Oktyabrın
25-də Azərbaycan Müəllimlər İnstitutunun (AMİ)
təşkilatçılığı ilə "Tarixi-mədəni irsin tədqiqi,
tədrisi, təbliği, mühafizəsi və diyarşünaslıq işinin
təşkilində təhsil müəssisələrinin rolu" mövzusunda
respublika elmi konfransı keçirilib. Konfrans
iştirakçıları öncə institutun nəzdində fəaliyyət
göstərən Heydər Əliyev Mərkəzini ziyarət edib, ulu
öndərin büstü önünə əklil qoyublar. Daha sonra
konfransın plenar iclası keçirilib.
AMİ-nin rektoru, Milli Məclisin deputatı, professor
Aqiyə Naxçıvanlı giriş sözündə ölkəmizdə tarix və
mədəniyyət abidələrinin qorunmasına və tədqiq olunmasına
xüsusi diqqət və qayğının göstərilməsindən söz açıb.
Rektor A.Naxçıvanlı bildirib ki, müstəqil Azərbaycan
dövləti xalqımıza məxsus tarixi-mədəni dəyərlərin
mühafizəsinə, tədqiqinə, tədrisinə və təbliğinə çox
böyük önəm verir. Elmi-mədəni əhəmiyyətə malik tarixi
abidələrimiz dərindən öyrənilir, qədim yaşayış
məskənlərində arxeoloji qazıntılar, bərpa və
konservasiya işləri aparılır. Biz dünya xalqlarının
mədəniyyət xəzinəsinə tarixi-mədəni irsimizi öyrənməklə
qovuşuruq. Bu sənət nümunələri həm də estetik tərbiyə
vasitəsidir. Ümummilli lider Heydər Əliyev mənəvi
irsimizin bədii-estetik təsir gücünə əsaslanaraq
demişdir: "Estetik təsir vasitələrindən fəal və geniş
istifadə olunması ideya-tərbiyə işinin dairəsini
genişləndirir, yüksək bədii zövqlər və meyarlar
yaradır".
Rektor
qeyd edib ki, konfransın keçirilməsində məqsəd
Azərbaycan ərazisindəki çoxsaylı tarix və mədəniyyət
abidələrinin mövcud vəziyyəti, onların tədqiqi, tədrisi,
təbliği və mühafizəsində aidiyyəti qurumların, xüsusən
də təhsil müəssisələrinin, bütövlükdə geniş
ictimaiyyətin iştirakı məsələlərinə işıq salınması,
beləliklə də yetişməkdə olan nəslin Vətənə,
tarixi-mədəni dəyərlərə məhəbbət ruhunda tərbiyə
olunmasına dair elmi tədqiqatları təşviq etməkdir.
A.Naxçıvanlı vurğulayıb ki, Azərbaycanın müxtəlif şəhər
və rayonlarından olan ali, orta ixtisas, orta
məktəblərdən, elmi müəssisə və institutlardan, elmi,
eləcə də ictimai mərkəz və birliklərdən daxil olmuş
60-dan çox məruzə konfransın proqramına daxil edilib və
konfransda yerli elm və təhsil müəssisələrinin
mütəxəssisləri ilə yanaşı, Türkiyə, İtaliya və İspaniya
alimləri də iştirak edir.
Akademik Teymur Bünyadov, Təhsil Nazirliyinin
nümayəndəsi Kamil Məcidov, Mədəniyyət və Turizm
Nazirliyinin sektor müdiri Arif Əliyev və Azərbaycan
Turizm İnstitutunun rektoru, professor Cəfər Cəfərov
çıxış edərək konfransın əhəmiyyətindən danışıblar.
Bildirilib ki, son illərdə respublikamızda tarix və
mədəni irsin qorunması istiqamətində ciddi işlər
görülmüşdür. Otuzdan çox abidədə bərpa-konservasiya,
50-dən çox abidədə elmi-tədqiqat işləri aparılmış, beş
tarixi ərazidə qoruqlar yaradılmışdır. Bütün bunlar ölkə
rəhbərliyinin tarix və mədəni abidələrə diqqət və
qayğısının parlaq nümunəsidir. Heydər Əliyev Fondunun
prezidenti, YUNESKO-nun və İSESKO-nun xoşməramlı səfiri
Mehriban xanım Əliyevanın səyi və təşəbbüsü ilə
Azərbaycan muğamı, Novruz bayramı, aşıq, tar ifaçılıq
sənətləri, xalçaçılıq YUNESKO-nun maddi-mədəni irs
siyahısına daxil edilib.
İtaliyalı mütəxəssis Luici Skrinzi Azərbaycanın qədim və
tarixi əhəmiyyətli abidələrlə zənginliyindən, səkkiz
ildir ki, buradakı abidələrin tədqiqi və bərpası ilə
məşğul olmasından danışıb, Azərbaycanı özünün ikinci
vətəni hesab etdiyini bildirib.
Tədbirdə Azərbaycan Müəllimlər İnstitutu ictimai elmlər
kafedrasının müdiri, professor Qafar Cəbiyevin
"Müstəqillik illərində Azərbaycanda tarixi-mədəni irsin
tədqiqi, tədrisi, təbliği, mühafizəsi və diyarşünaslıq
işinin təşkili sahəsində görülən işlər və qarşıda duran
vəzifələr" mövzusunda məruzəsi dinlənilib.
Sonra konfrans işini "Tarixi-mədəni irsin tədqiqi,
təbliği və mühafizəsi" və "Tarixi-mədəni irsin tədrisi
və diyarşünaslıq işinin təşkili" adlı bölmələrdə davam
etdirib.
Oktyabrın 26-da müvafiq bölmə iclaslarında müzakirələr
davam etdirilib və konfransa yekun vurulub. Yekun
iclasda bölmə sədrlərinin hesabatları dinlənilib,
məruzələrin aktuallığından danışılıb, müəyyən təkliflər
irəli sürülüb, respublika konfransının materiallarının
toplu şəklində dərc ediləcəyi bildirilib.
Konfransın Təşkilat Komitəsi |