Ölkəmizdə gənclərin yaradıcı və elmi inkişafına
hərtərəfli dövlət dəstəyi göstərilir.
Qlobal dünyanın çağırışları Azərbaycanın elmi və
innovativ təfəkkürlü intellektual gəncliyi qarşısında
da yeni tələblər qoyur.
Gənclərin intellektual və yaradıcılıq potensialının
inkişafı, onların daha geniş miqyasda intellektual
fəaliyyətə cəlb edilməsi, elm, təhsil və yeni
texnologiyalara marağının artırılması bu istiqamətdə
kompleks tədbirlərin həyata keçirilməsini tələb edir. Bu
məqsədlə Azərbaycan Milli Elmlər Akademiyası (AMEA)
gənclərin elmi potensialının artırılması, onların
müxtəlif elm sahələrində ixtira və kəşflərinin, təşəbbüs
və təkliflərinin stimullaşdırılması, layihə və
proqramların maliyyələşdirilməsi məsələlərinin yüksək
səviyyədə təşkilinə qərar verib.
AMEA Rəyasət Heyəti Mərkəzi Aparatının İctimaiyyətlə
əlaqə şöbəsindən aldığımız məlumata görə, AMEA-da
akademiyanın institut və təşkilatları tərəfindən
namizədliyi Prezident Mükafatına irəli sürülən gənc
alimlərlə görüş keçirilib.
Görüşdə Azərbaycan Milli Elmlər Akademiyasının
prezidenti, akademik Akif Əlizadə çıxış edərək dövlət
tərəfindən gənclərə xüsusi diqqət və qayğı
göstərildiyini diqqətə çatdırıb. AMEA-nın prezidenti
gənclərə xatırladıb ki, mükafat ölkə Prezidenti İlham
Əliyevin 2 iyul 2013-cü il tarixli fərmanı ilə təsis
edilib. Məqsəd elm, mədəniyyət, ədəbiyyat, incəsənət,
təhsil və ictimai sahələrdə fərqlənən istedadlı
gənclərin fəaliyyətlərinin qiymətləndirilməsidir.
Mükafat 10 min manat, diplom, mükafatın nişanı və
vəsiqəsindən ibarətdir. Fərmanın icrasını təmin etmək
məqsədi ilə iyul ayının 29-da AMEA-nın Rəyasət Heyətinin
sərəncamı ilə mükafata namizədliyi təqdim olunacaq gənc
alimlərin müəyyənləşdirilməsi üzrə ekspert komissiyası
yaradılıb.
AMEA-nın akademik-katibi, müxbir üzvü Rasim Əliquliyev
çıxış edərək bildirib ki, akademiyanın elmi-tədqiqat
müəssisələri tərəfindən 38 gənc alimin namizədliyi
təklif olunub. Təkliflər AMEA-nın bölmə bürolarında
müzakirə edilib. Ekspert komissiyasına təklif üçün 24
nəfər seçilib. Onlardan 3 gənc alimin namizədliyi
2013-cü il noyabrın 20-dək AMEA-nın Rəyasət Heyətinə
təqdim ediləcək.
Sonda 24 gənc alim qazandıqları elmi nailiyyətləri
barədə ekspert komissiyası qarşısında çıxış ediblər.
Qeyd edək ki, AMEA-nın Direktorlar Şurasının noyabrın
12-də keçirilən iclasında çıxış edən akademiyanın
prezidenti, akademik Akif Əlizadə bir daha Prezident
İlham Əliyevin gənclərə dəstək məqsədilə verdiyi mühüm
və əlamətdar qərarlardan biri olan gənclər üçün
Prezident Mükafatının ölkə elminin inkişafına ayrılan
diqqətin göstəricisi olduğunu bildirib. A.Əlizadə AMEA
tərəfindən bu mükafat üçün namizədliyi irəli sürülən
gənc kadrların elmi fəaliyyətlərini yüksək
qiymətləndirib.
Oruc MUSTAFAYEV,
"Azərbaycan müəllimi" |