|
 Noyabrın
15-də Azərbaycan Müəllimlər İnstitutu və Nərimanov
Rayon Gənclər və İdman İdarəsinin təşkilatçılığı ilə
tələbələr arasında Milli Dirçəliş Gününə həsr olunmuş
şahmat turniri keçirilib. Turnirin rəsmi açılış
mərasimində institutun tərbiyə işləri üzrə prorektoru
Rəşad Sadıqov, Nərimanov Rayon Gənclər və İdman
İdarəsinin rəisi Nəcəf Novruzov, Bakı Şəhər Gənclər və
İdman Baş İdarəsinin baş məsləhətçisi, paytaxtın şahmat
idman növü üzrə koordinator-kuratoru Salman Əbdülov,
AMİ Tələbə Gənclər Təşkilatının sədri Nərmin Ərəbli
çıxış edərək turnir iştirakçılarına bayram münasibətilə
təbriklərini çatdırıb, turnirin keçirilməsinin məqsədi
və əhəmiyyətindən danışıb, tələbələrə müvəffəqiyyətlər
arzu ediblər.
Bildirilib ki, Azərbaycan Respublikasının Prezidenti
cənab İlham Əliyevin müvafiq sərəncamı ilə təsdiq
olunmuş "2009-2014-cü illərdə Azərbaycanda şahmatın
inkişaf etdirilməsi Dövlət Proqramı" yüksək səviyyədə
icra olunur. Çıxış edənlər yarışın keçirilməsinə şərait
yaratdığına görə institutun rektoru, Milli Məclisin
deputatı, professor Aqiyə Naxçıvanlıya
minnətdarlıqlarını bildiriblər.
Olimpiya sistemi üzrə keçirilən turnirdə II kurs
tələbələri Sənan Cəfərquliyev I yeri, Tural Hacıyev II
yeri, I kurs tələbəsi Surxay Əlizadə III yeri tutublar.
Qaliblər Nərimanov Rayon Gənclər və İdman İdarəsi
tərəfindən müvafiq dərəcəli diplomlar, medallar,
kuboklar və hədiyyələrlə təltif ediliblər. İlk üç yerin
qalibləri ilə yanaşı, fərqlənən iştirakçılardan Sərvin
Cəlilzadə, Jalə Rüstəmzadə, Aytən Hüseynli, Əli Həsənov,
Aygün Cəfərova, Elvin Qarayev, Arzu Məmmədova da diplom
və hədiyyələrlə mükafatlandırılıblar.
Noyabrın 20-də Bakı Şəhər Gənclər və İdman Baş İdarəsi
və AMİ Tələbə Gənclər Təşkilatının birgə təşkilatçılığı
ilə tələbələr arasında Beynəlxalq Tələbə Gününə həsr
olunmuş "Nə? Harada? Nə zaman?" intellektual oyunu üzrə
yarış keçirilib. Tədbirdə AMİ-nin tərbiyə işləri üzrə
prorektoru Rəşad Sadıqov, Baş İdarənin gənclərlə iş
sektorunun müdiri Zamin Əhmədov çıxış edərək
iştirakçılara uğurlar arzulayıblar. Çıxışlarda
dövlətimizin gənclərə qayğısından, onların savadlı və
eyni zamanda sağlam yetişməsini nəzərdə tutan mühüm
dövlət proqramlarından, tələbələrin öz bilik və
bacarıqlarını inkişaf etdirmələri üçün yaradılmış
şəraitdən bəhs ediblər.
10 komandanın mübarizə apardığı və 3 turdan ibarət olan
oyunda filologiya və təhsildə psixoloji xidmət
fakültəsinin tələbələrindən ibarət "Radius" komandası I
, "Senatorlar" komandası II, pedaqoji fakültənin
tələbələrindən ibarət "Pedaqoqlar" komandası isə III
yerin qalibi olublar. Qalib komandalar Baş İdarə
tərəfindən müvafiq dərəcəli diplomlar və xatirə
hədiyyələri ilə mükafatlandırılıblar.
AMİ-nin Mətbuat xidməti |
