|
 Naxçıvan
Özəl Universitetinin tarix ixtisası üzrə I kurs
tələbələrinin Naxçıvan Dövlət Tarix Muzeyinə
ekskursiyası təşkil edilib. Muzeyin direktoru, Naxçıvan
Muxtar Respublikasının əməkdar mədəniyyət işçisi Nizami
Rəhimov muzey ekspozisiya zalında nümayiş olunan
eksponatlar barədə tələbələri ətraflı məlumatlandırıb.
Qeyd olunub ki, Naxçıvan Dövlət Tarix Muzeyinin
ekspozisiyası 3 dövrü - qədim, orta əsrlər və müasir
dövrü əhatə edir. 2 mərtəbədən ibarət olan və 900
kvadratmetr sahəni əhatə edən muzey ekspozisiyasında
2500-dən artıq eksponat nümayiş etdirilir. Bütün
eksponatlarda ilk insanların yaşadığı dövrdən başlamış
bu günə qədər olan tarix əks olunub.
Muzeydə özünə yer alan qədim tarixi dövrdə arxeoloji
materiallar, epiqrafik abidələr, daş alətlər və digər
maraqlı eksponatlar qorunub saxlanılır. Bundan başqa,
xalça və xalça məmulatları, misgərlik, orta əsrlərə aid
mis, gümüşdən hazırlanmış ziynət əşyaları, rəsm əsərləri
muzeydə nümayiş etdirilən maraqlı eksponatlardandır. Onu
da qeyd edək ki, muzeydə ulu öndər Heydər Əliyevin həyat
və fəaliyyətindən bəhs edən yüzlərlə eksponat nümayiş
etdirilir.
Muzey ekspozisiyası qədim diyarın bu günü ilə bağlı
"Yeniləşən Naxçıvan" adlı sərgiylə başa çatır. Həmin
sərgidə muxtar respublikamızın son illər əldə etdiyi
uğurlar geniş əks olunub. Muzey ekspozisiyası ilə
tanışlıqdan sonra tələbələr arasında Naxçıvan tarixi
haqqında diskussiya aparılıb.
Nuray ƏSGƏROVA |
