Javascript DHTML Drop Down Menu Powered by dhtml-menu-builder.com

ARXİV

29 Noyabr 2013 - №46

 

Gəncliyimiz gələcəyimizdir

 

Müasir cəmiyyətimizin formalaşmasında və milli mənəvi dəyərlərimizin qorunub saxlanılmasında   gənclərin rolu çox önəmlidir. Təbii ki, gənclər yaşlı nəslin davamçısı olmaqla yanaşı cəmiyyətin ən dinamik zümrəsi hesab edilirlər. Cəmiyyətdə  sağlam mühitin formalaşması üçün savadlı, yaradıcı və yüksək vətənpərvərlik ruhuna sahib  olan gənclər yetişdirilməlidir. Məhz buna görə də dünyanın istənilən ölkəsində  gənclərə xüsusi diqqət yetirilir və onlar sosial-iqtisadi, ictimai-siyasi, eyni zamanda mədəni həyatın aparıcı qüvvəsi  kimi  ölkədə baş verən bütün proseslərin mərkəzində dayanırlar. Bütün bunlarla yanaşı, yaşlı nəsil gənclər üçün örnək olmalı, onları daima dəstəkləməlidirlər.

Hər bir cəmiyyət  gəncləri öz mədəniyyəti ruhunda tərbiyə edir. Bu deyimə əsaslansaq, həqiqətən də görərik ki, bir çox ölkələrdə bu  hal genetik olaraq  gənclərə  ötürülmüşdür. Məsələn, amerikalılar öz övladlarına  sahibkarlıq bacarığı və rəqabəti, çinlilər loyallığı, yaponlar isə əməkdaşlığı  təlqin edirlər. Tarixən imperiyaların və sivilizasiyaların qovuşduğu   məkanda yaşayan Azərbaycan xalqı isə mübarizliyi və  igidliyi ilə öz gənclərinə örnək olmuşdur. Bəli, elə  bu səbəbdən bizim gəncliyimizin devizi də mətin  və mübariz  olmaq,  dövlətçilik ənənələrimizi  qorumaq və nəsildən  nəslə  ötürməkdir. Sevindirici haldır ki, bu gün gənclərimiz istənilən sahədə inkişafa doğru addımlayır  və bir çox yeni yaranmış sahələrdə yüksək nailiyyətlər qazanırlar. Nəinki ölkə daxilində, ölkə hüdudlarından kənarda yaşayan, təhsil alan Azərbaycan gəncləri  məmləkətimizi layiqincə təmsil etməyə çalışır və bu istiqamətdə bir çox layihələr həyata keçirirlər. Gənclərlə bağlı bir sıra işlərin  həyata  keçirilməsində  Azərbaycanın  diplomatik  nümayəndəliklərinin  və diasporalarının  çox böyük rolu vardır.

Gənclərin yüksək elmi və intellektual səviyyəsinin inkişafında  xüsusilə dövlətin gənclər sahəsində apardığı siyasət durur. Respublikamızda  gənclər siyasətinin əsası ümummilli lider  Heydər Əliyev tərəfindən qoyulub. Ümummilli liderimiz dəfələrlə  "Azərbaycanın gələcəyi gənc nəslin əlindədir" deyərək  həmişə gənclərlə bağlı məsələləri öz siyasətinin tərkib hissəsi kimi görərək   onların imkan və bacarıqlarını yüksək qiymətləndirmiş və  onların problemlərinin həlli istiqamətində  həyata keçirilən tədbirlərə xüsusi önəm vermişdir. Məhz ona görə də gənc nəslə diqqət və qayğı  dövlətin ən mühüm fəaliyyət istiqamətlərindən  biri olaraq  1994-cü ildə yaradılmış Gənclər və İdman Nazirliyi ölkədə  gənclər siyasətinin istiqamətlərini müəyyənləşdirdi və qarşısında duran vəzifələrin  həyata keçirilməsi ilə bağlı fəaliyyətə başladı. Bununla yanaşı, Azərbaycan Respublikası Prezidentinin 2005-ci il 30 avqust tarixli sərəncamı ilə təsdiq edilmiş "Azərbaycan Gəncliyi Dövlət Proqramı (2005-2009-cu illər)" dövlət gənclər siyasətinin həyata keçirilməsi yolunda mühüm fəaliyyət sənədi oldu ki, həmin  Dövlət Proqramının icrası nəticəsində dövlət gənclər siyasətinin prioritet sahələrində müsbət dəyişikliklər baş verdi və bir sıra  uğurlar əldə edildi.

Yuxarıda  sadalananları nəzərə alsaq, ulu öndər Heydər Əliyevin  müəyyənləşdirdiyi və həyata keçirdiyi gənclər siyasəti 5 mühüm istiqaməti ehtiva edirdi:

* Milli mənəvi dəyərlərimizin qorunmasında gənclərin rolunu artırmaq, gənc nəslin tarixi köklərimizə bağlı olaraq vətənpərvərlik ruhunda tərbiyələndirilməsini təmin etmək;

* Gənclərin elmi, intellektual potensialının artırılması üçün ciddi təhsil və mədəni islahatlar həyata keçirmək,

* Gənclərin təşkilatlanmasını təmin etməklə, onları müstəqilliyimizin keşiyində vahid qüvvə kimi birləşməyə səfərbər etmək;

* Gənclərin dövlət idarəçiliyində rolunu əhəmiyyətli dərəcədə artırmaq və onların məsuliyyət hissini formalaşdırmaq;

* Azərbaycan dövlətinin beynəlxalq aləmə inteqrasiyasının yaratdığı imkanlardan gənclərin maksimum səviyyədə yararlanmasına möhkəm əsaslar yaratmaq.

Göründüyü kimi, bu sahədə atılan addımlar qısa müddət ərzində gənclər siyasətinin hərtərəfli inkişafını  təmin etmişdir.

Bunlarla yanaşı, Prezident İlham Əliyevin 2007-ci ilin "Gənclər ili" elan edilməsi ilə bağlı sərəncamı gənclərin ölkə həyatındakı fəallığını daha da artırıb. Təbiidir ki, ölkənin istənilən sahəsində gənclərin sayının artması  onlara göstərilən etimadın nəticəsidir. Belə ki, bir sıra beynəlxalq tədbirlərin iştirakçısı və  təşkilatçısı olan Azərbaycan gəncləri yüksək potensiala sahib olduqlarını bir daha sübut etdilər. 2011-ci il mayın 14-də Almaniyanın Düsseldorf şəhərində keçirilən 56-cı "Avroviziya - 2011" mahnı müsabiqəsində ölkəmizi təmsil edən gənclər qələbə qazandılar. Bu qələbə isə mötəbər yarışmanın 2012-ci ildə Azərbaycanda  keçirilməsinə səbəb oldu. Ölkəmiz isə bu yarışmaya yüksək səviyyədə ev sahibliyi etməklə öz adını "Eurovision" tarixinə böyük hərflərlə yazdı.

Yuxarıda  sadalananları nəzərə alsaq demək olar ki, artıq   gənclər bütün bu işləri həyata keçirə biliblər. Hazırda ölkədə 200-ə yaxın gənclər təşkilatı, 20-dən artıq ali məktəbdə fəaliyyət göstərən tələbə gənclər təşkilatı vardır. Onların əhatə etdikləri məsələlər də kifayət qədər genişdir: gənclərin vətənpərvər ruhda tərbiyəsi, məlumatlandırılması, işsizliyin azaldılması, gənclərin sağlamlığı, təhsili, fəal vətəndaş mövqeyi, mədəniyyətin geniş kütlələr arasında təbliği və s. məsələlər kifayət qədər aktualdır. Məhz buna görə də gənclərin hərtərəfli inkişafında bütün təminatların  sürətləndirilməsi  müvafiq illər üçün dövlət proqramlarının hazırlanmasına zəmin yaradır. Bunun nəticəsi olaraq 6 aprel 2011-ci il tarixində  Prezident İlham Əliyev tərəfindən  "Azərbaycan gəncliyi 2011-2015-ci illərdə" Dövlət Proqramı haqqında sərəncam imzalanmışdır. Sadalananlarla kifayətlənmək olmaz, eyni zamanda gənclər siyasətilə bağlı elm, təhsil, mədəniyyət və digər sosial sahələrə yönələn fəaliyyətlərin stimullaşdırılması məqsədilə Gənclər Fondu yaradılmışdır.

Ümumiyyətlə, gənclərlə bağlı təsis edilən qurumların bir məqsədi vardır ki, bu da Azərbaycan  gəncliyinin tərəqqisinə xidmət etməkdir. Bütün bunları nəzərə alaraq demək olar ki, Azərbaycanın gələcək inkişafına gedən yol biz gənclərin  əlindədir. 

Şəhla SEYFƏDDİNOVA,
Bakı Pedaqoji Kadrların İxtisasartırma və Yenidənhazırlanma İnstitutunun əməkdaşı 

 
 
 
Səhifənin başına qalx Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov