Bakıda Azərbaycan Dövlət Neft Akademiyası (ADNA) və
Təhsil Nazirliyinin birgə təşkilatçılığı ilə ADNA
tələbələrinin akademik Azad Mirzəcanzadənin 85 illik
yubileyinə həsr olunmuş 62-ci elmi-texniki konfransı
keçirilir.
AzərTAc xəbər verir ki, tədbirin keçirilməsində əsas
məqsəd bakalavr və magistratura səviyyəsində elmi
yaradıcılıqla məşğul olan gənclərin tədqiqat işlərinin
nəticələrini müzakirə etmək, onlar arasında informasiya
mübadiləsini təşkil etmək, elmə olan maraqlarını
artırmaqdır.
Öncə tədbir iştirakçıları alimin elmi-pedaqoji
fəaliyyətini əks etdirən məlumat guşəsi ilə tanış
olmuşlar.
Tədbirdə çıxış edən akademiyanın rektoru, akademik
Siyavuş Qarayev bildirmişdir ki, Azərbaycan son illər
dinamik addımlarla irəliləyir, beynəlxalq miqyasda
tədbirlər keçirməklə böyük uğurlara imza atmışdır.
S.Qarayev bu yaxınlarda keçirilmiş III Bakı Beynəlxalq
Humanitar Forumunun buna əyani misal olduğunu qeyd
etmişdir. ADNA-nın məzunu, görkəmli alim və pedaqoq,
ictimai xadim Azad Mirzəcanzadənin elmi fəaliyyətini
dəyərləndirən rektor akademikin yüksək ixtisaslı
kadrların hazırlanması sahəsindəki fəaliyyətindən
danışmışdır. S.Qarayev alimin rəhbərliyi altında dərin
biliklərə malik, innovativ təfəkkürlü, peşəkar
mütəxəssis ordusu yetişdirildiyini, ölkə
iqtisadiyyatının inkişafı üçün güclü elmi potensialın
formalaşdığını söyləmişdir.
Azərbaycan Prezidenti İlham Əliyevin sərəncamı ilə
2013-cü ilin ölkədə "İnformasiya-kommunikasiya ili" elan
olunduğunu qeyd edən S.Qarayev bu istiqamətdə
akademiyanın İnformasiya-kommunikasiya Mərkəzinin
fəaliyyətindən bəhs etmişdir.
Tədbirdə çıxış edən AMEA-nın akademik-katibi, AMEA
İnformasiya Texnologiyaları İnstitutunun direktoru Rasim
Əliquliyev konfransın Ümumdünya Elm Günü həftəsinə
təsadüf etdiyini qeyd edərək bildirmişdir ki,
informasiya əsrində bütün inkişaf etmiş ölkələrdə
iqtisadiyyatın, cəmiyyətin inkişafının əsasını elmi
fəaliyyət, texnologiyalar təşkil edir. Cari ilin ölkədə
"İKT ili" kimi qeyd olunduğunu bildirən R.Əliquliyev
hələ 2003-cü ildə ümummilli lider Heydər Əliyev
tərəfindən Azərbaycanda informasiya cəmiyyətinin
qurulması məqsədinə xidmət edən "Azərbaycan
Respublikasının inkişafı naminə İKT üzrə Milli
Strategiya"nın qəbul edildiyini söyləmişdir. Alim bu 10
il ərzində ölkədə informasiya texnologiyalarının geniş
tətbiqi sayəsində böyük nailiyyətlərin əldə olunduğunu
bildirərək bu uğurlarda daha çox gənclərin, tələbələrin
payı olduğunu vurğulamışdır.
Ölkədə yaxın gələcəyin inkişaf hədəflərini əks etdirən
"Azərbaycan 2020: gələcəyə baxış" İnkişaf
Konsepsiyasının əhəmiyyətindən danışan R.Əliquliyev qeyd
etmişdir ki, elm və təhsildə innovativ inkişaf əldə
etmək, müxtəlif fəaliyyət sahələrində İKT-nin tətbiqini
genişləndirmək, biliklər iqtisadiyyatını formalaşdırmaq
əsas hədəflərdəndir.
Çıxışının sonunda R.Əliquliyev gəncləri biliklər
cəmiyyətinin formalaşması işində yaxından iştirak etməyə
çağırmışdır.
Tədbirdə həmçinin Müdafiə Sənayesi Nazirliyinin Milli
Aerokosmik Agentliyinin baş direktoru, professor Alçın
Şirinzadə, ADNA-nın geoloji kəşfiyyat fakültəsinin
dekanı, dosent Mais Babayev, iqtisadiyyat, beynəlxalq
iqtisadi münasibətlər və menecment fakültəsinin dekanı
Azad Əliyev, Tələbə Elmi Cəmiyyətləri Şurasının sədri,
professor Kamil Aydazadə və digərləri çıxış edərək
akademik Azad Mirzəcanzadənin Azərbaycan elminin
inkişafındakı mühüm xidmətlərindən, elmi-pedaqoji
fəaliyyətindən ətraflı danışmışlar. |