|
 Avqustun
28-də Azərbaycan Dillər Universitetinin rektoru, Milli
Məclisin deputatı, professor Səməd Seyidov Rusiya
Federasiyasının Dağıstan Dövlət Pedaqoji Universitetinin
rektoru Maqomed Abdullayevin başçılıq etdiyi nümayəndə
heyəti ilə görüşmüşdür. Rektor Səməd Seyidov qonaqlara
rəhbərlik etdiyi ali təhsil ocağı haqqında məlumat
vermişdir. Səməd Seyidov ADU-nun Azərbaycanda təhsil
sahəsində islahatlar aparan və öndə gedən ali təhsil
ocağı olduğunu və günü-gündən inkişaf etdiyini demişdir.
O, bu inkişafın bütün təhsil sistemində gedən
islahatların tərkib hissəsi olduğunu bildirmişdir.
Azərbaycan Dillər Universitetinin beynəlxalq
əlaqələrindən söz açan rektor Səməd Seyidov həmçinin
ADU-nun Rusiya ali təhsil müəssisələri ilə əlaqələrinin
uğurla qurulduğunu nəzərə çatdırmışdır. Bildirilmişdir
ki, bu əlaqələrin faydalı əməkdaşlıq zəminində inkişafı
təqdirəlayiqdir.
Rusiya Federasiyasının Dağıstan Dövlət Pedaqoji
Universitetinin rektoru Maqomed Abdullayev təmsil etdiyi
ali təhsil müəssisəsi haqqında məlumat vermişdir. Rektor
Maqomed Abdullayev Dağıstan Dövlət Pedaqoji
Universitetinin beynəlxalq əlaqələrindən də bəhs
etmişdir. O bildirmişdir ki, rəhbəri olduğu ali təhsil
ocağının ADU ilə əlaqələrinin qurulmasında və qarşılıqlı
əməkdaşlığın yaradılmasında maraqlıdırlar.
Universitetlərarası əlaqələrin inkişafına dair fikir
mübadiləsi aparılan görüşdə gələcəkdə müəllim-tələbə
mübadiləsinin mümkünlüyü, qarşılıqlı konfrans və
seminarların təşkili, birgə layihələrin həyata
keçirilməsi istiqamətində əlaqələrin qurulması
razılaşdırılmışdır.
Sonra Azərbaycan Dillər Universiteti və Rusiya
Federasiyasının Dağıstan Dövlət Pedaqoji Universiteti
arasında əməkdaşlıq müqaviləsi imzalanmışdır. Müqaviləyə
hər iki ali təhsil ocağının rektorları imza atmışlar.
İmzalanma mərasimindən sonra rektor Səməd Seyidov
qonaqları ADU-nun müxtəlif mərkəzləri, o cümlədən
İnformasiya Resurs Kompleksi ilə yaxından tanış
etmişdir.
ADU-nun Mətbuat xidməti |
