Sumqayıt
Dövlət Universiteti, "Azərikimya" İstehsalat Birliyi və
Petkim Petrokimya Holdinq A.Ş. tərəfindən imzalanmış
əməkdaşlıq haqqında niyyət protokoluna müvafiq olaraq,
SDU-nun kimya və biologiya fakültəsinin kimya
mühəndisliyi, ekologiya mühəndisliyi, kimya müəllimliyi
və kimya ixtisaslarında təhsil alan bir qrup
tələbəsi avqustun 12-dən sentyabrın 6-na kimi Türkiyə
Cümhuriyyətinin İzmir şəhərində Petkim Petrokimya
Holdinq A.Ş.-də istehsalat təcrübəsi keçib.
SDU-nun mətbuat xidmətindən aldığımız məlumatda
bildirilir ki, dünyanın ən müasir kimya müəssisələrindən
biri olan Petkim Petrokimya Holdinq A.Ş.-də təşkil
olunan istehsalat təcrübəsi tələbələrin həm
universitetdə aldıqları nəzəri biliklərin təcrübə yolu
ilə daha da möhkəmləndirilməsi, həm də müasir
qloballaşma dövründə dünyagörüşlərinin formalaşması
baxımından böyük əhəmiyyət kəsb edib.
Petkim Petrokimya Holdinq A.Ş.-də istehsalat təcrübəsi
olduqca yüksək səviyyədə təşkil olunub. Təcrübənin ilk
iki günü ərzində müəssisənin yüksək ixtisaslı
mütəxəssisləri İnsan qaynaqları və Petkim Akademiyasında
tələbələrə müəssisə, onun strukturu, 16 əsas və 7
yardımçı fabriki, bu fabriklərdə istehsal olunan
məhsullar və onların fiziki-kimyəvi xarakteristikaları,
təhlükəsizlik texnikası tədbirləri və müəssisənin iş
rejimi barədə ətraflı məlumatlar veriblər. İstehsalat
təcrübəsinin üçüncü günündən başlayaraq tələbələr
təcrübələrini ixtisasları üzrə müəssisənin bir sıra
fabriklərində davam etdiriblər.
Təcrübə müddətində Petkim Petrokimya Holdinq A.Ş.-nin
rəhbərliyində çalışan azərbaycanlı mütəxəssislərlə
tələbələrimizin görüşlərinin və həmin mütəxəssislərin
faydalı məsləhətlərinin də gənclərin gələcək
həyatlarında önəmli iz buraxacağı şübhəsizdir.
Petkim Petrokimya Holdinq A.Ş.-də tələbələrin asudə
vaxtının səmərəli keçməsi üçün də yüksək səviyyədə
hazırlıq təşkil olunub. Şənbə və bazar günləri İzmir
şəhərinin və Türkiyənin Efes, Quşadası, Berqama, Cunda
adası, Məryəm ana ziyarətgahı kimi tarixi və istirahət
yerlərinə təşkil olunmuş səyahətlər tələbələrin marağına
səbəb olub.
İstehsalat təcrübəsinin son günündə Petkim
Akademiyasında təşkil olunmuş yığıncaqda tələbələrə
sertifikatlar və hədiyyələr təqdim olunub. Gələcəkdə
qardaş Türkiyədə keçiriləcək istehsalat təcrübələrinin
digər ixtisaslar üzrə təhsil alan tələbələrə də şamil
edilməsi və tələbələrin sayının artırılması nəzərdə
tutulur.
Şakir CƏFƏROV |