|
 Xalqımızın
minilliklərlə ölçülən tarixində yeni səhifə açmış
müstəqillik günü oktyabrın 18-də Bakının Xətai
rayonundakı 263 nömrəli tam orta məktəbdə maraqlı
bayram tədbiri ilə qeyd olunub. "18 oktyabr Azərbaycanın
Müstəqillik Günüdür" adlı tədbir hər bir soydaşımız üçün
qürur mənbəyi olan Dövlət bayrağının mərasimin
keçirildiyi zala gətirilməsi və Dövlət himninin sədaları
altında qaldırılması ilə başlanıb. Sonra səhnədəki
ekranda ötən əsrin 90-cı illərinin əvvəllərində
xalqımızın müstəqillik uğrunda apardığı mübarizədən bəhs
edən videoçarx nümayiş olunub.
1991-ci il avqustun 30-da Azərbaycan Respublikası Ali
Sovetinin xalqın tələbi ilə çağırılmış növbədənkənar
sessiyasında dövlət müstəqilliyini bərpa etmək haqqında
bəyannamənin, Ali Sovetin 18 oktyabr 1991-ci il tarixli
sessiyasında "Azərbaycan Respublikasının dövlət
müstəqilliyi haqqında Konstitusiya Aktı"nın qəbulundan,
həmin il dekabrın 25-də keçirilən ümumxalq
səsverməsindən ayrı-ayrı fraqmentlər diqqətə çatdırılıb.
İştirakçılar, habelə, müstəqilliyimizi möhkəmləndirmək,
dönməz və əbədi etmək naminə ümummilli liderimiz Heydər
Əliyevin rəhbərliyi altında aparılan mübarizənin qısa
xronologiyasını izləyiblər.
Sonra səhnə məktəblilərin ixtiyarına verilib.
Şagirdlərdən Aynur, Aytən, Nərmin, Tuncay, Nuran, Ebrun
və Aytac ulu öndərə həsr olunmuş şeirlər söyləyərək ona
bəslədikləri sonsuz sevgini poeziyanın təsirli dili ilə
ifadə ediblər. Bu sevgi kiçikyaşlı məktəblilər Həmidə və
Nisənin çıxışlarında da öz təsirli ifadəsini tapıb.
Aytac, Kənan, İbrahim, Nəzirə, Fatimə, Nuranə, Fidan,
Hüseyn və Elmanın ifa etdiyi şeirlərdə isə
Azərbaycanımızın füsunkar gözəllikləri vəsf olunub.
Rübabənin rəfiqələri ilə birgə oxuduğu könülaçan
mahnılar, Ceyhun, Nihad, Rəvan Yasəmən və Orxanın ifa
etdikləri rəqslər də tədbirin yaddaqalan və tamaşaçılar
tərəfindən alqışlanan nömrələrindən olub. Tədbir
iştirakçıları, habelə, İsmayılla Nuranın sazla
ifalarını, ölməz sənətkarımız Səməd Vurğunun
"Azərbaycan", "Dağlar" şeirlərini özlərinə məxsus
şirinliklə təqdim etmələrini də alqışlarla
dəyərləndiriblər.
Mərasimdə söz alan məktəbin direktoru Nəsimi Abbasov
ibtidai sinif müəllimi Yeganə Ağayevanın şagirdləri ilə
birgə hazırladığı tədbiri yüksək qiymətləndirib, onun
müstəqillik günündə pedaqojii kollektivə, məktəblilərə,
valideynlərə və qonaqlara gözəl töhfə olduğunu bildirib.
Direktor belə tədbirlərin şagirdlərin vətənpərvərlik
tərbiyəsində, onların dünyagörüşünün genişlənməsində,
fikir və düşuncələrini sərbəst ifadəetmə vərdişlərinin
inkişaf etdirilməsində əhəmiyyətini vurğulayıb.
Çıxışında məktəbin son illərdəki bəzi uğurlarına da
toxunan N.Abbasov bu il ali və orta ixtisas məktəblərinə
qəbulda tədris ocaqlarının 76 faizlik nəticə
göstərdiyini, 2012-2013-cü tədris ilində keçirilmiş "Ən
yaxşı ümumtəhsil məktəbi" müsabiqəsinin qaliblərindən
biri olduğunu, məktəbin komandasının "Xəmsə"
intellektual oyununun rayon turunda fərqləndiyini
diqqətə çatdırıb və bu uğurların qazanılmasında
müəllimlərin böyük zəhmət payı olduğunu qeyd edib.
Xətai Rayon Gənclər və İdman İdarəsinin rəisi Əfqan
Rzayev, yazıçı-publisist Rafiq İmanov şagirdlərin bayram
sevincinə qoşularaq tədbir iştirakçılarına ən xoş
arzularını bildiriblər.
Tədbirin qonaqlarından olan Şəmkir rayonu Düyərli kənd 1
nömrəli tam orta məktəbin direktoru Vaqif Məmmədov
çıxışında şagirdlərin intellektual səviyyəsinin və
vətənpərvərlik hissinin yüksək olduğunu, sabah
müstəqilliyimizin keşiyində dura biləcək belə nəslin
yetişməsindən qürur duyduğunu söyləyib və rəhbərlik
etdiyi tədris ocağı ilə 263 nömrəli tam orta məktəb
arasında dostluq əlaqələrinin qurulmasını təklif edib.
Təklif razılıqla qarşılanıb.
Tədbirin sonunda "Savalan" qəzetinin baş redaktoru Eldar
Əliyev ötən tədris ilində təhsildə qazandığı uğurlara
görə 263 nömrəli tam orta məktəbin kollektivinə,
çoxillik səmərəli fəaliyyətinə və anadan olmasının 65
illiyi münasibəti ilə Şəmkir rayonu Düyərli kənd 1
nömrəli tam orta məktəbin direktoru Vaqif Məmmədova
Azərbaycan Gənclər İttifaqının fəxri fərmanlarını təqdim
edib.
Yusif ƏLİYEV |
