|
Azərbaycan Texniki Universitetində (AzTU) "TEMPUS"
proqramına həsr olunmuş seminar keçirilmişdir.
AzTU-nun mətbuat xidmətindən AzərTAc-a bildirmişlər ki,
seminarı universitetin beynəlxalq əlaqələr üzrə
prorektoru, professor Mustafa Babanlı açaraq "TEMPUS"
proqramı çərçivəsində hazırlanan ixtisaslarda
qiymətləndirmə və akkreditasiya məsələlərinin
əhəmiyyətindən danışmışdır.
Tədbirdə universitetin metallurgiya və metalşünaslıq
kafedrasının müdiri, professor Sübhan Namazov
Almaniyanın Köln Texniki Elmlər Universitetində bu
məsələ ilə bağlı həyata keçirilən qiymətləndirmə və
akkreditasiya qaydaları ilə seminar iştirakçılarını
tanış etmişdir.
Seminarda, həmçinin Azərbaycan Dövlət Neft
Akademiyasının, Sumqayıt Dövlət Universitetinin
təmsilçiləri həmin ali məktəblərdə "TEMPUS" proqramı
çərçivəsində təhsilin qiymətləndirmə və akkreditasiya
qaydaları ilə bağlı görülən işlər barədə məlumat
vermişlər.
Təhsil Nazirliyinin beynəlxalq əməkdaşlıq üzrə aparıcı
mütəxəssisi İlham Hümbətov və həmin nazirliyin Hüquqi
ekspertiza və lisenziyalaşdırma şöbəsinin böyük
məsləhətçisi Könül Fətiyeva müzakirə olunan məsələyə öz
münasibətlərini bildirmişlər. |
