Javascript DHTML Drop Down Menu Powered by dhtml-menu-builder.com

ARXİV

4 Oktyabr 2013 - №38

 

Müəllimlərin işə qəbulunun imtahan vasitəsi ilə həyata keçirilməsi müsbət haldır

 

5 oktyabr - Beynəlxalq Müəllimlər Günü mənim çox sevdiyim bayramlardandır. Təqvimdə bu günün yer alması müəllimlik sənətinin bütün dünyada yüksək dəyərləndirilməsinin təzahürüdür. Biz bunu ölkəmizdə müəllimlərə göstərilən diqqət və qayğının nümunəsində də aydın görürük.

Mən, Həşimov Elnur Möhübbət oğlu 1984-cü ildə Qubadlı rayonunun Əbilcə kəndində anadan olmuşam. Birinci sinfə kəndimizdəki orta məktəbdə getmişəm. Lakin 1993-cü ildə Qubadlı rayonu işğal olunduqdan sonra təhsilimi Bakı şəhərində fəaliyyət göstərən Zəngilan rayon 29 nömrəli orta məktəbdə davam etdirmişəm. 2002-ci ildə həmin məktəbi bitirib Sumqayıt Dövlət Universitetinin tarix fakültəsinə daxil olmuşam. Buranı bitirdikdən sonra Ağsu rayonunun Cəlayir kəndində əmək fəaliyyətinə başlamışam. Burada işlədiyim zaman Azərbaycan Dövlət Pedaqoji Universitetinin magistratura şöbəsinin "Azərbaycanın qədim və orta əsrlər tarixi" ixtisasına qəbul olmuşam. Təyinatla 3 il Ağsuda işlədikdən sonra Bakıya qayıtdım. Doğrusu, Bakıya qayıdarkən məni nəyin gözlədiyini bilmirdim. Çünki işlə necə təmin olunacağım barədə heç bir təsəvvürüm yox idi. Lakin gözləmədiyim halda həmin ildə, yəni 2009-cu ildə müəllimlərin işə qəbulunda dəyişiklik baş verdi: müəllimlər mərkəzləşdirilmiş qaydada imtahan vasitəsilə işə qəbul olunmağa başladı. Mən də  bu imtahanda iştirak edərək Sabunçu rayonu, Balaxanı qəsəbəsində yerləşən 69 nömrəli tam orta məktəbdə işlə təmin olundum. Həmin ildən etibarən bu məktəbdə əmək fəaliyyətimi davam etdirdim. 2013-cü ildə keçirilən müəllimlərin işə qəbulu üzrə müsabiqədə yenidən özümü sınamaq qərarına gəldim. Bu imtahanda iştirak edərkən 2009-cu ildəki imtahanla 2013-cü ildəki imtahan arasında fərqlərin olduğunu, təkmilləşdirmələrin baş verdiyini gördüm.

Ümumiyyətlə, müəllimlərin işə qəbulunun imtahan vasitəsi ilə həyata keçirilməsi çox müsbət haldır. Mən bu prosesi həyata keçirən Təhsil Nazirliyinə, müsabiqədə zəhmət payı olan hamıya minnətdarlıq edirəm.

Heç şübhəsiz ki, insanların peşə seçərkən rəhbər tutduqları əsas prinsiplərdən biri gələcəkdə işlə təmin edilmə şansının hansı dərəcədə olmasıdır. Artıq müəllimlik peşəsinə yiyələnmək istəyən hər bir şəxs gələcəkdə işlə təmin olunub-olunmamasının özündən asılı olduğunu anlayır. Bu isə həmin şəxsin məsuliyyətini daha dərindən dərk eləməsinə şərait yaradır və onun işə qəbul olunacağına inamını artır. Müəllimlərin işə qəbulunun imtahan vasitəsi ilə həyata keçirilməsi tədris edəcəyi fənni dərindən bilməyən, pedaqoji biliklərə kifayət qədər yiyələnməyən müəllimlərin məktəbə daxil olmasının qarşısını alır. Yeni işə qəbul olmaq istəyən müəllimlərin bu sistemə olan marağının artmasının əsas səbəblərindən biri də imtahanların tam şəffaf şəkildə həyata keçirilməsidir. İşə qəbul olmaq üçün çoxlu sayda ərizələrin verilməsi bu şəffaflığın doğurduğu inamın bariz nümunəsidir. Bu imtahanın müsbət cəhətlərindən biri də sənəd vermə prosesinin onlayn həyata keçirilməsidir ki, bu da əlavə vaxt itkisinin qarşısını alır və prosesi sadələşdirir.

Builki imtahanda mən 35,83 bal toplayaraq Səbail rayonundakı 6 nömrəli məktəb-liseydə işə qəbul olundum. Bu məktəbə gəldikdən sonra həm direktor Gülşən xanım, həm də məktəbin  digər müəllimləri məni çox səmimi qarşıladılar. Bu xoş münasibət təkcə mənə qarşı deyildi. Bu il məktəbə qəbul olmuş digər müəllimlərə ən yüksək səviyyədə qayğı göstərilir. Ümumiyyətlə, həm məktəb kollektivinin yüksək səviyyəli intellektual şəxslərdən ibarət olması, həm də məktəbin maddi-texniki bazasının yüksək səviyyədə olması mənə seçimimdə yanılmadığımı göstərdi. Burada müəllimin normal fəaliyyət göstərməsi üçün hər cür şərait yaradılıb. Məktəbdə belə səmimi mühitin olmasında ayrı-ayrı müəllimlərin şəxsi keyfiyyətləri ilə yanaşı, məktəb rəhbərliyinin təşkilatçılığının da böyük rolu var.

Hazırda biz oktyabr ayını yaşayırıq. Bu ay müəllimlər üçün xüsusilə əhəmiyyətlidir. Çünki onların peşə bayramı - 5 oktyabr - Beynəlxalq Müəllimlər Günü bu aydadır. Mən bütün müəllimlərimizi bu gün münasibəti ilə təbrik edirəm. Ümid edirəm ki, millətin və dövlətin gələcəyinin formalaşması kimi çətin və şərəfli vəzifəni öz üzərinə götürmüş müəllimlər arzu etdikləri xoşbəxt həyata sahib olarlar.  

Elnur HƏŞİMOV,
Bakı şəhəri 6 nömrəli məktəb-liseyin tarix müəllimi

 
 
 
Səhifənin başına qalx Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov