Hər
bir gənc vətənpərvər olmalıdır. Vətənpərvərlik böyük bir
məfhumdur. Bu, sadəcə orduda xidmət etmək deyil, Vətənə
sadiq olmaq, Vətəni sevmək, torpağa bağlı olmaq - budur
vətənpərvərlik.
Heydər ƏLİYEV
Memarı və qurucusu ümummilli lider Heydər Əliyev olan
müasir Azərbaycanın vətənpərvər gənclərini müqəddəs bir
amal birləşdirir. Ölkə gənclərinin 1996-cı il fevralın
2-də Bakıda keçirilmiş birinci forumunda çıxış edən
Prezident Heydər Əliyev bu tarixi vəzifələri dəqiq belə
müəyyənləşdirib. "...Gənclərimizin əsas vəzifəsi
özünü müstəqil Azərbaycan Respublikasının inkişafına
həsr etməkdən, müstəqil Azərbaycan Respublikasının
yaşamasına və əbədi olmasına həsr etməkdən ibarət
olmalıdır". Ulu öndərimizin hər birimizin qürur
mənbəyinə çevrilən azərbaycançılıq ideyalarına sadiq
qalan müasir gənclik bu tövsiyə və vəzifələri özünün
fəaliyyət proqramı kimi qəbul etdi. Ümummilli lider
Heydər Əliyevin təşəbbüsü ilə keçirilən Azərbaycan
Gənclərinin Forumu artıq ənənə halını alaraq cəmiyyətin
aparıcı qüvvəsini bir araya topladı.
Hakimiyyətdə olduğu bütün dövrlərdə ulu öndər gənclərə
diqqət və qayğını dövlət siyasətinin əsas prioritet
istiqaməti kimi müəyyənləşdirdi. Prezident Heydər Əliyev
gənclər siyasətinin məqsədlərini, prinsiplərini,
istiqamətlərini, təşkilati-hüquqi əsaslarını müəyyən
edən və bu sahədə yaranan münasibətləri tənzimləyən
Qanunu imzaladı. Gənclərin vətənpərvərlik,
azərbaycançılıq, dövlətçilik, dünyəvilik prinsipləri
əsasında xalqımızın tarixinə, mədəni irsinə,
adət-ənənələrinə, dövlət dilinə və rəmzlərinə, milli
mənəvi və ümumbəşəri dəyərlərə hörmət ruhunda tərbiyə
olunması Qanunda öz əksini tapıb.
Dövlət gənclər siyasətini sürətlə qloballaşan çağdaş
dünyamızın tələblərinə uyğun yeni, çevik bir müstəvidə
uğurla davam etdirən Prezident İlham Əliyev ulu öndərin
layiqli davamçısı olduğunu bir daha nümayiş etdirir.
Problem və perspektivləri əks etdirən real vəziyyətin
ciddi təhlilini aparan ölkə Prezidenti 30 avqust 2005-ci
il tarixli Sərəncamı ilə "Azərbaycan Gəncliyi Dövlət
Proqramı (2005-2009 -cu illər)", 7 iyul 2011-ci il
tarixli Sərəncamı ilə isə "Azərbaycan gəncliyi
2011-2015-ci illərdə" Dövlət Proqramını qəbul etdi.
Dövlət başçısının digər sərəncamı ilə 2007-ci il
ölkəmizdə "Gənclər ili" elan olundu. Ardıcıl və
məqsədyönlü olaraq həyata keçirilən bu siyasət ölkədə
sosial-iqtisadi, elmi-mədəni, təhsil və digər sahələrdə
gənclərin fəal iştirakını təmin etmək üçün geniş
imkanlar yaratdı. Çox keçmədi ki, müstəqil Azərbaycan
gənclərinin səsi beynəlxalq tribunalardan gəldi,
dünyanın ən mötəbər arenalarında onların şərəfinə dövlət
bayrağımız qaldırıldı.
Azərbaycan həqiqətləri dünyaya yayılır
Ən böyük azərbaycanlı Heydər Əliyev deyirdi:
"Azərbaycanlılar! Harda olursan ol, hansı ölkədə
yaşayırsan-yaşa, ancaq Azərbaycan haqqında, Azərbaycanın
müstəqilliyi, ərazi bütövlüyü haqqında, Azərbaycan
xalqının bu günü və gələcəyi haqqında düşünməlisən".
Ümummilli liderin zəngin dövlətçilik irsinin öyrənilməsi
və təbliği məqsədilə yaradılmış Heydər Əliyev Fondu
fəaliyyətə başladığı ilk gündən məhz Azərbaycanı daha
yaxından təbliğ etmək, ölkə həqiqətlərini dünya
arenasına çıxarmaq istiqamətini özü üçün prioritet
seçdi. Fondun Rusiya nümayəndəliyinin rəhbəri Leyla
Əliyevanın gördüyü işlər, gerçəkləşdirdiyi layihələr bu
baxımdan təqdirəlayiqdir. "Xocalıya ədalət" Beynəlxalq
informasiya kampaniyası da məhz Azərbaycan gəncliyinin
ən layiqli, vətənpərvər təmsilçisi Leyla Əliyevaya
məxsusdur.
Əsas məqsədi beynəlxalq birliyi Xocalı faciəsi haqqında
obyektiv məlumatlandırmaq olan bu kampaniya İslam
Konfransı Təşkilatı Gənclər Forumunun baş Koordinatoru
Leyla Əliyeva tərəfindən 2008-ci il mayın 8-də - Şuşanın
işğalının ildönümü günündə irəli sürülüb.
2009-cu il fevralın 26-da Heydər Əliyev Fondunun dəstəyi
ilə Azərbaycanın Rusiyadakı səfirliyində təşkil olunmuş
"Xocalı: iddia müddəti bitmir" xatirə gecəsində
L.Əliyeva xalqımızın tarixinə ən dəhşətli və qara
səhifələrdən biri kimi həmişəlik yazılmış bu faciənin
ağrı-acısını bütün dünyaya çatdırır: "1992-ci il
fevralın 25-dən 26-na keçən gecə erməni işğalçıları
Azərbaycanın Xocalı şəhərini tutmuşdur. Nəticədə şəhərin
613 nəfər dinc sakini, o cümlədən 106 qadın, 70 ahıl
yaşlı insan, 63 uşaq amansızcasına öldürülmüş, 155 nəfər
itkin düşmüşdür. Bu qəddarlığın, bu vəhşiliyin səbəbi nə
idi? Bu, qəsdən törədilmiş aksiya, Azərbaycan xalqına
qarşı əsl soyqırımı, kütləvi vahimələndirmə aksiyası
idi".
Heydər Əliyev Fondunun hazırladığı "Xocalı soyqırımı"
filminin nümayişi ilə başlanan "Xocalıya ədalət"
kampaniyasının və onun İnternet saytının dünyanın
müxtəlif şəhərlərində keçirilən təqdimatlarında erməni
vəhşiliyini əks etdirən fotoşəkillər beynəlxalq
ictimaiyyətə təqdim olunub.
2012-ci il fevralın 24-də Bosniya və Herseqovinanın
paytaxtı Sarayevoda Heydər Əliyev Fondunun təşəbbüsü ilə
Xocalı soyqırımı qurbanlarının xatirəsinə ucaldılmış
abidənin açılışında Leyla Əliyeva demişdir: "Hazırda
bu kampaniya dünyanın 50 ölkəsində həyata keçirilir və
onun fəallarının yorulmaz əməyinin nəticəsi olaraq İslam
Əməkdaşlıq Təşkilatının Parlament İttifaqı Xocalıda
törədilmiş vəhşilikləri soyqırımı kimi tanımışdır".
"Vətən sağ olsun"
"...Canım atam və anam. Məndən sarı darıxmayın.
İnşallah, cənnətdə görüşəcəyik. Mənim üçün bol-bol dua
edin. Vətənin dar günündə artıq ürəyim dözmür. Allaha
xatir bunu etməliyəm. Ən azından ürəyim sərinlik tapar.
Şəhid olanadək bu şərəfsizlərin üzərinə gedəcəyəm. Şəhid
olsam ağlamayın. Əksinə, sevinin ki, o mərtəbəyə
yüksəldim. Allaha ibadətinizi dəqiq yerinə yetirin.
Çoxlu sədəqə verin. Seyid nəvəsi olaraq bunu etməliyəm.
Allah böyükdür. Vətən sağ olsun. Oğlunuz Mübariz.
Haqqınızı halal edin".
Bu gün artıq cəsur, vətənpərvər Azərbaycan gəncinin əsl
qəhrəmanlıq himninə çevrilən bu məktubu həyəcansız
oxumaq mümkünsüzdür. Azərbaycanın Milli Qəhrəmanı
Mübariz Ağakərim oğlu İbrahimov Vətənin bu ağır gününə
dözməyərək çətin və şərəfli bir döyüşə atılır. 18 iyun
2010-cu il. Növbəti dəfə düşmən qüvvələri atəşkəs
rejimini pozurlar. Döyüş növbəsini yerinə yetirən igid
Mübarizin hiddəti yerə-göyə sığmır. Ürəyində Vətən
sevgisi silaha sarılan bu mübariz gənc Talış-Borsunlu
istiqamətində gedən şiddətli döyüşlərdə şəxsi rəşadəti
və şücaəti ilə düşmənləri lərzəyə salır. Böyük
qəhrəmanlıq nümunəsi göstərərək qarşı tərəfin çoxlu
sayda canlı qüvvəsini məhv edən Mübariz İbrahimov
şəhidlik zirvəsinə yüksəlir. Qəhrəman Azərbaycan
balasının ölümündən də vahiməyə düşən erməni yaraqlıları
Mübarizin meyidini qaytarmır.
Nəhayət ki, aparılan danışıqlar problemin mümkün həllini
ortaya qoyur. Azərbaycan, Rusiya və Ermənistan
prezidentlərinin Dağlıq Qarabağ münaqişəsinin
tənzimlənməsinə dair Birgə Bəyanatına əsasən Mübariz
İbrahimovun nəşi Vətənə qaytarılır.
Prezident İlham Əliyevin Sərəncamı ilə Azərbaycan
Respublikasının müstəqilliyinin və ərazi bütövlüyünün
qorunub saxlanmasında göstərdiyi şəxsi igidliyə və
rəşadətə görə gizir Mübariz Ağakərim oğlu İbrahimova
Azərbaycanın Milli Qəhrəmanı adı verildi.
Milli Qəhrəman Mübariz İbrahimovla vida mərasimində Ali
Baş Komandan İlham Əliyev çıxış edərək demişdir:
"Mübariz yaxşı bilirdi ki, o döyüşdən sağ-salamat çıxa
bilməyəcək. Ancaq Vətən, torpaq sevgisi, onda olan
vətənpərvərlik ruhu onu şəhidlik zirvəsinə ucaltdı.
Mübariz bütün gənclər üçün örnəkdir, nümunədir".
Gənc vətənpərvər nəsil yetişir
Gənclərlə keçirdiyi bütün görüşlərində ulu öndər
Azərbaycanın gələcəyinin etibarlı əllərdə olduğunu
inamla söyləyirdi: "Mən əminəm ki, müstəqil
Azərbaycanın gələcəyini qoruyub saxlaya bilən gənc
nəsillər yetişir".
Azərbaycan təhsilinin inkişafında misilsiz xidmətləri
olan Heydər Əliyev hələ sovetlər dönəmində gənclərin
ölkəmizdən kənarda təhsil almasına xüsusi önəm verirdi.
Məhz ulu öndərin şəxsi təşəbbüsü və qayğısı sayəsində
ötən əsrin 70-80-ci illərində keçmiş SSRİ-nin 170-dən
çox ən məşhur ali məktəbində 15 mindən artıq
azərbaycanlı gənc təhsil alıb. Bu gəncləri "Azərbaycanın
yetirməsi, Azərbaycanın milli sərvəti" kimi
qiymətləndirən ümummilli lider, beləliklə, tarixi bir
ənənənin əsasını qoydu.
Bu ənənəni qoruyaraq Prezident İlham Əliyev 16 aprel
2007-ci il tarixli Sərəncamı ilə "2007-2015 -ci illərdə
Azərbaycan gənclərinin xarici ölkələrdə təhsili üzrə
Dövlət Proqramı"nı qəbul etdi. Bu proqram minlərlə
gəncin dünyanın ən nüfuzlu universitetlərində təhsil
alaraq gələcəkdə peşəkar mütəxəssis kimi müstəqil
Azərbaycanın daha da inkişafi naminə fəaliyyət
göstərməsinə geniş imkanlar yaradır.
Prezident İlham Əliyevin 2013-cü il 24 oktyabr tarixli
Sərəncamı ilə təsdiq edilmiş "Azərbaycan Respublikasında
təhsilin inkişafı üzrə Dövlət Strategiyası"nda
məsuliyyətini dərk edən, demokratiya prinsiplərinə və
xalqının milli ənənələrinə, insan hüquq və azadlıqlarına
hörmət edən, azərbaycançılıq ideyalarına sadiq olan,
müstəqil və yaradıcı düşünən vətəndaş və şəxsiyyət
yetişdirmək təhsil sisteminin başlıca vəzifələrindən
biri kimi müəyyənləşdirilib.
Azərbaycan Respublikası təhsil nazirinin müvafiq əmrinə
əsasən ölkənin ümumtəhsil məktəblərində 2013-2014-cü
tədris ilinin ilk dərs saatı məhz vətənpərvərlik
mövzusuna həsr olundu.
Ən böyük mükafat xalqın sevgisidir
Dövlətin iqtisadi gücünü şərtləndirən sahələrdən biri
olan idman şübhəsiz ki, gənc nəslin vətənpərvərlik
ruhunda tərbiyə olunmasında mühüm rol oynayır. Dünyanın
möhtəşəm idman arenalarında güclü olduqlarını sübuta
yetirən gənclərimizin şərəfinə himnimizin
səsləndirilməsi, dövlət bayrağımızın qaldırılması
həqiqətən də qürurvericidir.
Dövlət başçısı hər dəfə böyük uğurlara imza atan
idmançılarımızla görüşür və onların qələbəsini yüksək
qiymətləndirir. Kazanda keçirilən XXVII Ümumdünya Yay
Universiadasında 16 medal qazanmış gənclərlə görüşündə
də Prezident İlham Əliyev onlara təbriklərini çatdırdı.
Bütün bu nailiyyətləri nə qədər böyük zəhmət hesabına
əldə etdiklərinə diqqət çəkən ölkə rəhbəri qeyd etdi ki,
belə mötəbər yarışlarda böyük qələbəni əldə etmək
üçün mütləq çox böyük fədakarlıq, peşəkarlıq və Vətənə
sevgi lazımdır. Bizim gənclər vətənpərvərlik ruhunda
tərbiyə alırlar, Vətənə, xalqa bağlıdırlar. Onların ən
böyük mükafatı xalqın sevgisi və qiymətidir.
Bu günlərdə kişi şahmatçılar arasında Avropa komanda
çempionatında birinci yeri qazanmış seçmə komandamızın
üzvləri və mütəxəssislərini qəbul edən dövlət başçısı
bunu böyük tarixi qələbə kimi yüksək dəyərləndirdi. Bu
gün Azərbaycanın sürətlə inkişaf edən ölkə kimi dünya
miqyasında özünə layiq yer tutduğunu qeyd edən Prezident
İlham Əliyev bir daha vurğuladı ki, bizim uğurlarımızın
səbəbi Azərbaycan xalqının istedadıdır, yüksək
intellektual potensialıdır və gənclərimizin peşəkarlığı
və vətənpərvərliyidir.
Sarvan İBRAHİMOV,
"Azərbaycan müəllimi"
Qeyd:
"Azərbaycan Respublikasının Prezidenti yanında Kütləvi
İnformasiya Vasitələrinin İnkişafına Dövlət Dəstəyi
Fondunun keçirdiyi müsabiqəyə təqdim etmək üçün"
|