|
 Bu
ilin iyulunda ölkənin müxtəlif bölgələrində imkansız
ailələrin övladlarına yönəlik 8 günərzi mərkəzi pilot
layihə olaraq fəaliyyətə başlayıb. Bölgələrin həm
ictimai həyatında, həm də sosial sferasında mühüm rol
oynayan layihə dekabrın 31-dək Astara rayonunda həyata
keçiriləcək. Layihə çərçivəsində 12 yaşadək çətin həyat
şəraiti olan uşaqlara Günərzi Qayğı Mərkəzində həm maddi,
həm də mənəvi yardım göstərilir.
Günərzi Qayğı Mərkəzində məktəbəqədər və məktəbyaşlı
uşaqlardan ibarət iki qrup formalaşdırılıb. Günərzi
Qayğı Mərkəzində uşaqların yaş və psixoloji
xüsusiyyətlərinə uyğun təlim-tərbiyə prosesi təşkil
edilir. Risk qrupuna aid olan uşaqların ahəngdar
inkişafını və tərbiyəsini təmin etmək məqsədilə müxtəlif
təlimlər həyata keçirilir.
Günərzi Qayğı Mərkəzində uşaqlar rahat yataq otaqları,
tədris kabinetləri, oyun zalı ilə təmin ediliblər.
Burada uşaqlar gündə 3 dəfə yeməklə qidalanırlar.
Mərkəzdə kompüter dərnəyi vasitəsi ilə uşaqlara müasir
dövrün yeni texnologiyasından istifadə qaydaları
öyrədilir. İngilis dili mütəxəssisi Kəmalə Nəsirovanın
könüllü olaraq apardığı dərnəkdə isə həftədə iki dəfə
olmaqla ən kiçikyaşlı uşaqlara ilkin dil vərdişləri
öyrədilir. Mərkəzdə psixoloq tərəfindən psixoloji
testlər, pedaqoq və tərbiyəçi müəllim tərəfindən
müxtəlif dərslər, təlimlər, musiqi dərsləri,
festivalları, idman yarışları və əyləncəli oyunlar
keçirilir. Həssas qruplardan olan uşaqlarla ciddi iş
aparılır, onların ümumi inkişafı üçün məqsədyönlü işlər
görülür.
Uşaqların asudə vaxtlarının səmərəli keçməsi məqsədilə
müxtəlif ekskursiyalar, oyunlar təşkil olunur, cizgi
filmləri nümayiş etdirilir. Mərkəzdə dövlət səviyyəli
bütün bayramlar xüsusi olaraq qeyd edilir. Mərkəzin
həyətyanı sahəsində kiçik bayraq meydanı yaradılıb və
üçrəngli bayraq ucaldılıb. Məhz bu meydanda mərkəzin
uşaqları bayram gününü Azərbaycanın Dövlət himni ilə
qarşılayıblar. Tədbirdə Xalidə müəllim bayrağın
müqəddəsliyi ilə bağlı fikirləri uşaqlara çatdırıb.
Uşaqlar hər ay xüsusi olaraq gəzinti proqramlarından
bəhrələnirlər. Masallının, Yardımlının istirahət
ocaqlarına gəzintilər onların duyğularının, təbiəti
hiss etmək, əylənmək ehtiyaclarının ödənilməsinə böyük
köməklik göstərir.
Günərzi Qayğı Mərkəzinin icraçı direktoru Səbuhi Nağıyev
bildirib ki, facebook sosial şəbəkəsində yaradılmış
"Astara günərzi mərkəzi" bir qrup olaraq özündə 1000-dən
çox üzvü birləşdirir. Ən operativ xəbərlər qrup
üzvlərinin nəzərinə çatdırılır. Tanınmış ziyalıların,
jurnalistlərin, mədəniyyət işçilərinin burada təmsil
olunması məqsəd olaraq qarşıya qoyulub.
Sifai SƏFƏROVA,
"Azərbaycan müəllimi" |
