|
 O
kimdir - şərəfli ömür yaşayır?
O kimdir - əsəri gənclik və gələcəkdir?
O kimdir - təhsil prosesinin əsas simasıdır?
O, müəllimdir.
Bu meyarlar peşəmi seçdiyim gündən etibarən atdığım hər
addımda məni önə istiqamətləndirən və yönəldən bir mayak
olub.
Mən, Məmmədova Kəmalə Cahangir qızı 1979-cu ildə Fizuli
rayonunda anadan olmuşam. Fizuli rayonunun işğalından
sonra orta təhsilimi 250 nömrəli tam orta məktəbdə davam
etdirmişəm.
2000-ci ildə BDU-nun filologiya fakültəsinin bakalavr
pilləsini, 2007-ci ildə isə magistraturasını fərqlənmə
diplomu ilə bitirmişəm. Əmək fəaliyyətinə 250 nömrəli
tam orta məktəbdə başlamışam. 17 il bundan əvvəl məzunu
olduğum məktəbin hazırda Azərbaycan dili və ədəbiyyat
müəllimiyəm.
Müəllim necə olmalıdır?
Müəllimin qarşısında hansı vəzifələr və tələblər durur?
Mən bir müəllim kimi bu tələblərin öhdəsindən gələ
bilirəmmi?
Mənim bir müəllim kimi fəaliyyətimi necə qiymətləndirmək
olar?
Bu sualları özümə hər gün verirəm. Suallarıma cavab tapa
bilmədiyim gün özümü qiymətləndirmirəm. O an mənim
sükunət anımdı.
Bu gün bir müəllim kimi mənim tədqiqat obyektlərim
təhsil haqqında Azərbaycan Respublikasının
qanunvericiliyi, Azərbaycan Respublikasının ümumtəhsil
sistemində qiymətləndirmə konsepsiyası, dövlət
proqramları və digər normativ sənədlərlə yanaşı, milli
və xarici təhsil resurslarıdır.
Müəllim yaradıcı, tədqiqatçı, fasilitator, psixoloq,
novator, innovativ olmalıdır. Bu gün müəllimin
qarşısında çox böyük vəzifə və tələblər durur. O,
kurslarda, treninqlərdə, seminarlarda, konfranslarda,
layihələrdə, KİV-də fəal iştirak etməlidir. Mükəmməl
İKT bacarığına malik olmaq, istedadlı şagirdlərlə işi
və təlim-tərbiyəni düzgün qurmaq, mütəmadi olaraq
nümunəvi dərslər təşkil etmək, qəbul göstəricilərinə və
valideyn-müəllim münasibətlərinə xüsusi yer ayırmaq,
məktəbin ictimai həyatında və
sinifdənxaric-məktəbdənkənar tədbirlərin təşkilində fəal
olmaq, həmkarlarla təcrübə mübadiləsi - qarşılıqlı
əməkdaşlığı önə çəkmək və digər vacib göstəricilərə
malik olmaq, mütəmadi olaraq təhsil islahatları
sahəsində dövlət siyasətini əks etdirən sənədləri
izləmək, fənn kurikulumları və fəal təlim üsulları ilə
işləmək, gündəlik pedaqoji fəaliyyəti planlaşdırmaq bu
günün müəlliminin əsas meyarları olmalıdır.
Mən ötən dərs ilinin əvvəlində bu meyar və öhdəlikləri
gündəlik fəaliyyətimin ana xəttinə çevirdikdən sonra "Ən
yaxşı müəllim" müsabiqəsinə qatılmağa qərar verdim.
Müsabiqə 3 mərhələni əhatə edirdi. I mərhələdə
(sənədlərin qiymətləndirilməsi) - 2,5, II mərhələdə
(pedaqoji qabiliyyət) - 9,5, III mərhələdə (özünü
təqdimetmə) - 9.8, ümumilikdə 21,8 bal topladım.
Müsabiqənin bütün mərhələləri şəffaf, yüksək səviyyədə
keçdi.
Müsabiqədə müəllimə qoyulan tələblər iş stajının,
əlavə təhsilin, təcrübə mübadiləsi və ölkəxarici
treninqlərdə iştirakın, təlimçi kimi fəaliyyətin,
pedaqoji mühazirələr və elmi-təcrübi konfranslarda
çıxışların, kütləvi informasiya vasitələrində
nəşrlərin, şagird nailiyyətlərinin, müəllim
təltiflərinin, qabaqcıl təcrübənin, İKT bacarıqlarının,
pedaqoji fəaliyyətin qiymətləndirilməsinin və müəllim
üçün zəruri olan digər göstəricilərin olması idi.
Mən Nizami rayonu 250 nömrəli tam orta məktəbdən ilk
müəlliməm ki, bu müsabiqəyə qoşulmuşdum və bu gün
fəxrlə deyə bilərəm ki, qaliblərdən biriyəm. Bu gün
mənim qalibiyyətim məktəbimizin digər müəllimlərinin də
müsabiqəyə qoşulmasına stimul verir. Mən hörmətli
Prezidentimiz İlham Əliyevə biz müəllimlərə göstərdiyi
yüksək diqqət və qayğıya görə öz dərin minnətdarlığımı
bildirirəm. Təhsil naziri Mikayıl Cabbarov başda
olmaqla, bu müsabiqənin bütün təşkilatçılarına da
obyektiv və şəffaf seçim mühiti yaratdıqlarına görə
təşəkkür edir və onları verdikləri qiymətə layiq
olacağıma əmin edirəm.
Kəmalə MƏMMƏDOVA,
Bakıdakı 250 nömrəli tam orta məktəbin müəllimi, "Ən
yaxşı müəllim" müsabiqəsinin qalibi |
