Sentyabrın 26-da təhsil naziri Mikayıl Cabbarov Təhsil
üzrə Avropa Həmkarlar İttifaqı Komitəsinin
"Mərkəzi-Şərqi Avropa ölkələrində təhsilin mövcud
vəziyyəti" mövzusunda "dəyirmi masa"nın açılış
mərasimində iştirak etmişdir.
Azərbaycan Təhsil İşçiləri Azad Həmkarlar İttifaqı
Respublika Komitəsinin təşkilatçılığı ilə keçirilən
tədbirin iştirakçılarını salamlayan təhsil naziri
ölkəmizin sürətli inkişafının davamlılığının təmin
edilməsində insan kapitalının rolundan danışmışdir.
Təhsil naziri Azərbaycan Respublikasının Prezidenti
cənab İlham Əliyevin irəli sürdüyü "qara qızılın insan
kapitalına çevrilməsi" fikrinin fəaliyyət proqramı kimi
qəbul edildiyini vurğulamışdır.
Təhsil sisteminin yüksək ixtisaslı mütəxəssislər
hazırlamaq imkanlarının ölkənin rəqabətliliyinə birbaşa
təsir etdiyini bildirən nazir bunun milli təhlükəsizlik
məsələsi kimi qəbul edilməli olduğunu söyləmişdir.
Təhsil naziri qeyd etmişdir ki, təhsil sistemi
mütəxəssisləri mövcud imkanlar səviyyəsində deyil, tələb
olunan səviyyədə hazırlamalıdır.
Daha sonra nazir təhsildə keyfiyyətin yüksəldilməsi üçün
stimullaşdırıcı mexanizmlərin yaradılması, bütün təhsil
pillələri üzrə adambaşına maliyyələşdirmə prinsipinin
tətbiqi, təhsildə idarəetmənin təkmilləşdirilməsi, bütün
maraqlı tərəflərin cəlb olunmasını təmin edən idarəetmə
modelinin yaradılması, təhsil müəssisələrinin
müstəqilliyinin artırılması, təhsil sahəsində müasir
qiymətləndirmə sisteminin yaradılması məsələlərindən
söhbət açmışdır. Peşə təhsilinin infrastrukturunun
əsaslı şəkildə müasirləşdirilməsinin zəruriliyinə
toxunan təhsil naziri müəllim hazırlığının keyfiyyətinin
artırılmasının, nəticəyə əsaslanan diferensial əməkhaqqı
və mükafatlandırma sisteminin tətbiqinin nəzərdə
tutulduğunu bildirmişdir.
Azərbaycanda həyata keçirilən təhsil islahatlarının
gedişi barədə qonaqlara məlumat verən nazir dünyanın
istənilən ölkəsində təhsilin ən həssas və əhəmiyyətli
sahələrdən biri olduğunu nəzərə çatdırmışdır. Təhsil
naziri bütün dünyada təhsil sahəsi üzrə qarşıya çıxan
problemlərin əksər hallarda oxşarlığını nəzərə alaraq,
"dəyirmi masa" iştirakçılarını yalnız problemləri deyil,
həmçinin onların mümkün həlli yollarını da müzakirə
etməyə, müvafiq təklif və tösiyələrini bir-biri ilə
paylaşmağa çağırmışdır. |