Oktyabrın
31-də Milli Konservatoriyanın tərkibində Respublika
İncəsənət Gimnaziyasında Kurikulum Mərkəzinin açılışı
oldu. Tədbirdə Azərbaycan Respublikası Təhsil
Nazirliyinin Təhsil Problemləri İnstitutunun direktoru
Qulu Novruzov, institutun direktor müavini, Kurikulum
Mərkəzinin direktoru Ənvər Abbasov, Təhsil Nazirliyi
Təhsil Sektorunun İnkişafı üzrə İkinci Layihənin LƏQ
məsləhətçisi, əməkdar müəllim Almaz Həsrət və
gimnaziyanın pedaqoji kollektivi, KİV nümayəndələri
iştirak edirdilər.
Tədbiri giriş sözü ilə İncəsənət Gimnaziyasının
direktoru Maya Şabanbəyova açaraq bildirdi ki, təhsildə
həyata keçirilən islahat proqramı ilə əlaqədar bütün
pedaqoji kollektiv kurikulum kurslarının təlimlərindən
keçib. Gimnaziyada bu işləri ardıcıl olaraq davam
etdirmək üçün müəyyən bir qurumun olmasına ehtiyac
yaranmışdı. Ona görə də bu ehtiyacı nəzərə alaraq
gimnaziyada Kurikulum Mərkəzi yaratmağı qərara aldıq.
Sonra müəllimlər hazırladıqları təqdimatları nümayiş
etdirdilər. İlk olaraq gimnaziyanın bu il "Ən yaxşı
müəllim" müsabiqəsinin qalibi olan, ibtidai siniflər
üzrə metodist Təranə Əliyeva təqdimatla çıxış etdi. O,
gimnaziyanın yaranma tarixi, dünəni və bu günü barəsində
məlumat verdi. İncəsənət Gimnaziyasının beynəlxalq
əlaqələri, uğur və nailiyyətləri barədə də danışdı.
Müəllimlər yeni təlim proqramlarının (kurikulumların)
tətbiqi ilə bağlı hazırladıqları nümunəvi dərslərini
qonaqlara təqdim etdilər. Onlar bildirdilər ki, xüsusi
qabiliyyət tələb olunan incəsənət yönümlü təhsil
müəssisələri üçün standartlar hələ hazırlanmayıb. Lakin
mövcud ümumtəhsil proqramlarından (kurikulumlardan)
istifadə etməklə işimizi nizamlayırıq.
Təqdimatlardan sonra Kurikulum Mərkəzinin direktoru
Ənvər Abbasov müəllimlərin fəaliyyəti haqqında
tövsiyələrini, məsləhətlərini verdi. Müəllimlərin yeni
təlim proqramlarına (kurikulumlara) olan münasibətləri,
onların dərslərində tətbiqi yüksək qiymətləndirildi.
Sonra çıxış edən Təhsil Problemləri İnstitutunun
direktoru Qulu Novruzov İncəsənət Gimnaziyasında
Kurikulum Mərkəzinin yaradılmasını təqdirəlayiq hal kimi
dəyərləndirdi. Gimnaziyanın pedaqoji kollektivinə
uğurlar, yeni-yeni nailiyyətlər arzuladı.
Hicran ƏKBƏROVA |