|
Ali məktəblərə qəbul imtahanlarında 600-dən yuxarı bal
toplayaraq İnformasiya Texnologiyaları Universitetinə
(İTU) qəbul olunmuş tələbələrlə görüş keçirilmişdir.
Rabitə və İnformasiya Texnologiyaları Nazirliyi
tərəfindən tələbələrə noutbuk hədiyyə olunmuşdur.
Bildirilmişdir ki, bu təhsil müəssisəsini seçən
abituriyentlər RİTN tərəfindən yaradılan bir sıra
üstünlüklər əldə edəcəklər. Belə ki, tələbələr
nazirliyin birlik və müəssisələrində təcrübə keçmək
imkanı qazanacaq və diplom alandan sonra işlə təmin
olunacaqlar. Eyni zamanda, nazirlik tərəfindən İTU-nun
məzunlarına xaricdə magistr pilləsində təhsil almaq
imkanı yaradılacaq. Bundan əlavə, müxtəlif
həvəsləndirici mükafatlar, aztəminatlı ailələrin
övladlarına maddi dəstəyin göstərilməsi, yataqxana və
sair ilə təminat da nəzərdə tutulmuşdur. Qeyd
edilmişdir ki, İnformasiya Texnologiyaları Universiteti
ölkə Prezidentinin müvafiq sərəncamına əsasən
yaradılmışdır. İTU 2013-2014-cü tədris ilində bakalavr
səviyyəsində dövlət sifarişi əsasında müvafiq
ixtisaslar üzrə mütəxəssis hazırlığı həyata
keçirəcəkdir. Bu ixtisaslara informasiya təhlükəsizliyi,
kompüter elmləri, kompüter mühəndisliyi, informasiya
texnologiyaları və sistemləri mühəndisliyi daxildir.
Birinci il intensiv şəkildə ingilis dili tədris
ediləcəkdir. Növbəti dörd ildə isə seçilmiş ixtisaslar
üzrə ingilis dilində təhsil aparılacaqdır. |
