirakına nail olmaqla,
paralimpiya idman növləri üzrə ehtiyat idmançıların
hazırlanması məqsədilə komitənin nəzdində "Uşaq
Paralimpiya Hərəkatı"nın təsis edilməsi haqqında qərar
qəbul etmişdir. Eyni zamanda 2013-cü ilin sonunadək
"Uşaq Paralimpiya Hərəkatı"nın inkişaf etdiyi ölkələrin
müəyyən edilməsi və onların təcrübələrinin öyrənilməsi,
hərəkatın icra mexanizminin hazırlanması, regionlarda
paralimpiya idman növlərinə uyğun sağlamlıq imkanları
məhdud olan uşaqların ilkin statistikasının hazırlanması
və sair işlərin görülməsi qərarda öz əksini tapmışdır.
|
