Oktyabrın
2-də 18 nömrəli Bakı Peşə Liseyində "Bərbər" ixtisası
üzrə tədris emalatxanası açılmışdır.
Açılış mərasimində Azərbaycan Respublikasının təhsil
naziri Mikayıl Cabbarov, "Eldar studio" şirkətinin
rəhbəri Eldar Məmmədov, təhsil müəssisəsinin kollektivi
və şagirdlər iştirak etmişlər.
Təhsil Nazirliyi və "Eldar studio" şirkətinin dəstəyi
ilə Müasir Azərbaycan Peşəkarları Layihəsi çərçivəsində
yaradılmış tədris emalatxanasında "Bərbər" ixtisası üzrə
müasir tələblərə cavab verən mütəxəssislər
hazırlanacaqdır.
Tədris emalatxanası yeni texnologiyalar və
avadanlıqlarla təchiz edilmiş və şagirdlərin öz
ixtisaslarını mükəmməl mənimsəməsi üçün hər cür şərait
yaradılmışdır. Emalatxananın dizaynında da şagirdlərin
seçdikləri peşəyə daha tez uyğunlaşması üçün lazım olan
zəruri amillər nəzərə alınmışdır.
Yekun imtahan zamanı şagirdlərin əldə etdikləri bilik və
bacarıqların yeni üsulla qiymətləndirilməsi nəzərdə
tutulmuşdur. Belə ki, yekun imtahanda şagirdlərin nəzəri
bilikləri ilə yanaşı, həm də praktiki bacarıqlarının
yoxlanılması nəzərdə tutulmuşdur.
Ümumiyyətlə, müvafiq istiqamətdə aparılan islahatlar ilk
peşə-ixtisas təhsili müəssisələrinin fəaliyyətinin
müasir tələblərə uyğunlaşdırılmasını təmin etməyə
yönəlmişdir. Həyata keçirilən pilot layihələrin
nəticələrinin digər peşə məktəblərində bir model kimi
tətbiq olunması nəzərdə tutulmuşdur. |