Dekabrın
4-də Azərbaycan Respublikasının təhsil naziri Mikayıl
Cabbarov Xəzər-Avropa İnteqrasiya İşgüzar Klubunun
üzvləri ilə görüşüb.
Təhsil naziri Mikayıl Cabbarov ilk öncə görüş
iştirakçılarını salamlayıb, bu tədbirə dəvət olunmaqdan
məmnunluğunu ifadə edib. Nazir belə görüş və
müzakirələrin dövlət və özəl biznes qurumları ilə təhsil
müəssisələrinin səmərəli əməkdaşlığının inkişafına yeni
töhfələr verəcəyinə əminliyini bildirib.
Nazir bütün dəyərli təkliflərin səmimi müzakirələr
zamanı meydana çıxdığını nəzərə çatdırıb: "Sizlərlə həm
işgüzar insan, həm fəal vətəndaş, həm də bir valideyn
kimi danışmaq, gələcəyimiz olan uşaqların və gənclərin
həyatında təhsilin rolunu müzakirə etmək və
dəyərləndirmək istərdim".
Ölkəmizin dünya bazarında rəqabətliliyinin və xalqın
firavanlığının təmin edilməsinə toxunan nazir bunun
təhsilalanlar üçün nə qədər keyfiyyətli təhsil mühiti
yaradılmasından asılı olduğunu bildirib. Bu baxımdan
Təhsil Nazirliyi biznes dünyası ilə sosial əməkdaşlığın
inkişafına xüsusi əhəmiyyət verir.
Müasir iqtisadi inkişaf konsepsiyasının
müəyyənləşdirilməsi ilə bağlı dünya təcrübəsi deməyə
əsas verir ki, təhsil sahəsi ilə biznes dünyasının
əməkdaşlığı hərtərəfli perspektiv inkişafı təmin edir.
İqtisadi uğurlar əldə etmiş ölkələrdə biliklərə
əsaslanan iqtisadiyyatın yaradılması sosial-iqtisadi
siyasətin prioritet istiqamətini təşkil edir.
Təhsil islahatlarının nəticələrinin dərhal hiss
olunmadığını vurğulayan nazir bildirib ki, islahatlar
təhsil prosesinin davamlılığının və fasiləsizliyinin
təmin edilməsi şərti ilə mümkün qədər
sürətləndirilməlidir. Azərbaycanda ölkənin davamlı
tərəqqisi baxımından insan resurslarının inkişafı
məsələsinə xüsusi əhəmiyyət verildiyini önə çəkən təhsil
naziri dövlət başçısının irəli sürdüyü konsepsiyaya
uyğun olaraq, əsas strateji hədəfin neft kapitalının
insan kapitalına çevrilməsi olduğunu söyləyib. Ancaq
təhsil sisteminin yeni səviyyəyə qaldırılmasına, onun
keyfiyyət və effektivliyinin artırılmasına nail olmadan
bu məsələni yerinə yetirmək mümkün deyil.
Nazir bu gün Azərbaycanda təhsil sahəsinə dövlət
səviyyəsində xüsusi diqqət göstərildiyini qeyd edib.
Ölkə Prezidentinin 2013-cü il 24 oktyabr tarixli
sərəncamı ilə təsdiq edilmiş "Azərbaycan Respublikasında
təhsilin inkişafı üzrə Dövlət Strategiyası" bu sahəyə
verilən önəmi bir daha bariz şəkildə nümayiş etdirir.
Dövlət Strategiyası təhsilimizin qarşısında duran əsas
çağırışları müəyyən edir, təhsil sisteminin
institusional əsaslarının, infrastrukturunun və insan
resurslarının inkişaf etdirilməsi üçün yolları göstərir.
Dövlət Strategiyasının əhatə etdiyi istiqamətləri
sadalayan nazir bu sənədin bir çox vacib hədəflər üzrə
islahatlara zəmin yaratdığını vurğulayıb.
Nazir qeyd edib ki, strategiyada uşaqların erkən yaş
dövründə inkişafının səmərəli təhsil modelinə əsaslanan
standart və kurikulumların hazırlanması, məktəbəqədər
yaşlı uşaqların fiziki və əqli inkişafını,
sosiallaşmasını təmin edən, yaradıcılıq qabiliyyətlərini
üzə çıxaran, onlarda həyati bilik və bacarıqları,
davranış qaydalarını aşılayan təhsil standartlarının və
yeni kurikulumların hazırlanması, məktəbəqədər, eləcə də
ümumi təhsil müəssisələrində uşaqlara müvafiq
xidmətlərin göstərilməsi (dərs və ya təlim vəsaitləri və
s.) də strateji hədəflər sırasında yer alıb. Həmçinin,
təhsil naziri erkən yaşlı uşaqların məktəbəqədər
təhsillə əhatəsinin 90 faiz səviyyəsinə çatdırılmasının
əsas məqsəd kimi qarşıya qoyulduğunu söyləyərək
bildirib: "Burada bir məqamı da nəzərə almaq lazımdır
ki, biz məktəbəqədər təhsili təhsil pillələrinin çox
vacib həlqəsi kimi nəzərə alaraq onun inkişaf
perspektivini çox aydın görürük. Bu gün müasir təhsil
platforması bizə onu deyir ki, təməl bacarıqlar uşaqlıq
dövrünün ilk illərindən əldə edildiyinə görə uşaqların
zehninin erkən yaş dövründən inkişaf etdirilməsi
vacibdir. Bu səbəbdən məktəbəqədər təhsilin inkişafına
dövlət siyasətində ciddi əhəmiyyət verilir".
Məktəb-valideyn münasibətlərinə toxunan nazir deyib:
"İlk növbədə qeyd edim ki, hər bir şəxsin
formalaşmasında ailə və valideynlər mühüm rol oynayır.
Valideynlər övladlarının keyfiyyətli təhsil alması üçün
məsuliyyət payını bölüşməli, məktəbin üzərinə düşən
vəzifələri düzgün dəyərləndirməlidirlər. Məktəb
həyatında, təhsil ocaqlarının idarəolunması prosesində
valideynlərin iştirakı genişləndirilməlidir".
Şagirdlərin peşə seçimində biznes qurumlarının da
üzərinə mühüm vəzifələr düşdüyünü söyləyən təhsil naziri
bu baxımdan şagirdlərin istehsal müəssisələrinə
ekskursiyalarının təşkilinin və digər maraqlı
layihələrin əhəmiyyəti haqqında fikirlərini bildirib.
Təhsil islahatlarının uğurla nəticələnməsi işinə yalnız
hökumətin öhdəliyi kimi baxmaq düzgün deyil. Bu bütün
cəmiyyətimizin, xüsusilə də biznes qurumlarının
qarşısında duran mühüm vəzifələrdəndir.
Nazir çıxışının sonunda görüş iştirakçılarına bir daha
təşəkkürünü bildirib, təhsil islahatlarının məsuliyyətli
və uzunmüddətli bir proses olduğunu nəzərə alaraq
ölkəmizin xoşbəxt gələcəyinin təmin edilməsi naminə
birgə çalışmağın zəruriliyinə diqqət çəkib.
Sonra nazir görüş iştirakçılarını maraqlandıran sualları
cavablandırıb, Təhsil Nazirliyi ilə biznes dünyasının
gələcək əməkdaşlığına dair geniş fikir mübadiləsi
aparılıb. |