|
Uğurlu təhsillə gələcəyə doğru
 Məktəb!
Tarixin bütün zamanlarında insanların ömür yoluna işıq
saçan məbəd, cəmiyyətin hərtərəfli inkişaf və
tərəqqisinin başlandığı ünvan. Məktəb gənclərin fidan
arzularının ilk çiçək açdığı nur bağçası, övladının
gələcəyini müəllimlərə əmanət etmiş ata-anaların
ümidgahı, "Ata yurdu", "Ana dili", "Gözəl Azərbaycan"
kəlmələrini uşaq dünyasında əbədiləşdirən müqəddəs
məkandır.
İnsan həyatı o zaman mənalı olur ki, o xalqın
xoşbəxtliyinə, ölkənin işıqlı gələcəyinə həsr edilir.
Geniş dünyagörüşünə, dərin elmə və mədəni səviyyəyə
malik olmadan isə bu mümkün deyil. Təhsilli gənclər öz
ölkəsinə, xalqına faydalı olmağı, fədakar xidmətlər
göstərməyi qarşılarına məqsəd qoyurlar. Gələcəkdə
müstəqil Azərbaycanın qurucularının, xalqımızın
ümummilli liderinin layiqli davamçılarının
yetişdirildiyi Heydər Əliyev adına tam orta məktəb də
həyata hazırladığı belə gənclərlə ölkəmizin təhsil
məkanında öz yeri olan qabaqcıl təhsil ocaqlarından
biridir.
Ulu öndərin adını daşıyan məktəbdə fəaliyyət göstərmək
qürurverici olduğu qədər də məsuliyyətlidir. Çünki bu
təhsil ocağının qarşısında ölkəmizdə təhsilə göstərilən
dövlət qayğısının reallığa çevrilməsində öncül olmaq,
əldə etdiyi nəticələrlə digərlərinə nümunə göstərmək
vəzifəsi qoyulmuşdur. Heydər Əliyev adına tam orta
məktəb uğurlu nəticələri ilə həmişə ön sıralarda
olmuşdur. Bunu hər il olduğu kimi, bu il də məktəbin
məzunlarının ürəkaçan nəticələri əsasında deyə bilirik.
Heydər Əliyev adına tam orta məktəbin uğurlarının
əsasında bu təhsil ocağında təhsilə kompleks
yanaşılması, pedaqoji kollektivin müasir təhsil sistemi
qarşısında qoyulmuş tələbləri dərindən mənimsəməsi
durur. Göstərilən qayğıya cavab olaraq müəllimlər
keçilən dərslərin keyfiyyətinə diqqətlə yanaşır,
şagirdlərin fənləri yeni tədris metodları əsasında
mənimsəmələrinə çalışırlar. Müəllimlərimiz daim öz
biliklərini artırmağı bir vəzifə kimi görür, pedaqoji və
metodik təcrübələrinin genişlənməsinə səy göstərirlər.
Məktəbin müəllimləri xarici ölkələrdə keçirilən
kurslarda, Tələbə Qəbulu üzrə Dövlət Komissiyasının
təşkil etdiyi seminarlarda iştirak edir, məktəbdə
hazırlanan elektron tədris vəsaitləri kompakt disklər
şəklində muxtar respublikanın digər məktəblərinə
göndərilir. Tədris prosesində ən yeni texnologiyalarla
dərslər keçilməsi şagirdlərin gələcək müstəqil
fəaliyyətlərində müasir dövrün tələblərinə daha tez
uyğunlaşmasına indidən zəmin yaradır.
Müstəqil Azərbaycanın gələcəyi gənclərdir. Gələcəyimiz
olan gənclərdə dövlətə, xalqa, milli dəyərlərə olan
sevgi və ehtiramı formalaşdırmaq isə hər birimizin
borcudur. Bu mühüm məsələdə ümummilli liderin adını
daşıyan məktəbin də üzərinə böyük vəzifə düşür. Təkcə
məktəbimizdə təhsil alan şagirdlərin deyil, bütövlükdə,
gənc nəslin bu ruhda tərbiyə olunması müstəqil
Azərbaycanın uğurlu gələcəyinə yönəlmiş vacib
dövlətçilik xidmətidir. Bu mənada ulu öndərin bizə miras
qoyduğu müstəqil Azərbaycanı dünyanın qüdrətli
dövlətləri arasında görmək və buna nail olmağın yalnız
elm və təhsildən keçdiyini yaxşı dərk edirik. Görkəmli
dövlət xadimi Heydər Əliyevin irsini bütün incəlikləri
ilə gənclərə aşılamaq, onun kimi yaşamaq, onun kimi
mübariz olub xalqına əzmlə xidmət etməyi öyrətmək bu gün
ən ümdə vəzifəmizdir. Muxtar respublikamızın ictimai
işlərində fəal iştirak edən məktəbin kollektivi ulu
öndərin siyasi fəaliyyətinin, azərbaycançılıq
ideyalarının fəal təbliğatçısı kimi üzərinə düşən
vəzifəni yaxşı bilir. Bu, Naxçıvan Muxtar
Respublikasının qabaqcıl təhsil ocağı kimi Heydər Əliyev
adına tam orta məktəbin, bütövlükdə, cəmiyyətimiz
qarşısında yerinə yetirdiyi ən böyük missiyadır.
Hər bir müəllimin, hər bir təhsil ocağının uğurlu
fəaliyyəti ali məktəblərə qəbulun səviyyəsi, yetirdiyi
intellektli gənclərlə ölçülür. Artıq bir neçə ildir ki,
ölkəmizin ən qabaqcıl təhsil müəssisələri arasında yer
tutan məktəbimizin məzunları bu il ali məktəblərə
keçirilmiş qəbul imtahanlarında da yüksək nəticələr
göstərmişlər. Bu il məktəbdən məzun olmuş 45 nəfərdən
43-nün ölkəmizin və Türkiyə Respublikasının nüfuzlu ali
məktəblərinə qəbul olunması bütün kollektivi
sevindirmişdir. Bu məzunlardan 10 nəfərinin 500-dən, 3
nəfərinin isə 600 baldan yuxarı nəticə göstərməsini
xüsusilə qeyd etmək lazımdır.
Hər il olduğu kimi, bu il də məktəbimizin uğurları
yüksək qiymətləndirilmişdir. 2012-2013-cü tədris ilində
ümumtəhsil məktəblərini bitirmiş və ali məktəblərə qəbul
imtahanlarında yüksək nəticə göstərmiş tələbələrlə bu il
avqustun 20-də keçirilən görüşdə Heydər Əliyev adına tam
orta məktəbin 10 nəfər məzunu iştirak etmişdir. Bu
görüşdə Naxçıvan Muxtar Respublikası Ali Məclis sədrinin
gənclərə xitabən dediyi "Ölkəmizin rifahı üçün
çalışmalı, müstəqil dövlətimizə, Vətənimizə və xalqımıza
layiq mütəxəssislər kimi yetişməli, daim azərbaycanlı
olmağınızla fəxr etməlisiniz" sözləri ölkəmizdə insan
resurslarının formalaşdırılması istiqamətində həyata
keçirilən dövlət siyasətinə muxtar respublikamızda
verilən önəmin dərin mənalı ifadəsi və uğurlu təhsillə
gələcəyə doğru addımlamağın yoludur. Çünki bu yol ulu
öndər Heydər Əliyevin nümunəsində Azərbaycan naminə
fədakarlıqla çalışmağın yoludur.
Şəlalə CABBAROVA,
Naxçıvan şəhər Heydər Əliyev adına tam orta məktəbin
müəllimi |
