Oktyabrın 24-də Azərbaycan Respublikasının Prezidenti
cənab İlham Əliyev "Azərbaycan təhsilinin inkişafı üzrə
Dövlət Strategiyasının təsdiq olunması haqqında"
sərəncam imzalamışdır.
"Azərbaycan təhsilinin inkişafı üzrə Dövlət
Strategiyası" təhsil islahatlarının daha sistemli
aparılması və ölkənin inkişafına daha yüksək töhfələr
vermək istiqamətində düşünülmüş konseptual bir sənəddir.
Ölkə Prezidenti cənab İlham Əliyevin sərəncamı ilə qəbul
olunmuş Dövlət Strategiyası Azərbaycanda təhsil
islahatlarının keyfiyyətcə yeni mərhələyə keçidinə zəmin
yaradacaqdır.
Qeyd olunan sənəd "təhsil yeni çağırışlara necə cavab
verməlidir" sualına adekvat cavab axtarır. Deməli, yeni
strategiya bizə təhsil sahəsində indiyədək mövcud olan
vəziyyəti qiymətləndirməyə və qarşımızda duran yeni
hədəfləri müəyyənləşdirməyə imkan verəcəkdir. Dövlət
Strategiyası sənədi cəmiyyətin bütün spektrini və
fəaliyyət sahəsini - təhsilverəndən təhsilalanadək,
valideyndən təhsili idarə edənədək, infrastrukturdan
maliyyə mexanizminədək əhatə edir. Bu əhatə çevrəsi həm
də Azərbaycanın gələcək inkişafının davamlı xarakter
alması üçün peşəkar bilik və bacarıqlara yiyələnən və
rəqabətə qabil insan qaynaqlarının yetişdirilməsi
missiyasına xidmət edir.
Yeni əsrin yeni çağırışları bunu bizdən tələb edir.
Digər tərəfdən, bu strategiya Azərbaycanın gələcək
inkişaf hədəflərinin təhsil, innovasiya ilə bağlı
olduğunu göstərir. Eyni zamanda zamanın sürətini
ölçməyə, dünyanın çox sərt inkişaf qanunlarını dərk
etməyə və qüvvə balansımızı hesablamağa imkan verir.
Bu strategiyada biz biliklər cəmiyyətinin, kreativ
təhsil düşüncəsinin, hədəfləri ölçə bilən bitkin
fəaliyyət çərçivəsinin və yeni təhsil fəlsəfəsinin ana
xətlərini görə bilərik. Burada əsas ehtiva olunan dəyər
odur ki, təhsil Azərbaycanın strateji platformasıdır.
Təbii ki, qarşıya qoyulan məqsədlərə çatmaq böyük
əzmkarlıq və inam tələb edir. Bu yol heç də asan yol
deyil. Bəzən çox çətin və zəruri olan bu missiya
cəmiyyətin insan kapitalının inkişafına səbəb olur ki,
bu da sonda ölkəmizin dünyanın aparıcı ölkələri sırasına
çıxması üçün əsaslı zəmin yaradacaqdır.
"Azərbaycan təhsilinin inkişafı üzrə Dövlət
Strategiyası" Azərbaycanın təhsil ictimaiyyətinin çoxdan
gözlədiyi və inkişafın yeni xəttinə təkan verəcək yol
xəritəsidir. Qeyd olunan sənəd Azərbaycanın təhsil
sisteminin milli ruhda və dünyanın aparıcı ölkələrinin
təhsil sistemlərinin ən yaxşı örnəklərindən əxz olunan
yeni məzmun və forma istiqamətlərində inkişafını təmin
edəcəkdir. |