|
 Azərbaycan
Müəllimlər İnstitutunun Zaqatala filialında Bilik Gününə
həsr olunmuş tədbir keçirilmişdir. Tədbir başlamazdan
əvvəl filialın professor-müəllim heyəti və tələbələr
Milli Parka gəlmiş, burada ümummilli lider Heydər
Əliyevin xatirəsinə ucaldılan abidənin önünə tər çiçək
dəstələri düzmüşlər.
Yeni dərs ilinin başlanmasına və Bilik Gününə həsr
olunmuş təntənəli tədbir Azərbaycan Respublikasının
Dövlət himninin səsləndirilməsi ilə başlanmışdır. Sonra
filialın direktoru, professor Orucəli Rzayev çıxış
edərək bildirmişdir ki, ümummilli lider Heydər Əliyevin
13 iyun 2000-ci il tarixli sərəncamı ilə yaradılmış bu
təhsil müəssisəsi az bir zaman kəsiyində diqqətəlayiq
nəticələrə nail olmuşdur. 1000 nəfərədək məzunu olan
filialda bu il 2 əlavə yeni ixtisas açılmış, qəbul planı
100 nəfərdən 150-yə qaldırılmış, tələbələr müxtəlif
mövzularda keçirilən konfrans və müsabiqələrin qalibi
olmuş, məzunların bəziləri magistraturaya qəbul
olunmuşdur. Hazırda filial üçün yüksək standartlara
cavab verən yeni tədris binası tikilir. Bütün bu
nailiyyətləri ümummilli lider Heydər Əliyevin siyasi
kursunu uğurla davam etdirən Prezident İlham Əliyevin
təhsilə göstərdiyi diqqət və qayğının təzahürü kimi
qiymətləndirən natiq valideynlərə və tələbələrə öz ürək
sözlərini çatdırmış, ləyaqətli gənc nəslin tərbiyəsində
professor-müəllim heyətinə uğurlar arzulamışdır.
Sonra "Koroğlu" uvertürasının sədaları altında filialın
bayrağı qəbul imtahanlarında ən yüksək bal toplamış
tələbələr tərəfindən meydana gətirilmişdir.
Sonra iki övladı bir vaxtda Zaqatala filialına qəbul
olunmuş valideyn, Balakən şəhər sakini İlqar Hüseynov
belə xoşbəxtliyin yalnız bizim ölkədə yaşayan insanlara
nəsib olduğunu söyləyərək dövlət başçısına
minnətdarlığını ifadə etmişdir.
II kurs tələbəsi Rəqidə Məmmədovanın ifasında səslənən
C.Novruzun sözlərinə bəstələnmiş "Tələbəlik illəri"
mahnısı tədbirə toplaşanlara şirin duyğular bəxş etmiş,
ürəklərdə xoş ovqat yaratmışdır.
Zaqatala Rayon Veteranlar Şurasının sədri Ənvər
Kərimovun çıxışı maraqla qarşılanmışdır. Ağsaqqal
nəsihəti, ziyalı sözü görüş iştirakçılarının uzun zaman
yaddaşından silinməyəcəkdir.
Yüksək bal toplayan Azərbaycan dili və ədəbiyyatı
müəllimliyi ixtisasının I kurs tələbəsi Əsbət Səxavət
qızı fərəhinin və qürurunun həddi-hüdudu olmadığını
dilə gətirərək bu günü həyatının ən xoşbəxt anı kimi
qiymətləndirmişdir. Söz vermişdir ki, müstəqil ölkənin
layiqli vətəndaşı adını daşımaq üçün elmin sirlərinə
daha dərindən yiyələnməyə səy göstərəcəkdir.
Pedaqoji fakültənin dekanı Xəzəngül Babayeva bayram
sevincinin təəssüratlarını tədbirə toplaşanlarla
bölüşərək təlim-tərbiyənin uğurla və səmərəli
aparılacağına hər kəsi əmin etmişdir.
Filialın direktoru, professor O.Rzayev yüksək balla
qəbul olunmuş tələbələrin böyük bir qrupuna tələbə
bileti vermiş və ümummilli lider Heydər Əliyevə həsr
olunmuş "Şəxsiyyətin qüdrəti" kitablarını təqdim
etmişdir.
Fərid ƏZİMOV,
AMİ Zaqatala filialı pedaqoji fakültəsinin Azərbaycan
dili və ədəbiyyat müəllimliyi ixtisası üzrə IV kurs
tələbəsi |
