Javascript DHTML Drop Down Menu Powered by dhtml-menu-builder.com

ARXİV

13 Sentyabr 2013 - №35

 

Təhsil işçilərinin sentyabr konfranslarında

 

Sumqayıt üzrə 98 məzun 600-dən yuxarı bal toplamışdır 

Sentyabrın 6-da  Sumqayıt şəhər təhsil işçilərinin ənənəvi sentyabr konfransı keçirilmişdir. Sumqayıtın tarixi muzeyində keçirilmiş konfransda şəhər təhsil şöbəsinin müdir əvəzi Vaqif Ələkbərov "2012-2013-cü dərs ilinin yekunları və yeni dərs ilində qarşıda duran vəzifələr" mövzusunda  geniş məruzə etmişdir.

Məruzədə bildirilmişdir ki, təhsil işçilərinin 2012-ci il sentyabr konfransından ötən bir il ərzində ölkəmizdə çox şey dəyişib. Ümummilli lider Heydər Əliyev ideyalarının Prezident cənab İlham Əliyev tərəfindən davamlı olaraq, yaradıcılıqla həyata keçirilməsi sayəsində güclənən, qüdrətlənən ölkəmizdə  təhsil sahəsində inkişaf da  göz qabağındadır.

Son dövrlərdə şəhərdə 6 məktəb əsaslı təmir olunmuş, 5 məktəb binası, 7 məktəb yanında 2200 yerlik əlavə tədris korpusu tikilmişdir. Üç məktəbdənkənar müəssisədə əsaslı təmir və yenidənqurma işləri aparılmışdır. Hazırda yeni dərs ili ərəfəsində 6 məktəbdə əsaslı təmir işləri aparılır. Cari dərs ilində əla qiymətlərlə oxuyan şagirdlərin sayı 7226 nəfərə çatmış, ötən dərs ili ilə müqayisədə 935 nəfər artmışdır. Şəhər üzrə təhsilin keyfiyyət göstəricisi ötən dərs ilindəki 50,3 faizdən cari dərs ilində 54,3 faizə qalxmışdır.

Tələbə Qəbulu üzrə Dövlət Komissiyası tərəfindən keçirilmiş buraxılış imtahanlarından tam orta təhsil üzrə müvəffəqqiyyət göstəricisi 90,7 faiz, ümumi orta təhsil üzrə 79,3 faiz olmuşdur ki, bu da respublika üzrə ən yüksək göstəricilərdəndir.

Gənc nəslin milli mənəvi, vətənpərvərlik tərbiyəsini yaxşılaşdırmaq məqsədilə son illərdə Sumqayıt Şəhər İcra Hakimiyyətinin başçısı Eldar Əzizovun təşəbbüsü və yaxından dəstəyi ilə keçirilən və ümummilli lider Heydər Əliyevin anadan olmasının ildönümünə həsr edilmiş müxtəlif tədbirlər - məktəblərin "Şahin" komandalarının hərbi-vətənpərvərlik paradı, "Şəhər günü", Kitab bayramı, tarixçilərin konfransı, mikrorayonlar və məhəllələr üzrə gənclər arasında futbol, mini-futbol, velosiped, şahmat yarışları şəhər ictimaiyyəti tərəfindən rəğbətlə qarşılanır.

Qeyd edilmişdir ki, respublika və beynəlxalq miqyaslı müsabiqələrdə Sumqayıt məktəbliləri uğurla çıxış edir və müvəffəqiyyət qazanırlar. 47 ölkənin qatıldığı "Ətraf mühitin mühafizəsi"  VII Beynəlxalq Layihə Olimpiadasında (İNEPO Euroasia) şəhərin 11, 12, 13, 14, 18, 19, 23, 24, 25, 27, 29, 30, 31 nömrəli məktəblərinin, TET Gimnaziyanın, "İstedad", "Təfəkkür" və TTE liseylərinin hazırladıqları layihələr qəbul olunmuş, təqdimat sərgisində  Sumqayıt məktəbləri dörd bürünc, üç gümüş medal qazanmışlar.

"Dilimiz varlığımızdır" devizi altında keçirilən "Ana dilimizi sevək, sevdirək" mövzusunda IX Respublika müsabiqəsində 36 nömrəli məktəbin şagirdi Türkan Heydərova qızıl, 43 nömrəli məktəbin şagirdi Aytac Hüseynova gümüş medal almışdır.

Ölkə Prezidentinin sərəncamı ilə keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrində şəhərin 5 məktəbi (30, 31 nömrəli məktəblər, TET Gimnaziya, TTEL, "İstedad" liseyi) və 4 müəllimi qalib gəlmişdir.

Bakı və Sumqayıt məktəbliləri arasında keçirilən "Sabahın alimləri" Beynəlxalq layihə müsabiqəsinin Respublika mərhələsində 16 nəfər Sumqayıt məktəblisinin layihələri III dərəcəli diploma layiq görülmüşdür.

Fənn olimpiadalarının respublika turunda Sumqayıt məktəbliləri hər il olduğu kimi, bu il də müvəffəqiyyətlə çıxış etmiş, 27 təmsilçidən iki nəfəri 1-ci, üç nəfəri 2-ci, yeddi nəfəri 3-cü, dörd nəfəri mükafata layiq 4-cü yerləri tutmuşdur ki, bu da rayon və şəhərlər arasında ən yüksək nəticə hesab olunur.

Hər il olduğu kimi, bu il də Sumqayıt üzrə ali məktəblərə qəbul imtahanlarının göstəriciləri yüksək olmuş, respublika üzrə ən yaxşı nəticələrdən hesab edilmişdir. İlkin məlumata əsasən, bu il ali məktəblərə sənəd vermiş sumqayıtlı məzunların 54,3 faizi müxtəlif universitetlərə qəbul olunaraq tələbə adını qazanmışdır ki, bu da ötən ilin göstəricisi ilə müqayisədə 3,3 faiz çoxdur.

600-dən yuxarı bal toplayan abituriyentlərin sayı ötən dərs ilindəki 92 nəfərdən cari dərs ilində 98-ə çatmışdır.

Bu il qəbul imtahanlarında TTEL-in məzunu Flora Qafarova ən yüksək - 700 bal toplamışdır. Şəhər üzrə ümumilikdə 98 nəfər (7 nəfər SÖTL, 1 nəfər "İdrak" liseyi) 600-dən çox bal toplamışdır ki, bu da ötənilki göstəricidən çoxdur.

Məruzədə bildirilmişdir ki, Azərbaycan Respublikasının təhsil naziri cənab Mikayıl Cabbarovun 17 iyul 2013-cü il tarixli 739 nömrəli əmri ilə "Xüsusi istedada malik uşaqların vaxtından əvvəl I sinfə qəbulu Qaydaları" təsdiq edilmiş, yeni qaydalar 6 yaşı dekabrın 31-dək tamam olan uşaqlara I sinfə qəbul olmaq imkanı vermişdir.

Nazirin əmrinə uyğun olaraq şəhər təhsil şöbəsində də, pedaqoji kollektivlərin ən nüfuzlu müəllimləri, metodist, psixoloq və həkimin də daxil edildiyi komissiya yaradılmış, tam şəffaf və obyektiv seçim təmin edilmişdir.  Sumqayıtın tarixində ilk haldır ki, 5 yaş 8 aylıq Heydər Salmanov müsahibə zamanı 20 mümkün baldan 19 bal toplayaraq birinci sinfə qəbul olunmuş və bu gün təhsil işçilərinin sentyabr konfransına dəvət edilmişdir. 

Konfransda vurğulanmışdır ki, müstəqilliyimizin qorunub saxlanması və daha da möhkəmləndirilməsini, müxtəlif sahələrdə zəruri olan islahatların həyata keçirilməsini, ölkə iqtisadiyyatının dinamik inkişafını, Azərbaycanın dünya ölkələri arasında özünə layiq nüfuz sahibinə çevrilməsini təmin edən, Heydər Əliyev ideyalarını qətiyyət və yaradıcılıqla həyata keçirən, hər bir Azərbaycan vətəndaşının Prezidenti olduğunu əməli işi ilə təsdiq etmiş cənab İlham Əliyev ümumxalq sevgisi və dəstəyi qazanmışdır, Sumqayıt təhsil işçilərinin birmənalı şəkildə fikri belədir. Prezident seçkisində İlham Əliyevə alternativ yoxdur, biz İlham Əliyevləyik!

Sonra məruzə ətrafında çıxışlar olmuşdur.

Konfransın sonunda Azərbaycan Respublikasının Prezidenti cənab İlham Əliyevə  müraciət qəbul olunmuşdur.


Tələbələrə diplomlar verilmişdir 

Sentyabrın 6-da Bərdə rayonunda təhsil işçilərinin ənənəvi sentyabr konfransı keçirilmişdir. Öncə konfrans iştirakçıları rayon mərkəzində ümummilli lider Heydər Əliyevin xatirəsinə ucaldılmış abidəni ziyarət edərək önünə gül dəstələri qoymuşlar.

Konfransı giriş sözü ilə açan Bərdə Rayon Təhsil Şöbəsinin müdiri Rzaqulu Şəfiyev geniş məruzə etmişdir. Respublikamızda təhsilin sürətli və dinamik inkişafından söz açan şöbə müdiri bildirmişdir ki,  ümummilli lider Heydər Əliyev bütün fəaliyyəti dövründə  təhsilə, müəllim əməyinə böyük önəm vermiş, ölkəmizdə təhsilin inkişafına xüsusi diqqət  və qayğı göstərmişdir. Ulu öndər Heydər Əliyevin layiqli davamçısı, ölkə Prezidenti cənab İlham Əliyevin təhsillə bağlı imzaladığı sərəncamların xüsusi əhəmiyyət daşıdığı nəzərə çatdırılmışdır.

2012-2013-cü dərs ilində rayonun təhsil göstəriciləri haqqında danışan şöbə müdiri qeyd etmişdir ki, rayonda 75 ümumtəhsil məktəbi (59 tam orta, 11 ümumi orta, 5 ibtidai)  fəaliyyət göstərmişdir. Ümumtəhsil məktəblərində təhsil alan 21011 nəfər şagirdin təlim-tərbiyəsi ilə 3315 nəfər müəllim məşğul olmuşdur. Müəllim şagird nisbəti 1:6,3 təşkil etmişdir. Ötən dərs ilində təhsilin maddi-texniki bazasının möhkəmləndirilməsi sahəsində xeyli işlər görülmüşdür. Mirzalıbəyli kənd tam orta məktəbi üçün 220 şagird yerlik, Qullar kənd ümumi orta  məktəbi üçün 180 şagird yerlik yeni məktəb binaları, rayon təhsi şöbəsinin üçmərtəbəli inzibati binası tikilmiş, bir çox məktəbdə isə cari təmir işləri aparılmış, səliqə-sahman yaradılmış, yaşıllıqlar salınmışdır.

Rayon təhsil şöbəsinin və onun metodkabinetinin gördüyü işlər nəticəsində ən yaxşı müəllimlər aşkar  edilərək onların təcrübəsinin öyrənilib yayılması, müəllimlərin bilik və bacarıqlarının daim artırılması diqqət mərkəzində saxlanmış, dərs ili ərzində məktəblərdə "açıq dərs"lər keçirilmişdir.  Azərbaycan Müəllimlər İnstitutunun Ağcabədi  filialında 33 nəfər, Təhsil Nazirliyinin "Mədət" qeyri-hökumət təşkilatı ilə birlikdə təşkil etdiyi İKT üzrə treninqlərdə 859 nəfər, Təhsil Nazirliyinin "Öyrədənləri öyrədən" kurslarında isə 14 nəfər müəllimin iştirakı təmin edilmişdir. Yeni kurikulumla beşinci və altıncı siniflərdə işləyəcək 800 nəfər müəllim Təhsil Nazirliyinin  təşkil etdiyi kurslarda təlim keçmişdir.

Ölkə Prezidenti cənab İlham Əliyevin müvafiq sərəncamına uyğun olaraq hər il keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrinin əhəmiyyətindən danışan R.Şəfiyev bildirmişdir ki, müsabiqəyə qoşulan  7 nəfər müəllimdən 2 nəfəri, şəhər   8 nömrəli tam orta məktəbin fizika müəllimi Sədiqə Ağamalıyeva və Kətəlparaq kənd tam orta məktəbinin ingilis dili müəllimi   Günel Nəsibli "Ən yaxşı müəllim" müsabiqəsinin,  akademik Zərifə Əliyeva adına texniki təmayüllü məktəb-lisey (ikinci dəfə) və şəhər 3 nömrəli  tam orta  məktəb isə "Ən yaxşı  ümumtəhsil məktəbi" müsabiqəsinin qalibi olmuşlar. 

Şagirdlərin müxtəlif olimpiada və müsabiqələrdə uğurlu çıxışlarından danışan R.Şəfiyev qeyd etmişdir ki, Tələbə Qəbulu üzrə Dövlət Komissiyasının 2013-cü ildə keçirdiyi qəbul imtahanlarında rayonun məzunları yüksək nəticələr əldə etmişlər. Belə ki,  57 nəfər 500-dən, 30 nəfər isə 600-dən çox  bal toplayaraq respublikanın nüfuzlu ali məktəblərinə qəbul olmuşdur.

Tədbirdə çıxış edənlər son illər təhsilimizdə aparılan islahatlardan, qazanılan nailiyyətlərdən söz açmışlar.

Konfransda tələbə adını qazanmış məzunlara diplom və hədiyyələr verilmişdir.

 Konfransda Azərbaycan müəllimlərinin XIV qurultayına nümayəndələr seçilmiş, Azərbaycan Respublikasının Prezidenti cənab İlham Əliyevə müraciət qəbul edilmişdir.


Ötən dərs ilinin yekunları və qarşıda duran vəzifələr müzakirə edilmişdir 

 Sentyabrın 4-də İsmayıllı rayon təhsil  işçilərinin sentyabr konfransı keçirilmişdir. Konfransın başlanmasından əvvəl iştirakçılar rayon mərkəzində  ucaldılmış  ulu öndər Heydər Əliyevin abidəsini ziyarət etmiş, abidənin önünə tər çiçəklər qoymuşlar.

Konfransda rayon təhsil şöbəsinin müdiri Rasim Orucov "2012-2013-cü dərs ilinin yekunları və qarşıda duran vəzifələr" mövzusunda geniş məruzə etmişdir. Qeyd edilmişdir ki, Azərbaycan Respublikasının Prezidenti cənab İlham Əliyevin uğurlu daxili və xarici  siyasəti sayəsində ölkəmiz iqtisadi cəhətdən qüvvətlənmiş, siyasi cəhətdən inkişaf edərək beynəlxalq aləmdə böyük nüfuz qazanmışdır. Respublikamızda əldə edilmiş davamlı iqtisadi yüksəliş təhsilimizin maddi-texniki bazasının inkişafı üçün zəmin yaratmışdır.

Yeni məktəb binalarının inşa edilməsi, təhsil müəssisələrinin əsaslı təmir olunması, məktəblərin müasir avadanlıqlar və texnologiyalarla təchiz edilməsi, yeni dərsliklərin çap edilərək şagirdlərə pulsuz verilməsi möhtərəm Prezidentimiz cənab İlham Əliyev tərəfindən təhsilimizə göstərilən yüksək diqqət və qayğının nəticəsidir. Bu sahədə Heydər Əliyev Fondunun  prezidenti, Milli Məclisin deputatı Mehriban xanım Əliyevanın da xüsusi xidmətləri vardır.

Qeyd olunmuşdur ki, son 5 ildə rayonda 10 yeni məktəb binası tikilib istifadəyə verilmişdir. Bu il tikilən Yeniyol, Müdrü kənd tam orta, Mücü kənd ümumi orta, Pirəbilqasım kənd ibtidai məktəblərinin binaları yaxın günlərdə istifadəyə veriləcəkdir. Qalınçaq kənd tam orta məktəbi üçün yeni binanın tikintisinə başlanmışdır. Daha dörd məktəb üçün yeni binanın tikintisinə yaxın vaxtlarda başlanılacaqdır.  İsmayıllı şəhərində yeni 140 uşaq yerlik körpələr evi-uşaq bağçası tikilmişdir. Yaponiya səfirliyinin maliyyə dəstəyi ilə İsmayıllı şəhər 2 nömrəli uşaq bağçası üçün tikilmiş yeni bina artıq istifadəyə verilmişdir.

Məruzədə göstərilmişdir ki, rayonun ümumtəhsil məktəblərində 591 ədəd kompüter, 50 ədəd proyektor, 5 ədəd elektron lövhə vardır. Rayonda hər 20 şagirdə 1 kompüter düşür. 25 məktəbdə lokal şəbəkə, 11 məktəbdə sürətli İnternetə çıxış vardır.

Rayonda 81 ümumitəhsil məktəbi fəaliyyət göstərir. Onlardan 46-sı tam orta, 22-si ümumi orta, 13-ü ibtidai məktəbdir. Məktəbəqədər müəssisələrin sayı 10, məktəbdənkənar müəssisələrin sayı isə 5-dir. Rayon məktəblərində oxuyan 11837 nəfər şagirdin təlim-tərbiyəsi ilə 1561 nəfər  müəllim məşğul olur.

Məruzəçi qeyd etmişdir ki, 2012-2013-cü tədris ilində keçirilmiş fənn olimpiadalarının respublika mərhələsində  rayonun 8 nəfər şagirdi qaliblər sırasında  yer tutmuşdur. Bu tədris ilində təhsildə qazandığı uğurlara görə rayon məktəblərinin 4 nəfər məzunu qızıl medalla təltif  edilmişdir. Medal alan məzunlar ali məktəblərə qəbul imtahanlarında yüksək nəticə qazanmaqla uğurlarını təsdiq etmişlər.

Ümumiyyətlə, ali məktəblərə tələbə qəbulunda rayon ümumtəhsil məktəblərinin məzunları yüksək nəticəyə  nail olmuşlar. Bu il rayonun 325 nəfər məzunu ali məktəblərə qəbul olmuşdur. Onlardan 21 nəfər 600-dən yuxarı, 52 nəfər isə 500-600 arasında bal toplamışdır.

Ulu öndər Heydər  Əliyevin 90 illik yubileyinə həsr olunmuş inşa yazı müsabiqəsinin rayon mərhələsinin qalibi,  Cülyan kənd tam orta məktəbinin XI sinif şagirdi Fərmanlı Gülqədəm Bəhram qızı müsabiqənin respublika mərhələsində də müvəffəqiyyətlə iştirak edərək III yeri tutmuş, Respublika Təhsil Nazirliyinin, Heydər Əliyev Fondunun və Yeni Azərbaycan Partiyasının qiymətli hədiyyələri ilə təltif edilmişdir.

Akademik Zərifə xanım Əliyevanın 90 illik yubileyi ilə əlaqədar "Ana müqəddəslik zirvəsidir" mövzusunda keçirilən inşa yazı müsabiqəsinin respublika mərhələsində isə şəhər 5 nömrəli tam orta məktəbin şagirdi Aysel Bağırlı həvəsləndirici yer tutmuşdur.

Bildirilmişdir ki, respublika Prezidenti cənab İlham Əliyevin sərəncamı ilə keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrində hər il uğurlu nəticələr qazanılır. Bu il keçirilən "Ən yaxşı ümumtəhsil məktəbi" müsabiqəsindıə rayonun şəhər 1 nömrəli, Lahıc qəsəbə, Talıstan kənd tam orta məktəbləri qalib gəlmişdir. Həmin məktəblərin builki qələbəsi müsabiqə tarixində ikinci qələbələridir.

"Ən yaxşı müəllim" müsabiqəsində  rayonun  dörd qabaqcıl müəllimi - şəhər 1 nömrəli tam orta məktəbin xarici dil müəllimi Ruhiyyə Mahmudova, şəhər 2 nömrəli tam orta məktəbin fizika müəllimi Şəkər Hacıyeva,  şəhər 3 nömrəli tam orta məktəbin riyaziyyat müəllimi Briliyant Mursalova, şəhər 6 nömrəli tam orta məktəbin Azərbaycan dili və ədəbiyyat müəllimi Minazər Mahmudova qalib gəlmişdir.

Ümumilikdə müsabiqələrin keçirildiyi 6 il ərzində rayonun 19 tam orta məktəbi "Ən yaxşı ümumtəhsil məktəbi", 16 müəllim isə "Ən yaxşı müəllim" müsabiqəsinin qalibi olmuşdur.

Konfransda çıxış edən rayon icra hakimiyyətinin başçısı Mirdaməd Sadıqov və Təhsil Nazirliyinin Dərslik və nəşriyyat şöbəsinin müdiri Faiq Şahbazlı rayonda təhsil sahəsində qazanılan uğurlara yüksək qiymət verməklə yanaşı, müəllimlərə dəyərli məsləhətlər vermiş, konfrans iştirakçılarını yeni dərs ilinin başlanması münasibətilə təbrik etmişlər.


Ötən dərs ili Şəki təhsil işçiləri üçün uğurlu olmuşdur 

Sentyabrın 5-də Şəki Rayon İcra Hakimiyyətinin iclas zalında təhsil işçilərinin ənənəvi konfransı keçirilmişdir.

Konfransın işində Şəki Rayon İcra Hakimiyyətinin başçısı Elxan Usubov, Azərbaycan Respublikası Təhsil Nazirliyinin nümayəndəsi Əhliyət Adıgözəlov iştirak etmişlər.

Şəki Rayon Təhsil Şöbəsinin müdiri Südabər İsmayılova "2012-2013-cü dərs ilinin yekunları və qarşıda duran vəzifələr" mövzusunda məruzə etmişdir. Bildirmişdir ki, 2012-2013-cü dərs ilində Şəkidə 98 ümumtəhsil məktəbi fəaliyyət göstərmişdir. Bunlardan 72-si tam orta, 22-si ümumi orta, 4-ü ibtidai məktəbdir. Bu məktəblərdə 23257 nəfər şagird təhsilə cəlb edilmişdir.

Fənn olimpiadalarının və müsabiqələrin rayon turunun nəticələrinə görə 7 fənn və müxtəlif nominasiyalar üzrə birinci yer tutmuş 52 nəfər şagird respublika, beynəlxalq olimpiada və müsabiqələrdə iştirak etmiş, onlardan 33 nəfəri qalib olmuşdur. Bu isə yaxın 3 il bundan qabaqkı nəticədən 4 dəfə çoxdur.

2013-cü ildə Şəkinin ümumtəhsil məktəblərini bitirmiş 1917 məzundan 1197 nəfəri ali məktəblərə daxil olmaq üçün sənəd vermiş, onlardan 680 nəfəri artıq tələbə adını qazanmışdır. Bu məzunlardan 145 nəfəri 500-dən yuxarı bal toplamışdır ki, bunların içərisində 55 nəfəri 600 baldan yuxarı nəticə göstərənlərdir.

Təsadüfi deyil ki, 2013-cü il Respublika Prezidenti tərəfindən "İKT ili" elan edilmişdir. İl çərçivəsində xeyli iş görülmüşdür. Müəllimlərdən 572 nəfər İKT üzrə treninqlərdən keçərək  müvafiq bacarıqlara yiyələnmişdir.Şəhər 5 nömrəli və 10 nömrəli tam orta məktəblərin müəllimləri "1 şagird - 1 kompüter" layihəsində fəal iştirak etmiş və respublika üzrə iştirakçı olmuş 278 məktəbdən finala qalmış 15 məktəb sırasında olmuşlar. 5 nömrəli tam orta məktəbin müəllimi Aysun Qasımova həm də respublika üzrə keçirilən "Elektron məktəb" layihəsində qalib gələrək II yerə layiq görülmüşdür.

Diqqətə çatdırılmışdır ki, 2013-cü ildə Şəkinin məktəblərində V-XI siniflərdə  20 şagirdə  1 kompüter  nisbəti təmin  edilmişdir. Yaxın günlərdə 4 məktəb fizika, kimya, biologiya avadanlıqları ilə təchiz edilmiş, 5 məktəbdə linqofon kabinetləri quraşdırılmışdır. Aparıcı  fənlər üzrə elektron təlim materialları  məktəblərə  çatdırılmışdır. Rayonda 35 məktəb İnternet xəttinə qoşulmuş, daha 22 məktəbə  İnternet  xətləri çəkilmişdir. Bu il daha 50 kompüter dəsti, 100 DVD, 20 televizor, 20 proyektor dövlət vəsaiti hesabına alınaraq məktəblərə təhvil verilmişdir.

Rayonun 5, 10 və 11 nömrəli tam orta məktəbləri son iki ildə "Ən yaxşı ümumtəhsil məktəbi" müsabiqəsinin qalibləri olmuşlar. Bu il isə ilk dəfə olaraq 10 nömrəli tam orta məktəbin müəllimi Ədalət Musayeva və 20 nömrəli tam orta məktəbin müəllimi Rahim Həsənov "Ən yaxşı müəllim" müsabiqəsinin qaliblərindən olmuşlar.

2012-2013-cü dərs ilində rayonda 6 yeni məktəb binası tikilmiş, 2 məktəb əsaslı təmir edilmiş və şagirdlərin istifadəsinə verilmişdir. Şəhər 5 nömrəli tam orta məktəb əsaslı təmir edilmiş, 360 yerlik yeni korpus, 10 nömrəli tam orta məktəbdə idman, akt zalı və bufetdən ibarət əlavə korpus inşa edilmişdir. Hazırda 17 nömrəli tam orta məktəbin, Şəki Rayon Təhsil Şöbəsinin inzibati binasının yeni tikintisi və Baş Küngüt kənd tam orta məktəbinin əsaslı təmiri başa çatmaq üzrədir.Şin, Baş  Şabalıd,  Baş  Göynük,  Göybulaq  kəndlərində  isə  yeni  məktəb  tikintiləri  başlanılmışdır.

Daha sonra S.İsmayılova qeyd etmişdir ki, qarşıdan gələn dərs ili ölkəmizin həyatında əlamətdar hadisə - prezident seçkilərinin keçirilməsi ilə yadda qalacaq. O, əminliklə bildirmişdir ki, Şəkinin çoxsaylı təhsil işçiləri bu günün və gələcəyin partiyası olan Yeni Azərbaycan Partiyasının namizədi İlham Əliyevə yekdilliklə səs verəcəklər.

Məruzə ətrafında müzakirələrdə Şəki şəhər 14 nömrəli tam orta məktəbinin direktoru İradə Abdullayeva, şəhər fizika - riyaziyyat və humanitar təmayüllü liseyin müəllimi Reyhan Xəlilova, Oxud kənd tam orta məktəbinin məzunu, 696 balla Azərbaycan Respublikasının Prezidenti yanında Dövlət İdarəçilik Akademiyasına qəbul olmuş Fəridə Hacıhəsənli, Təhsil Nazirliyinin keçirdiyi müsabiqədə uğurla iştirak edərək rayonun Biləcik kəndində ingilis dili fənni üzrə vakant yeri tutmuş gənc müəllim Arzu Şamilli və valideyn Mehman Salamov çıxış etmişlər.

Şəki Rayon İcra Hakimiyyətinin başçısı Elxan Usubov konfransda çıxış edərək təhsil işçilərini əldə olunmuş uğurlara görə və yeni dərs ilinin başlanması münasibəti ilə təbrik etmiş, onlara gələcək fəaliyyətlərində müvəffəqiyyətlər arzulamışdır.

Təhsil Nazirliyinin nümayəndəsi Əhliyət Adıgözəlov ölkəmizdə gənc nəslin təhsilinə göstərilən diqqət və qayğıdan, görülən işlərdən ətraflı bəhs etmiş, konfrans iştirakçılarının təkliflərinə öz münasibətini bildirmiş, təhsil işçilərinin qarşısında duran vəzifələrdən danışmışdır.

Konfransın qərar layihəsi oxunmuş, Şəki rayon təhsil işçilərinin sentyabr konfransı iştirakçıları adından Azərbaycan Respublikasının Prezidenti cənab İlham Əliyevə müraciət qəbul olunmuşdur.


Masallıda son illərdə 33 yeni məktəb binası tikilmişdir 

Sentyabrın 6-da Masallı rayonu təhsil işçilərinin ənənəvi konfransı keçirilmişdir. Konfransda Təhsil Problemləri İnstitutunun əməkdaşı Rafiq Qəndilov, rayon icra hakimiyyətinin başçısı Rafil Hüseynov, Milli Məclisin deputatları Elmira Axundova, Nəriman Əliyev, idarə və müəssisələrin rəhbərləri, iş adamları, məktəb direktorları, qabaqcıl müəllimlər iştirak etmişlər.  

Konfransda "2012-2013-cü tədris ilində görülən işlərin yekunu, 2013-2014-cü tədris ilinə hazırlığın vəziyyəti barədə" Masallı RTŞ-nin müdiri Astan İbişov məruzə etmişdir.

Məruzədə qeyd edilmişdir ki, ölkə Prezidenti cənab İlham Əliyevin qayğısı, Təhsil Nazirliyinin təhsilin daha da inkişafı naminə həyata keçirdiyi çox mühüm işlər hesabat dövründə qarşıya qoyulmuş vəzifələrin həllində əsas rol oynamış, təhsilin ayrı-ayrı sahələri üzrə Dövlət Proqramlarının yerinə yetirilməsi istiqamətində əməli tədbirlər həyata keçirilmiş, RTŞ tərəfindən strateji iş planı hazırlanıb təsdiq edilmiş,  fəaliyyət planının icrası əsasən  yerinə yetirilmişdir.

Bildirilmişdir ki, rayonun 64 tam orta  məktəbində 22826, 31 ümumi orta məktəbdə 4019 nəfər şagird təhsil alır. 4 ibtidai məktəb 80 şagirdi əhatə edir.

Ümumilikdə 26925 nəfər şagirdin təlim-tərbiyəsi ilə 2796 nəfər müəllim məşğul olur.

3 məktəbdənkənar tədris müəssisəsi - Uşaq-Yeniyetmələr Yaradıcılıq Mərkəzi, Uşaq-Gənclər İdman Məktəbi, Uşaq-Gənclər Şahmat Məktəbi fəaliyyət göstərir. Diqqətə çatdırılmışdır ki, əksər məktəblərdə müasir texnologiyalar lazımi texniki qaydada quraşdırılmışdır. Masallı RTŞ və bir sıra məktəblər birbaşa İnternet xəttinə qoşulmuşdur. Yeni texnologiyalardan birbaşa dərslərin gedişində istifadəsi daim diqqət mərkəzindədir.

Yeni dərs ilində ibtidai siniflər üçün 18619, yuxarı sinif şagirdləri üçün 22233 ədəd dərslik gətirilmiş və məktəblərə verilmişdir.

2013-cü ildə qəbul imtahanlarının nəticəsinə  görə 546 nəfər sənəd verən məzundan 262 nəfər tələbə adını qazanmışdır. 38 nəfər abituriyent 500, 9 nəfər  məzun isə 600-dən yüksək bal toplamışdır.

Orta ixtisas məktəblərinə qəbul imtahanlarında 500 nəfər şagirddən 256 nəfəri orta ixtisas məktəblərinə qəbul olmuşdur.

Şəhər 3 nömrəli tam orta məktəbin məzunu Gülay  Sabir qızı Seyfullayeva ali məktəblərə qəbulda 685 bal toplayaraq rayon üzrə ən yüksək nəticə göstərmiş və Prezident təqaüdünə layiq görülmüşdür.

Bu il "Ən yaxşı müəllim" müsabiqəsində Böyük Xocavar kənd tam orta məktəbinin dil-ədəbiyyat müəllimi Sevda Məmmədova 22,1 bal toplayaraq qalib adını qazanmışdır.

Bildirilmişdir ki, məktəblilərin fənn olimpiadasının Respublika mərhələsində də rayon məktəblilərinin uğurları böyükdür. Ə.Əsgərov adına Köhnə Alvadı kənd tam orta məktəbinin IX sinif şagirdi  Məzahim Çingiz oğlu Məzahimli fizika fənni üzrə IV yer, B.Məmmədov adına Böyük Xocavar kənd tam orta məktəbinin IX sinif şagirdi Röyal Qəşəm oğlu Həmidov biologiya fənni üzrə IV yer, Ə.Məmmədov adına Öncəqala kənd tam orta məktəbinin XI sinif şagirdli Tünzalə Nizami qızı Əliyeva biologiya fənni üzrə IV yerə layiq görülmüşlər. Ulu öndər Heydər Əliyevin 90 illik yubileyi ilə əlaqədar Bakı şəhərində keçirilən musiqi festivalında Q.İsmayılov adına Şərəfə kənd tam orta məktəbinin VIII sinif şagirdi  Ramil Əsəd oğlu Seyfullayev fəxri diploma layiq görülmüş və Respublika inşa yazı müsabiqəsində "Dəfinə" məktəb-liseyinin X sinif şagirdi Azər Əlinaz oğlu Talıbzadə qalib olmuşdur.

Dövlət Proqramına əsasən və Heydər Əliyev Fondunun təşəbbüsü ilə  "Yeniləşən Azərbaycana yeni məktəb" devizi altında son illərdə Masallıda 33 yeni məktəb binası tikilmiş, 5 məktəb isə əsaslı təmir olunmuşdur.

Kurikulumun tətbiqi ilə əlaqədar və 2013-2014-cü dərs ilində VI sinifdə dərs deyəcək fənn müəllimləri Təhsil Nazirliyinin təşkil etdiyi kurslara cəlb edilərək  yeni təlim texnologiyasını öyrənirlər.

Bu il 32 nəfər gənc müəllim Təhsil Nazirliyində müəllimlərin işə qəbulu üzrə test imtahanını müvəffəqiyyətlə verərək rayon məktəblərində vakant yerlərə müəllim təyin edilmişdir.

Konfransın sonunda təhsil işçiləri Azərbaycan Respublikasının Prezidenti cənab İlham Əliyevə müraciət qəbul etmişlər. 


Azərbaycan müəllimlərinin XIV qurultayına nümayəndələr seçilmişdir 

Sentyabrın 6-da Samux rayon müəllimlərinin konfransı olmuşdur.  Konfransdan öncə ümummilli lider Heydər Əliyevin xatirəsi yad edilmiş, abidəsi  önünə əklil qoyulmuşdur. 

Konfransı Samux Rayon Təhsil Şöbəsinin müdiri Gülağa Hüseynov açıq elan etdikdən sonra Azərbaycan Respublikasının Dövlət himni səsləndirilmişdir.

Konfransda Samux Rayon İcra Hakimiyyətinin, hüquq-mühafizə orqanlarının rəhbərləri, Təhsil Nazirliyinin nümayəndəsi, məktəb direktorları, müəllimlər iştirak etmişlər.  

"2012-2013-cü dərs ilinin yekunları və yeni dərs ilində qarşıda duran vəzifələr" mövzusunda konfrans Samux Rayon Təhsil şöbəsinin müdiri Gülağa Hüseynovun məruzəsi ilə davam etdirilmişdir. Qeyd edilmişdir ki, rayonda 35 ümumtəhsil məktəbi fəaliyyət göstərir. Onlardan 23-ü tam orta, 11-i ümumi orta, 1-i ibtidai məktəb və 5-i məktəbdənkənar müəssisədir. 2012-2013-cü tədris ilində rayon ümumtəhsil məktəblərində 7658 nəfər şagird təhsil almış, məktəbdənkənar müəssisələrdə isə 1450 şagird asudə vaxtlarını səmərəli keçirmişdir. Kurikulum layihəsi üzrə bu il rayonun I-VI siniflərində 4404 nəfər şagird təhsil alacaqdır. Rayon məktəblərinin I siniflərinə isə 808 nəfər şagirdin qəbul edilməsi planlaşdırılmışdır.

Qeyd edilmişdir ki, təhsil nazirinin 7 avqust 2007-ci il tarixli 953 nömrəli əmrinin icrası təmin edilmiş, rayon məktəblərinin şagirdləri tam məktəbli formasına keçmişdir. "Təhsil sisteminin informasiyalaşdırılması üzrə Dövlət Proqramı"na uyğun olaraq rayonun ümumtəhsil məktəbləri 266 ədəd kompüter,13 ədəd noutbuk, 13 ədəd proyektor dəsti ilə təmin edilmiş, məktəblərin bir qismi tam şəkildə İnternetə qoşulmuşdur.

2012-2013-cü tədris ilində maddi-texniki bazanın möhkəmləndirilməsi ilə əlaqədar olaraq  Samux şəhər 2 nömrəli tam orta, Poylu kənd tam orta, Salahlı kənd ümumi orta, Seyidlər kənd tam orta, Lək kənd tam orta və Qiyaslı kənd ümumi orta məktəbləri müasir tələblər səviyyəsində tikilib istifadəyə verilmişdir. Hazırda 2 məktəbin - Qarabağlılar, Əhmədbəyli kənd tam orta məktəblərinin yeni binası inşa edilir. Qırmızı Samux, Alabaşlı, Zazalı kənd tam orta məktəblərində isə əsaslı  təmir işləri yekunlaşmaq üzrədir.

Diqqətə çatdırılmışdır ki, builki məzunlardan 121 nəfəri ali  təhsil, 49  nəfər isə orta ixtisas təhsili müəssisələrinə qəbul edilmişdir. Bu il 9 nəfər 600-dən yuxarı, 12 nəfər isə 500-600 arası  bal toplamışdır.

Məruzə ətrafında Qarayeri qəsəbə 1 nömrəli məktəb-liseyin müəllimi İltimas Əliyeva, Kəsəmən kənd  ümumi orta məktəbinin dırektoru Tahir Bağırov, rayon Uşaq-gənclər şahmat məktəbinin direktoru Faiq Aslanov, Samux şəhər 2 nömrəli tam orta məktəbin müəllimi Səlminə Məmmədova işlədikləri məktəblərdə qazındıqları uğurlardan, nöqsanlardan və qarşıda duran vəzifələrdən danışmışlar.

Zazalı kənd tam orta məktəbinin məzunu 675 balla Gəncə Dövlət Universitetinin riyaziyyat-informatika fakültəsinə daxil olmuş Kübrə Mehdiyeva, Seyidlər kənd tam orta məktəbinin məzunu, 669 balla Qafqaz Universitetinə daxil olmuş Səbinə Abbasova, Qarayeri qəsəbə 2 nömrəli tam orta məktəbin məzunu Lalə Amanova 648 balla Bakı Dövlət Universitetinin tarix fakültəsinə daxil olmuş məzunlar öz çıxışlarında qazandıqları nailiyyətlərdən  danışmış və sonda onlara əmək sərf etmiş müəllimlərinə minnətdarlıqlarını  bildirmişlər.

Təhsil Nazirliyinin nümayəndəsi Sübhi Kazımov öz çıxışında təhsil naziri Mikayıl Cabbarovun təbrikini konfrans iştirakçılarına çatdırmışdır. Sonra o, təhsil sahəsində aparılan islahatlardan, ölkə rəhbərinin təhsilə daim qayğısından, təhsilin müasir tələblər səviyyəsində  inkişaf etdirilməsindən danışmışdır.

Samux Rayon İcra Hakimiyyətinin başçısı Alı Qocayev çıxış edərək yüksək bal toplayan 3 məzuna kompüter dəstı, digər məzunlara isə qiymətli hədiyyələr vermişdir.

Konfransın sonunda Azərbaycan müəllimlərinin XIV qurultayına Samux Rayon Təhsil Şöbəsinin müdiri Gülağa Hüseynov, TİAHİ Samux Rayon Komitəsinin sədri Natiq Hüseynov, Sərkar kənd tam orta məktəbinin müəllimi Zöhrə Verdiyeva, Samux şəhər 2 nömrəli tam orta məktəbin müəllimi Səlminə Məmmədova nümayəndə  seçilmişdir. 

Hazırladı: Şakir CƏFƏROV

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov