Bu
münasibətlə Mahnı Teatrında yubiley mərasimi keçirildi
Hamı bilməsə də, ölkənin musiqi ictimaiyyətinə yaxşı
məlumdur ki, söhbət qarmonun virtuoz ifaçısı, bu
günlərdə yetmiş yaşı tamam olmuş qüdrətli sənətkar,
tanınmış musiqi xadimi, pedaqoq, bəstəkar, respublikanın
əməkdar artisti Zakir Mirzəyevdən gedir. "Qarmonun
Paqaninisi" adını isə ona maestro Niyazi təkrarsız
ifasından vəcdə gələrək verib və bununla da Zakir
Mirzəyev sənətinin, ifaçılığının unikallığına öz möhrünü
vurub. Zakir müəllim də 70 illik həyatı və təxminən 55
illik fəaliyyəti dövründə bu adı doğruldub, mahir ifası
ilə minlərin, milyonların ürəyinə, hiss və duyğularına
hakim kəsilib. Və beləcə gəlib ömrün 70 zirvəsinə çatıb.
Böyük sənətkarın 70 illik yubileyi ötən hətənin çərşənbə
günü ölməz müğənni Rəşid Behbudovun adını daşıyan Mahnı
Teatrında qeyd olundu. Ustad ifaçının uzun illər
işlədiyi Azərbaycan Milli Konservatoriyası nəzdində
Musiqi Kollecinin təşəbbüsü və təşkilatçılığı ilə baş
tutan tədbirdə ölkənin tanınmış mədəniyyət xadimləri,
musiqi ictimaiyyətinin nümayəndələri, yubilyarın hazırda
dərs dediyi Azərbaycan Dövlət Mədəniyyət və İncəsənət
Universitetinin və Musiqi Kollecinin professor-müəllim
heyətinin üzvləri, qohumları, KİV təmsilçiləri iştirak
edirdilər.
Yubiley mərasiminin aparıcısı, ADMİU-nun müəllimi,
əməkdar artist Ağalar Bayramov Z.Mirzəyev işığına
toplaşanları salamlayıb bir çox sənət xadiminin
yubileylərinin keçirildiyi Mahnı Teatrının növbəti belə
bir tədbirə ev sahibliyi etdiyini söylədi və Zakir
Mirzəyevi anadan olmasının 70 illiyi münasibətilə təbrik
etdi. Musiqini əsrarəngiz dünya adlandıran A.Bayramov
Zakir Mirzəyevin onun ətrafına pərvanə kimi dolanan
sənətkarlardan biri olduğunu diqqətə çatdırdı və
istedadlı şairimiz Tofiq Bayramın vaxtilə Z.Mirzəyev
haqqında yazdığı şeiri yüksək sənətkarlıqla ifa etməklə
yubilyara olan sevgilərini bir daha nümayiş etdirdi.
Çıxışında Z.Mirzəyevin ömür yoluna toxunan A.Bayramov
onun 1943-cü ildə Bakıda Cənubi Azərbaycandan gəlmiş
musiqiçi ailəsində anadan olduğunu, yeniyetməlik və ilk
gənclik çağından özünü musiqiyə həsr etdiyini və
tezliklə mahir qarmon ifaçısı kimi tanındığını diqqətə
çatdırdı.
Sonra Zakir Mirzəyevin tələbələri - qarmonçalanlardan
ibarət ansambl onun bəstələdiyi "Rəhimi" və "Arifi"
rəqslərini ifa etməklə öz müəllimlərinə salam və
təbriklərini çatdırdılar.
Çıxışların və musiqi nömrələrinin bir-birini əvəzlədiyi
yubiley mərasimində yubilyara çoxlu təbriklər
ünvanlandı. İlk çıxış edən Azərbaycan Milli
Konservatoriyasının rektoru, professor Siyavuş Kərimi
Zakir Mirzəyevin Azərbaycan milli musiqi sənətində
özünəməxsus yeri olduğunu bildirdi. Qeyd etdi ki,
Azərbaycan musiqisində qarmonun çox mahir ifaçıları
olub. Zakir müəllim həmin ifaçıların ön sıralarında
gedən bir sənətkardır. Təsadüfi deyildir ki, ölməz
maestro Niyazi onu məşhur italyan ifaçısı Paqanini ilə
müqayisə edib. Z.Mirzəyev həqiqətən Paqanini səviyyəli
virtuoz ifaçılardandır. O öz çalğı üslubunda hərdən
ekssentrik məharətini nümayiş etdirərək istər sağ,
istərsə də sol əli ilə qarmonu çox gözəl çalır. Gərək
aləti o qədər sevəsən ki, onun belə mahir ifaçısına
çevriləsən.
S.Kərimi diqqətə çatdırdı ki, qarmon Azərbaycanın musiqi
aləti olmasa da Zakir Mirzəyev kimi sənətkarların
hesabına Azərbaycan musiqi alətinə çevrilərək xalqımızın
qanına hopub. Elə bir toy və ya digər musiqi məclisi
təsəvvür etmək olmaz ki, qarmonsuz keçsin.
Zakir Mirzəyevi çoxdan tanıdığını söyləyən rektor onun
öz zəhməti, öz əziyyəti ilə xalqın sevimli sənətkarına
çevrildiyini bildirdi. O habelə Zakir Mirzəyevi mahir
pedaqoq kimi səciyyələndirib tələbələrinin yubiley
tədbirindəki məharətli çıxışlarını fikrinə sübut kimi
gətirdi. Qeyd etdi ki, Zakir Mirzəyev qarmonu yüksək
səviyyədə tədris etməklə onun gələcəyini gənc ifaçıların
simasında təmin edir.
Azərbaycan Respublikasının xalq artisti, tanınmış
xanəndə Əlibaba Məmmədov təbrik çıxışında Zakir
Mirzəyevin gözəl ifaçı, mahir muğam bilicisi, istedadlı
bəstəkar, pedaqoq və insan olduğunu, muğamlarımızı
qarmonda yüksək səviyyədə ifa edə bilən az-az
sənətkarlardan biri sayıldığını söylədi. Gənclik
illərində onunla bağlı xatirələrdən söz açdı.
Z.Mirzəyevi daha sonra akademik Vasim Məmmədəliyev
təbrik edərək bildirdi ki, Zakirin sənəti böyük sənətdir
və sənət nə qədər böyükdürsə onu təmsil edən sənətkardan
danışmaq da o qədər xoşdur. Zakir həqiqətən də bizim
qarmon ifaçıları arasında çox nadir sənətkarlardandır.
Məhz Teyyub Dəmirov, Abutalıb, Əhəd, Zakir kimi qarmon
ifaçılarının zəhmətləri, apardıqları təkmilləşdirmələr
sayəsində qarmonu biz indi milli musiqi alətlərindən
ayıra bilmirik. Qarmonla muğam çalmağın çətin olduğunu,
hər qarmonçalanın bunu bacarmadığını, yalnız bəzi
sənətkarların muğamlarımızı bu alətdə məharətlə ifa
etdiyini diqqətə çatdıran V.Məmmədəliyev Zakirin də
muğamlarımızı, hətta bu alətdə ifası çox çətin olan Orta
Mahuru belə mükəmməl çaldığını söylədi.
Akademik V.Məmmədəliyev Zakir Mirzəyevin bir tədqiqatçı
kimi də səmərəli fəaliyyət göstərdiyini qeyd edib, onun
sənətşünaslıq üzrə fəlsəfə doktoru olduğunu, bu adı
almaq üçün yazdığı dissertasiya işinin müdafiəsində
özünün də iştirak etdiyini söylədi.
Akademik həm də yubilyarın müğənnilərimizi,
xanəndələrimizi qarmonda çox məharətlə müşayiət
etdiyini, bəstəkar əsərlərini ustalıqla səsləndirdiyini,
özündən əvvəlki ustadların ənənələrini davam etdirib
yaşatdığını, notu çox gözəl bildiyini söyləyərək onun
həm ifaçı, həm pedaqoq, həm də bir insan, şəxsiyyət kimi
keyfiyyətlərini yüksək qiymətləndirdi.
Azərbaycan Milli Konservatoriyası nəzdində Musiqi
Kollecinin III kurs tələbəsi, Xan Şuşinski müsabiqəsinin
qalibi Rəhilə Məhərrəmovanın tarda ifa etdiyi musiqi
nömrəsi böyük sənətkara layiqli yubiley hədiyyəsi olub
iştirakçılar tərəfindən alqışlarla qarşılandı. Onun
ifasından sonra yubilyarı təbrik üçün dəvət olunan
Musiqi Kollecinin direktoru, əməkdar incəsənət xadimi,
professor Nazim Kazımov çıxışına elə tələbələrinin
yüksək səviyyəli ifasını qeyd etməklə, bu nömrənin
mərasimin proqramına təsadüfən salınmadığını,
istedadların üzə çıxması üçün böyük səhnənin ən yaxşı
vasitə olduğunu bildirdi. N.Kazımov rəhbərlik etdiyi
musiqi ocağının dahi sənətkarlar yetişdirdiyini, hazırda
yubilyarın da çalışdığı kollecdə bu ənənənin davam
etdirildiyini, mərasimdə Z.Mirzəyevin əsərlərini ifa
edən onun 8 nəfər tələbəsindən ibarət qarmonçalanlar
ansamblının çıxışının buna bariz misal olduğunu diqqətə
çatdırdı.
N.Kazımov kolleclərində işləyən və ya buranın məzunu
olmuş tanınmış musiqi xadimlərinə daim xüsusi diqqət
yetirdiklərini, onların yubileylərini, yaradıcılıq
gecələrini keçirdiklərini qeyd edib Z.Mirzəyevin yubiley
mərasiminin də bu silsilədən olduğunu, onun keçirilməsi
ilə bağlı Təhsil Nazirliyinə, Mədəniyyət və Turizm
Nazirliyinə etdikləri müraciətlərə müsbət cavab
aldıqlarını deyib, verdikləri dəstəyə görə hər iki
nazirliyə minnətdarlığını bildirdi.
N.Kazımov təbrik çıxışında habelə Z.Mirzəyevin
sənətkarlıq xüsusiyyətlərindən, yüksək insani
keyfiyyətlərindən də söz açıb onun uzun illər Azərbaycan
musiqisini xarici ölkələrdə məharətlə təmsil və təbliğ
etdiyini, qarmon ifaçılığını çox yüksək səviyyəyə
qaldırdığını vurğuladı.
Yubiley mərasimində Azərbaycan Respublikasının xalq
artisti, professor Canəli Əkbərov, əməkdar incəsənət
xadimi, bəstəkar Aydın Əzimi, xalq artisti, bəstəkar
Tofiq Bakıxanov, Bakı Humanitar Kollecinin qarmon
müəllimi Əhsən Rəhmanov, xalq artisti Aftandil
İsrafilov, əməkdar jurnalist İttifaq Mirzəbəyli və
başqaları da söz alaraq Z.Mirzəyevi yubileyi münasibəti
ilə təbrik etdilər, haqqında xoş sözlər dedilər.
Tanınmış sənətçilərimiz, xalq artistləri Mələkxanım
Əyyubova, Zabit Nəbizadə, əməkdar artist Zakir Əliyev,
Teyyub Teyyuboğlu, Ehtiram Hüseynov, Babək Niftəliyev,
yubilyarın qardaşı, mahir klarnet ifaçısı Qulammirzə
Mirzəyev və başqaları yubilyara təbriklərini mərasim
boyu təqdim etdikləri musiqi nömrələri ilə çatdırdılar.
Sonda söz alan Zakir Mirzəyev Azərbaycan muğamının
inkişafına, təbliğinə, dünyada tanınmasına böyük dəstək
göstərən Azərbaycanın birinci xanımı, Heydər Əliyev
Fondunun prezidenti, Milli Məclisin deputatı Mehriban
Əliyevaya, yubiley mərasiminin təşkilatçılarına
minnətdarlığını bildirdi. Yubilyar habelə onun haqqında
xoş sözlər deyən, sənətini yüksək qiymətləndirən
çıxışçılara, ifaları ilə məclisi rövnəqləndirən
sənətkarlara, eləcə də məclisi bacarıqla idarə edən
aparıcıya da təşəkkürlərini çatdırıb, hər birinə
minnətdarlıq etdi.
Yusif ƏLİYEV |