|
Bu illər ərzində qəzet şərəfli bir inkişaf yolu keçib
 "Azərbaycan müəllimi" qəzeti respublikamızın mətbuat
tarixinə şərəfli yaradıcılıq yolu keçmiş, pedaqoji
ənənələrin inkişafında silinməz izlər buraxmış,
özünəməxsus dəst-xətti ilə seçilən nəşrlərdən biri kimi
daxil olmuşdur. Azərbaycanda pedaqoji mühitin
formalaşmasında, müəllim kadrların elmi-metodiki
səviyyəsinin yüksəldilməsində bu qəzetin mühüm
xidmətləri vardır.
Heydər ƏLİYEV,
Azərbaycan xalqının ümummilli lideri
"Azərbaycan müəllimi" qəzeti təsis olunduğu gündən
etibarən Azərbaycanda təhsilin aktual problemlərinin
işıqlandırılmasında, qabaqcıl pedaqoji təcrübənin
təbliğində böyük xidmətlər göstərmiş, təhsil
müəssisələri üzrə ixtisaslaşmış jurnalistlərin
formalaşmasında aparıcı rol oynamışdır.
İlham ƏLİYEV,
Azərbaycan Respublikasının Prezidenti
Müasir milli məktəb və demokratik mətbuatın yaranmasının
bünövrəsi XIX əsrdə qoyulsa da Azərbaycan təhsili, elmi
və mədəniyyəti əsasən XX əsrdə hərtərəfli inkişaf yolu
keçib. Məhz bu dövrdə ölkəmizdə savadsızlıq ləğv edilib,
tam orta icbari təhsil tətbiq olunub, təhsil
müəssisələrinin, o cümlədən ali məktəblərin inkişaf
etmiş şəbəkəsi yaradılıb, Azərbaycan Milli Elmlər
Akademiyasının əsası qoyulub, minlərlə qəzet-jurnal çap
olunmağa başlayıb.
Onu da qeyd edək ki, hələ 30-cu illərin ortalarında
əhalinin sayının artması, xalq maarifinin inkişafı, yeni
elmi-pedaqoji kadrların, ziyalıların yetişməsi və
informasiya məkanının genişlənməsi pedaqoji mətbuatın
yaranması ehtiyacını doğururdu.
Beləliklə, 1934-cü il sentyabrın 2-də "Kommunist
maarifi" qəzeti nəşrə başladı. Qəzetin nəşrində başlıca
məqsəd geniş maariflənmə proqramlarının həyata
keçirilməsinə kömək, qazanılmış uğurları təbliğ etmək,
təhsillə bağlı qarşıda duran vəzifələri həyata keçirmək
idi. Bu mətbu orqan həmçinin "mədəni inqilab"ın əsas
təbliğat vasitələrindən olmaqla respublikada milli
elmi-pedaqoji kadrların formalaşmasına yaxından kömək
edir, xalq maarifinin, təhsilin inkişafında müstəsna rol
oynayırdı. Qəzet kommunist ideyalarının, bolşevik
maarifinin ruporu kimi nəzərdə tutulub yaradılsa da ilk
gündən mövcud çərçivəyə sığmır və daha çox
 ümumxalq
qəzeti kimi diqqəti cəlb edirdi. Sırf pedaqoji
məsələlərə geniş yer ayırdığı üçün 1938-ci ildə qəzetin
adı dəyişdirilərək "Müəllim qəzeti" adlandırıldı.
1941-ci ilin iyununadək qəzet bu adla nəşr olundu.
1941-ci ilin iyunundan 1946-cı ilin aprelinədək qəzetin
nəşri dayandırıldı, qəzetin əməkdaşları döyüşən ordu
sıralarına yollandılar.
Məlumat üçün onu da bildirək ki, qəzetin təşəkkül
tarixindən 1946-cı ilə qədərki dövrü mətbu orqanının
taleyinin ən ağrılı, ən çətin mərhələsini təşkil edir.
Qəzetin ilk müəlliflərindən bir çoxu amansız Stalin
repressiyalarının qurbanı olub. Bəziləri NKVD
zindanlarına atılaraq onlara "xalq düşməni" damğası
vurulub, əməkdaşların bir qismi isə Böyük Vətən
müharibəsində həlak olub.
1946-cı ilin aprelindən "Azərbaycan müəllimi" adı ilə
yenidən nəşrə başlayan qəzet sonrakı illərdə də öz
üslubuna, dəst-xəttinə, ən başlıcası isə məramına və
amalına sadiq qalıb. Onu çoxminli oxucu auditoriyasına
sevdirən də məhz bu keyfiyyətlərdir.
Ziyalı kimi tanınmaq və bu adı qoruyub saxlamaq şübhəsiz
ki, o qədər də asan deyil. Sıravi müəllimindən tutmuş
adlı-sanlı elm adamlarına, dövlət xadimlərinədək hamının
yekdil fikrinə görə "Azərbaycan müəllimi" təhsilimizin,
elmimizin, mədəniyyətimizin inkişafında əvəzsiz rol
oynayır, bu ənənəni ölkə təhsilində gedən hərtərəfli
islahatlar və qlobal yeniləşmə dövründə də uğurla davam
etdirir.
Respublikamızda təhsil islahatlarının həyata
keçirilməsində, təhsilin və elmin inkişafında,
bütövlükdə milli təhsilimizin uğurlarında "Azərbaycan
müəllimi" qəzetinin rolu əvəzsizdir. Sevindirici haldır
ki, ümummilli lider Heydər Əliyevin qəzetin 60 illik,
Azərbaycan Respublikasının Prezidenti cənab İlham
Əliyevin isə qəzetin 70 illik yubileyləri münasibətilə
redaksiya kollektivinə göndərdikləri təbrik
məktublarında "Azərbaycan müəllimi"nin fəaliyyətinə
layiqli qiymət verilib, onun ictimai-siyasi
həyatımızdakı rolu yüksək dəyərləndirilib. Ulu öndərin
redaksiya kollektivinə ünvanladığı təbrik məktubunda
qeyd edilən müddəalar hələ neçə-neçə illər bundan sonra
da qəzetin əsas fəaliyyət istiqamətlərini
müəyyənləşdirəcək, kollektivə yeni ruh verəcək. Həmin
tarixi məktubda deyildiyi kimi: "Azərbaycan müəllimi"
yalnız sahə qəzeti olmaqla kifayətlənməmiş, respublika
həyatında baş verən ictimai-siyasi hadisələrə də
nüfuz etmişdir. Qəzet respublikamızda jurnalistika
sənətinin inkişafı işində əhəmiyyətli rol oynamışdır.
 "Azərbaycan müəllimi" qəzeti bu gün də öz ənənələrinə
sadiq qalaraq pedaqoji maarif istiqamətində fəaliyyətini
davam etdirir".
Artıq oxuculara doğmalaşan, öz sanbalı və nüfuzu ilə
fərqlənən bu pedaqoji mətbu orqan müstəqil dövlətimizin
milli təhsil quruculuğuna, milli mənəvi dəyərlərə
söykənən yeni təhsil sisteminin formalaşması işinə
xidmət edir.Təbii ki, yeniləşən cəmiyyətə yeni
təfəkkürlü insanlar, rasional düşüncə tərzinə malik,
demokratik ruhlu mütəxəssislər, müasir dünyagörüşünə
sahib olan gənclik olduqca gərəklidir. Bu isə, öz
növbəsində, təhsilin, ilk növbədə orta məktəb təhsilinin
həm forma, həm də məzmunca yeniləşməsini tələb edir.
Ümummilli lider Heydər Əliyevin təşəbbüsü və müəllifliyi
ilə ərsəyə gələn və 1999-cu ildən həyata keçirilən
"Təhsil sahəsində islahat Proqramı" inkişaf etmiş
demokratik cəmiyyət quruculuğunda önəmli və müstəsna
əhəmiyyət kəsb edir. Təhsil islahatlarının həyata
keçirilməsinə başlandığı ilk gündən bu işə layiqli
töhfələr verən "Azərbaycan müəllimi" qəzeti faydalı
təşəbbüsləri, qabaqcıl təcrübəni yaymaq, yenilikçi,
yaradıcı müəllimlərin iş metodlarını ümumiləşdirib
pedaqoji ictimaiyyətə çatdırmaq, ortaya çıxan
problemlərin aradan qaldırılmasına yardımçı olmaq
baxımından az iş görməyib. Respublikanın adlı-sanlı
alimləri, tanınmış təhsil işçiləri, pedaqoqlar,
müəllimlər, ziyalılar müntəzəm olaraq qəzetdə çıxış
edərək islahatın gedişinə dair öz mülahizələrini
söyləyir, müasir təhsil quruculuğunun müxtəlif
aspektlərini şərh edirlər.
"Azərbaycan müəllimi" qəzeti ulu öndər Heydər Əliyevin
zəngin və mənalı həyat yolu, çoxşaxəli fəaliyyəti
nümunəsində gənclərin tərbiyə edilməsi, onun siyasi
irsinin öyrənilməsi zəminində gənc nəslin fəal həyata
hazırlanması sahəsində əhəmiyyətli addımlar atmağa nail
olub.
Son illər ərzində ölkə Prezidenti cənab İlham Əliyevin
rəhbərliyi ilə Azərbaycan təhsilində baş vermiş köklü
dəyişikliklər, yüzlərlə yeni məktəbin və əlavə korpusun
inşa olunması, tədris ocaqlarının təchizatı
məsələlərinin keyfiyyətcə yeni mərhələyə qədəm qoyması,
təhsil müəssisələrinin qazandığı uğurlar qəzetin aparıcı
mövzularındandır. Eləcə də Heydər Əliyev Fondunun
prezidenti, YUNESKO-nun və İSESKO-nun xoşməramlı səfiri,
Milli Məclisin deputatı Mehriban xanım Əliyevanın
təhsilə göstərdiyi misilsiz qayğı, Fondun dəstəyi ilə
reallaşdırılan müvafiq layihələrin cəmiyyətdə, xüsusilə
müəllim və şagirdlər arasında doğurduğu xoş təəssürat
"Azərbaycan müəllimi" qəzetinin səhifələrində əksini
tapır, belə xeyirxah addımlar yaxşı bir örnək kimi
təqdim olunur.
 "Azərbaycan müəllimi" qəzeti ümummilli liderin dediyi
kimi, ictimai-siyasi həyatımızın bütün sahələrinə nüfuz
edib. 1981-ci ildə Azərbaycan Yazıçılar İttifaqının VII
qurultayında çıxış edən Heydər Əliyev o vaxta qədər
çoxlarının düşünməyə, dilinə gətirməyə qorxduğu, əslində
isə hər bir azərbaycanlının ürəyindən xəbər verən bir
mövzuya toxunaraq deyib: "Qanlı çar və qanlı şah rejimi
xalqımızı iki yerə parçalamışdır. Lakin torpaq birdir,
ədəbiyyat birdir...". Bundan sonra bir əsrə yaxın qələmə
alınmayan "Cənub mövzusu", "Təbriz mövzusu" yenidən
aktuallaşdı. Həmin illərdə bu çağırışa ən birinci səs
verən "Azərbaycan müəllimi" qəzeti oldu. "Cənubdan gələn
səslər" rubrikası ilə cənublu qardaşlarımızın
əsərlərindən seçmələr dərc edilir, qəzetin səhifələri
əldən-ələ gəzirdi. Bundan sonra məhz biz Cənubi
Azərbaycanın adını ucadan çəkə bildik, güneydə yaşayan
milyonlarla həmvətənimizin dərdləri, qayğıları ilə
yaxından tanış olmaq imkanı qazandıq.
"Azərbaycan müəllimi" qəzeti mütərəqqi pedaqoji
ənənələrin qorunub saxlanılmasında, elmi - pedaqoji
kadrların yetişməsində də əhəmiyyətli rol oynayıb. Bu
gün yaxın və uzaq ölkələrdə tanınan onlarca alimin ilk
qələm məhsulları məhz "Azərbaycan müəllimi"nin
səhifələrində işıq üzü görüb. Mətbu orqan həmişə əsl
ziyalıların, elm və maarif xadimlərinin tribunası
olubdur. Qəzetdə akademik Mehdi Mehdizadə, görkəmli
alimlər Əhməd Seyidzadə, Mərdan Muradxanov, Əliheydər
Həşimov, Əziz Əfəndizadə, Şövqi Ağayev, Nurəddin
Kazımov, Zahid Qaralov, Bəşir Əhmədov, Misir Mərdanov,
Əbdül Əlizadə, Yəhya Kərimov, Hüseyn Əhmədov, Əkbər
Bayramov, Əjdər Ağayev, xalq müəllimləri Zahid Şöyübov,
İsrafil Şükürov, əmək qəhrəmanları Məsmə Atakişiyeva,
Zərbəli Səmədov, Məhər Quliyev, İsa Məmmədov və
başqaları çıxış ediblər. Bu insanların müxtəlif
məsələlər haqqında fikir və mülahizələrinin geniş
ictimaiyyətə çatdırılmasında "Azərbaycan müəllimi" mühüm
rol oynayıb.
Müxtəlif illərdə qəzetə rəhbərlik etmiş Rüstəm
Hüseynovun, Ağəli Bədəlovun, Mirabbas Aslanovun, Şahin
Səfərovun, Məhəmməd Baharlının, Valeh Mirzənin və
hazırkı baş redaktor Bayram Hüseynzadənin xidmətləri və
zəhməti "Azərbaycan müəllimi"nin keçdiyi zəngin inkişaf
yolunda və qazandığı uğurlarda öz təcəssümünü tapır.
Bu gün inamla demək olar ki, qəzet müasir
jurnalistikanın bütün zəruri tələblərinə cavab verir, öz
fəaliyyətində obyektivlik, dəqiqlik, operativlik
prinsiplərinə əsaslanır. "Azərbaycan müəllimi" məzmun
zənginliyi, mövzu rəngarəngliyi sarıdan ciddi
irəliləyişə nail olub, dizayn və materialların
yerləşdirilməsi baxımından düzgün istiqamət tutmağı
bacarıb. Qəzetin İnternet saytı (muallim.edu.az) oxucu
auditoriyasının daha da genişlənməsinə, pedaqoji
maarifçilik işinin səmərəliliyinin artırılmasına müsbət
təsir göstərir. Qəzetə olan yüksək ictimai marağın
nəticəsidir ki, son illərdə "Azərbaycan müəllimi"nin
tirajı nəzərəçarpacaq dərəcədə artıb.
Qəzetin yaradıcı heyətinin peşəkarlıq səviyyəsi də xeyli
yüksəlib. Hazırda mətbu orqanında çalışan
əməkdaşlarımızdan biri "Azərbaycan Respublikasının
əməkdar jurnalisti"dir. Digər əməkdaşlarımızdan bir
neçəsi isə müxtəlif vaxtlarda Təhsil Nazirliyinin Fəxri
fərmanına layiq görülüb.
Gələn il "Azərbaycan müəllimi" qəzetinin 80 yaşı tamam
olacaq. Qəzetin kollektivi qazanılan uğurlardan
arxayınlaşmayaraq öz fəaliyyətini daha da
genişləndirməkdə və inkişaf etdirməkdədir. Kollektivin
hər bir üzvü tam məsuliyyətlə anlayır ki, müstəqil
dövlətimizin təhsil siyasətinin təbliğatçısı
funksiyasını layiqincə yerinə yetirmək olduqca şərəfli
və çətin işdir. Heç şübhə yoxdur ki, "Azərbaycan
müəllimi" qəzeti öhdəsinə düşən belə ümdə vəzifəni
layiqincə yerinə yetirməklə yanaşı, dövlətçiliyimizin
daha da möhkəmləndirilməsi işində də öz səylərini
əsirgəməyəcəkdir. Qəzetimiz öz yubiley ilində
oxucularını növbəti yenilikləri, nailiyyətləri ilə
sevindirmək əzmindədir.
Hazırladı: Samirə KƏRİMOVA |
