|
 Müəllim
ömrünü haqlı olaraq şama bənzədirlər. O şam əridikcə
yüzlərlə, minlərlə ürəkdə, beyində bilik və savad şöləsi
yandırır. Müəllim müqəddəs yol yolçusudur, o, bu
günümüzü və gələcəyimizi düşünür, mənalı ömründən
şagirdlərinə təmənnasız pay verir. Müəllim vətəninə,
xalqına, ailəsinə, bütövlükdə cəmiyyətə layiq olan
vətəndaş yetişdirir. O müəllim xoşbəxtdir ki, öz ecazkar
varlığı ilə şagird yaddaşına əbədi həkk olunur.
Bu gün dövlət tərəfindən təhsil işçilərinə göstərilən
diqqət və qayğı müəllimlərin yaradıcılıq imkanlarını
genişləndirib. İndi respublikamızda öz elmi-nəzəri
biliyi, pedaqoji ustalığı, metodiki hazırlığı,
ictimaiyyət içərisində dərin nüfuzu ilə seçilən yüzlərlə
qabaqcıl müəllim çalışır. Onlardan biri də Siyəzən
şəhər Ş.İsmayılov adına 3 nömrəli tam orta məktəbin
təlim-tərbiyə işləri üzrə direktor müavini Səmayə
Hüseynovadır.
Səmayə Ağanəzər qızı Hüseynova 1953-cü ildə oktyabrın
17-də Siyəzəndə anadan olub. 1960-cı ildə öz ənənələri
olan, yüksək təhsil nəticələri ilə nəinki rayonda, eyni
zamanda regionda tanınan Siyəzən şəhər M.Müşfiq adına 2
nömrəli tam orta məktəbin I sinfinə qəbul olunub. Məktəb
illərində gələcəkdə tarixçi ixtisasına yiyələnməyi
qarşısına məqsəd qoyub və bu arzu ilə də o, 1970-ci
ildə orta məktəbi bitirərək həmin il Azərbaycan Dövlət
Pedaqoji İnstitutunun tarix fakültəsinə daxil olub. Ali
məktəbdə fəallığı ilə seçilən S.Hüseynova müəllimlərinin
və tələbə yoldaşlarının rəğbətini qazanıb, dəfələrlə
rektorluğun və dekanlığın təşəkkürlərini alıb.
1974-cü ildə ali təhsilini başa vuraraq pedaqoji
fəaliyyətə başlayan Səmayə Hüseynova bir neçə il
Siyəzən şəhər 2 nömrəli əsas məktəbdə ixtisası üzrə
müəllim işləyib. Pedaqoji işə sonsuz məhəbbəti və
təşkilatçılıq qabiliyyəti nəzərə alınaraq o, 1979-cu
ildə həmin məktəbə təlim-tərbiyə işləri üzrə direktor
müavini təyin edilib. Təşkilatçılıq bacarığı, məsələlərə
çevik yanaşma və obyektiv qiymət vermək qabiliyyəti
dəyərləndirilərək o, 1989-cu ildə rəhbər orqanlarda
(keçmiş rayon partiya komitəsində) işə dəvət olunub. Və
burada iki il çalışıb. Ona dəfələrlə müxtəlif vəzifələr
təklif olunsa da məktəbdə işləməyi, şagirdlərə tarixi,
xüsusilə Azərbaycan tarixini öyrətməyi üstün tutub.
Səmayə müəllim 1991-ci ildən Siyəzən şəhərində ilk
təhsil ocağı olan 3 nömrəli tam orta məktəbdə direktor
müavini vəzifəsində çalışır. Bu illər ərzində həm özünə,
həm də müəllimlərə və şagirdlərə tələbkarlıqla yanaşaraq
təlimin və tədrisin keyfiyyətinin yüksəldilməsi üçün
ardıcıl iş aparır. Müxtəlif mövzulara həsr olunmuş
elmi-təcrübi konfranslarda, seminarlarda, şura
iclaslarında çıxışları daim maraqla qarşılanıb. O, rayon
ümumtəhsil məktəblərinin təlim-tərbiyə işləri üzrə
direktor müavinlərinin dayaq məntəqəsinin rəhbəri olaraq
təhsil sahəsində aparılan islahatlara, yeni təhsil
proqramı (kurikulum) ilə işin əsas xüsusiyyətlərinə
həsr olunan "dəyirmi masa"lar təşkil edib, fikir
mübadiləsi aparıb. Müəllimlərin yaxın dostu və
məsləhətçisi olan Səmayə müəllim eyni zamanda bir neçə
ildir ki, AMİ-nin Sumqayıt filialının Siyəzəndə təşkil
etdiyi aylıq kurslarda təlimçi-müəllim kimi tarix
fənninin tədrisinin müasir problemlərini həmkarlarına
çatdırır. Respublika Təhsil Şurasının üzvüdür. Səmayə
müəllim bacarıqlı pedaqoq olmaqla yanaşı, həm də səmimi
bir insandır. Azərbaycan müəllimlərinin XI və XII,
Azərbaycan qadınlarının II, III və IV qurultaylarının
nümayəndəsi olan Səmayə müəllim 2007-ci ili həyatının ən
uğurlu və unudulmaz ili hesab edir. Həmin il Beynəlxalq
Müəllimlər Günü ərəfəsində möhtərəm cənab Prezident
İlham Əliyevin müvafiq sərəncamı ilə "Əməkdar müəllim"
fəxri adına layiq görülüb. Səmayə Hüseynova bu fəxri
adın həm şərəfli, həm də məsuliyyətli olduğunu söyləyir
və daha əzmlə, yorulmadan pedaqoji fəaliyyətini davam
etdirəcəyini deyir.
Səmayə müəllimi yubiley münasibətilə təbrik edir, ona
cansağlığı, çətin və məsuliyyətli, eyni zamanda şərəfli
pedaqoji fəaliyyətində yeni-yeni uğurlar arzulayırıq.
Cəfər BAĞIROV,
Siyəzən Rayon Təhsil Şöbəsi metodkabinetinin direktoru,
respublikanın əməkdar müəllimi |
