Javascript DHTML Drop Down Menu Powered by dhtml-menu-builder.com

ARXİV

13 Dekabr 2013 - №48

 

Azərbaycan xalqının ümummilli lideri Heydər Əliyevin vəfatının 10 ili tamam oldu

 

Əbədiyaşar liderə böyük ehtiramla 

Böyütmək üçün şəkili seçinDekabrın 12-də Bakı Dövlət Universitetində ulu öndər Heydər Əliyevin anım günü münasibətilə tədbir keçirilib. Tədbirdə universitetin professor-müəllim heyəti, tələbələri iştirak edib. Tədbiri giriş sözü ilə universitetin rektoru, akademik Abel Məhərrəmov açaraq ümummilli lider Heydər Əliyevin müdrik siyasətə, dönməz əqidəyə və tarixi uzaqgörənliyə malik şəxsiyyət kimi müasir Azərbaycan dövlətinin qurulması istiqamətində atdığı addımlardan bəhs edib. Rektor ulu öndərin elm, təhsil, mədəniyyət sahələrinin inkişafında göstərdiyi əvəzolunmaz xidmətlərindən, onun rəhbərliyi ilə gerçəkləşən genişmiqyaslı quruculuq proqramlarından danışıb. "Xoşbəxt o xalqdır ki, onun ümummilli lideri var, xalq o zaman daha xoşbəxt olur ki, həmin siyasi kurs uğurla davam etdirilir" fikrini hər dəfə səsləndirdiyini xatırladan rektor, bu baxımdan Azərbaycan xalqının həqiqətən də xoşbəxt olduğunu qeyd edib: "Ulu öndərin siyasi kursu möhtərəm Prezidentimiz İlham Əliyev tərəfindən uğurla davam etdirilir, milli təhsilin inkişafı məsələsi öz məzmununu dəyişərək həm də Azərbaycanın gələcək inkişaf modelinin əsasını formalaşdıran başlıca amil kimi gündəmə gətirilir, insan kapitalının formalaşmasına xidmət edən ümumtəhsil hərəkatı yeni vüsət alır".

Sonra universitetin kafedra müdirləri, professorlar -Ziyafət Əsgərov, Məzahir Pənahov və Cahangir Məmmədli çıxış ediblər.

Tədbirin sonunda universitetin Həmkarlar İttifaqı Komitəsinin sədri Fikrət Şiriyevin ssenarisi əsasında ümummilli lider Heydər Əliyevin 90 illik yubileyinə həsr olunmuş ədəbi-bədii kompozisiya nümayiş etdirilib. Böyütmək üçün şəkili seçin

BDU-nun Mətbuat və informasiya şöbəsi

 

 

  


Bakı Pedaqoji Kadrların İxtisasartırma və Yenidənhazırlanma İnstitutunda Heydər Əliyevin xatirəsinə həsr olunmuş tədbir

Böyütmək üçün şəkili seçinDekabrın 10-da Bakı Pedaqoji Kadrların İxtisasartırma və Yenidənhazırlanma İnstitutunda Azərbaycan xalqının ümummilli lideri Heydər Əliyevin xatirəsinə həsr olunmuş tədbir keçirildi. Tədbirdə institutun rəhbərliyi, professor-müəllim heyəti, müdavimlər, tələbələr, təhsil ictimaiyyətinin və KİV-in nümayəndələri iştirak edirdilər. Tədbir iştirakçıları institutun Heydər Əliyev muzey-lektoriyası ilə tanış olduqdan sonra ümummilli lider Heydər Əliyevin xatirəsi bir dəqiqəlik sükutla yad edildi. İnstitutun rektoru, professor Asəf Zamanov tədbiri giriş nitqi ilə açaraq bildirdi ki, Azərbaycan xalqının tarixində və taleyüklü məsələlərinin həllində müstəsna xidmətləri olan böyük şəxsiyyətlər, görkəmli siyasət və dövlət xadimləri çox olmuşdur. Onlar gördükləri böyük işləri və əməlləri ilə yadda qalmışlar. Belə tarixi şəxsiyyətlər sırasında Azərbaycan xalqının böyük oğlu, ümummilli lider, görkəmli dövlət xadimi, dünya miqyaslı siyasətçi Heydər Əliyevin xüsusi rolu var.  Dövlət xadimlərindən ancaq bu dahi şəxsiyyət milli lider səviyyəsinə yüksəlmişdir. Ulu öndər milli liderliklə siyasi liderlik keyfiyyətlərini ehtiva etməklə, fəaliyyət göstərdiyi bütün sahələrdə də özünü əsl lider kimi təsdiq etmişdir. Natiq onu da qeyd etdi ki,  bu dahi insan tarixi yazan və yaradan, onu yönəltməyi bacaran nadir şəxsiyyətlərdən idi. Təsadüfi deyil ki, onun həyata keçirdiyi islahatlar, irəli sürdüyü problemlər, qəbul etdiyi qərarlar, söylədiyi fikirlər öz aktuallığı və obyektivliyi baxımından ölçülüb biçildiyindən ətrafdakıları heyrətləndirmiş, ona siyasət aləminin patriarxı adını qazandırmışdır. Həmin uğurlu siyasətin məntiqi nəticəsidir ki, Azərbaycan 2011-ci ildə BMT-nin Təhlükəsizlik Şurasının 15 üzvündən biri seçilmiş, 2013-cü ildə dünyanın kosmos ölkələri sırasına daxil olmuşdur.

Sonra professor Asəf Zamanov "Heydər Əliyev və yüksək ixtisaslı kadrların hazırlanması" mövzusunda məruzə etdi.  O qeyd etdi ki, ümummilli lider Heydər Əliyev müstəqil Azərbaycanda elmin, təhsilin inkişafına daim xüsusi diqqət yetirmiş, elmi elitanın formalaşmasında müstəsna xidmət göstərmişdir. Bu siyasət hazırda Azərbaycan Respublikasının Prezidenti möhtərəm İlham Əliyev cənabları tərəfindən uğurla davam etdirilir. 

Heydər Əliyev hakimiyyətdə olduğu bütün dövrlərdə Azərbaycan xalqının xoşbəxt gələcəyi haqqında düşünərək, ölkədə intellektual potensialın formalaşması üçün bilikli və savadlı kadrların hazırlanmasına şərait yaradırdı. Əgər 1969-cu ildə SSRİ-nin aparıcı ali məktəblərinə təhsil almağa göndərilən gənclərin sayı 50 nəfər idisə, 1981-ci ildə Azərbaycan ali məktəblərinin yuxarı kurs tələbələrini, aspirant və doktorantlarını da nəzərə alsaq, onların sayı 1500-ə çatırdı. Bütün bunlar ulu öndərin uzaqgörən siyasəti, güclü iradəsi, möhkəm əzmi sayəsində həyata keçirilirdi. Məhz həmin uğurlu siyasətin nəticəsidir ki, bu gün Azərbaycanda yüksək intellektual potensial formalaşmış, nüfuzlu elmi məktəblər yaradılmışdır.

Tədbirdə BPKİYİ-nin Azərbaycan dili və ədəbiyyatı kafedrasının müdiri, filologiya elmləri doktoru Aydın Paşayev "Heydər Əliyev və Azərbaycan dili", pedaqogika kafedrasının müdiri Fikrət Əliyev "Heydər Əliyev və gənc nəslin tərbiyəsi" mövzularında məruzələrlə çıxış edərək ulu öndərin dövlətimiz və dövlətçiliyimiz uğrunda qurub yaratdığı müasir Azərbaycanın parlaq uğurlarından söz açdılar.

Tədbirdə institutun Gənclər Təşkilatının üzvləri də çıxış etdilər. Onlar gənclərin milli mənəvi tərbiyəsində Heydər Əliyev irsinin böyük bir məktəb olduğunu vurğuladılar.

Tədbir Heydər Əliyevin xatirəsinə həsr olunmuş "Ata yolu" sənədli filminin  nümayişi ilə başa çatdı.

Sevinc QULİYEVA,
BPKİYİ-nin mətbuat katibi


Sumqayıt Dövlət Universitetində anım mərasimi 

Böyütmək üçün şəkili seçinDekabrın 11-də Sumqayıt Dövlət Universitetində Azərbaycan xalqının ümummilli lideri Heydər Əliyevin xatirəsinə həsr olunmuş anım mərasimi keçirildi.

Öncə təhsil ocağının professor-müəllim heyəti ulu öndər Heydər Əliyevin universitet binasının foyesində yerləşən büstü önünə tər gül dəstələri qoyaraq dahi siyasətçinin xatirəsinə ehtiramlarını ifadə etdilər.

Tədbiri universitetin rektor əvəzi, professor Əkbər Ağayev açaraq ulu öndərin Azərbaycan dövlətinin və xalqının taleyində oynadığı roldan, ölkəmizin gələcəyi üçün göstərdiyi misilsiz xidmətlərindən bəhs etdi. Ə.Ağayev diqqətə çatdırdı ki, bu gün Azərbaycan dünyanın ən dinamik inkişaf edən ölkələrindəndir və bu inkişaf illər öncə qurulmuş strategiyanın nəticəsidir. Natiq ümummilli lider Heydər Əliyevin ölkədə təhsil və elmə xüsusi diqqət yetirdiyini bildirərək qeyd etdi ki, dahi siyasətçi Sumqayıt Dövlət Universitetinin fəaliyyətini də diqqətdə saxlayırdı. Məhz ulu öndərin 2000-ci ildə imzaladığı sərəncamla bu təhsil ocağına universitet statusu verilib.

Daha sonra tədbirdə ulu öndərin həyat və fəaliyyətini əks etdirən "Böyük ömrün salnaməsi" adlı sənədli film nümayiş etdirildi.

Azərbaycan tarixi kafedrasının dosenti Elmar Xəlilovun, iqtisadiyyat və idarəetmə fakültəsinin tələbəsi Şənlik Əliyevin, kimya və biologiya fakültəsinin tələbəsi Səma Əsədovanın çıxışlarında da dahi liderin xidmətlərindən bəhs olundu, ümummilli liderin Azərbaycan xalqının xoşbəxtliyinə, dövlətimizin müstəqilliyini qoruması və inkişafına bütün ömrünü həsr etdiyi ifadə olundu.

Sonda ulu öndər Heydər Əliyevin anım günü münasibətilə universitetin Tələbə Gənclər Təşkilatı tərəfindən tələbələr arasında keçirilmiş yazı müsabiqəsinin qalibləri mükafatlandırıldı.


Təhsil müəssisələrində ümummilli liderin xatirəsi anıldı 

Lənkəran Dövlət Universitetində ümummilli lider Heydər Əliyevin xatirəsinə həsr edilmiş anım mərasimi keçirildi.

LDU-nun Mətbuat və informasiya xidmətindən aldığımız məlumatda bildirilir ki, universitetin rektoru Asəf İsgəndərov tədbiri açdıqdan sonra ümummilli lider Heydər Əliyevin xatirəsi bir dəqiqəlik sükutla yad edildi.

Rektor sözünə davam edərək bildirdi ki, ulu öndər bütün ömrünü xalqa həsr etmiş, dövlət müstəqilliyinin möhkəmlənməsi, ölkənin hərtərəfli inkişafı və onun iqtisadi cəhətdən güclü, beynəlxalq sahədə nüfuzlu dövlətə çevrilməsi istiqamətində çox mühüm işlər görmüşdür.

Universitetin dil və ədəbiyyat kafedrasının müdiri, filologiya elmləri doktoru, dosent Yədulla Ağazadə "Heydər Əliyev müstəqil Azərbaycan dövlətinin qurucusu və bəşəriyyət tarixinin dahi şəxsiyyətidir" mövzusunda məruzə edərək ümummilli lider Heydər Əliyevin müstəqil dövlətimizin yaranması, möhkəmlənməsi və dünya ölkələri arasında tanınmasında tarixi xidmətlərindən danışdı.

Universitetin tarix və fəlsəfə kafedrasının müdiri Rakif İbadov, iqtisadi təhlil və idarəetmə kafedrasının müdiri Tofiq Paşayev respublikamızın iqtisadi, sosial və mədəni sahələrində qazanılan nailiyyətlərin ümummilli lider Heydər Əliyevin adı və fəaliyyəti ilə bağlı olduğunu, bu siyasi kursun Azərbaycan Respublikasının Prezidenti İlham Əliyev tərəfindən uğurla davam  etdirildiyini bildirdilər.

Tələbələrdən Rüfanə Mahmudlu, Səbinə Həsənova, Aynur Tağıyeva və başqaları çıxış edərək ümummilli lider Heydər Əliyevin ideyalarına həmişə sadiq qalacaqlarını, bundan sonra da yaxşı oxuyacaqlarını və universitetin ictimai həyatında fəal iştirak edəcəklərini bildirdilər.

Sonda ulu öndər Heydər Əliyevin həyatı və fəaliyyətinə həsr olunmuş film nümayiş etdirildi.

Sonra universitetin kollektivi Lənkəran şəhərindəki Heydər Əliyev Xatirə parkında dahi rəhbərin abidəsi önünə çiçək dəstələri düzdülər.

Tədbirdə təhsil müəssisələrinin və ictimaiyyətin nümayəndələri iştirak edirdilər.

***

Bakıdakı 54 nömrəli tam orta məktəbdə müasir Azərbaycanın memarı və qurucusu  ulu öndər Heydər Əliyevə həsr olunmuş anım tədbiri keçirilib. Əvvəlcə ulu öndər Heydər Əliyevin əziz xatirəsi bir dəqiqəlik sükutla yad edilib. Məktəbin direktoru Sahibə Abbasova  ulu öndər Heydər Əliyev haqqında danışaraq bildirib ki,  Azərbaycan  dövlətçiliyinin, iqtisadiyyatının və mədəniyyətinin inkişafı, xalqın rifahının yüksəlməsi üçün böyük xidmətlər göstərmiş ikinci belə tarixi şəxsiyyət olmayıb. Ümummilli lider  xüsusilə elm və təhsilin inkişafına həmişə böyük diqqət və qayğı göstərib, onun hakimiyyətdə olduğu illərdə yeni-yeni təhsil müəssisələri yaradılıb, azərbaycanlı gənclərin respublikadan kənarda təhsil alması üçün geniş imkanlar açılıb. Qeyd olunub ki, Azərbaycan gəncləri dövlətimizin başçısı cənab İlham Əliyevin ətrafında sıx birləşməklə hər sahədə fəallıq göstərir, ulu öndərimizin müqəddəs amallarına sadiqlik nümayiş etdirirlər. Vurğulanıb ki, dahi şəxsiyyətin ideyaları nə qədər yaşayırsa, deməli, o özü də yaşayır. Əminlik ifadə olundu ki, Azərbaycan Respublikası bir dövlət kimi mövcud olduğu qədər Heydər Əliyev də yaşayacaq. Hər bir azərbaycanlı fəxr etməlidir ki, o, ulu öndərin yaratdığı müstəqil Azərbaycan dövlətinin vətəndaşıdır.

Tədbirin aparıcıları qeyd etdilər ki, bu böyük şəxsiyyət xalqımız tərəfindən hər an anılır, hər gün yad edilir. Ulu öndər bu məhəbbəti xalqına, vətəninə, dövlətinə, böyük türk dünyasına əvəzsiz xidməti ilə qazanıb, əbədiyaşar liderə çevrilib.

Sonra  ümummilli lider Heydər Əliyevin həyat və fəaliyyətindən bəhs edən sənədli film nümayiş etdirilib.

Şagirdlər söylədikləri şeirlərlə, ifa etdikləri mahnılarla ulu öndərə olan sevgilərini bildiriblər.

***

Bakıdakı 159 nömrəli tam orta məktəbdə ümummilli lider Heydər Əliyevə həsr olunmuş anım tədbirində  əvvəlcə  iştirakçılar müstəqil Azərbaycanın qurucusu və memarı Heydər Əliyev haqqında şagirdlərin hazırladıqları divar qəzetləri və fotostendlərlə tanış olublar.

Məktəbin akt zalında təşkil olunmuş tədbir Dövlət himninin ifası və Dövlət bayrağının Üzeyir Hacıbəylinin "Koroğlu" uvertürasının sədaları altında səhnəyə gətirilməsi ilə başlayıb. Tədbir iştirakçıları xalqın sevimlisi ulu öndər Heydər Əliyevin əziz xatirəsini bir dəqiqəlik sükutla yad ediblər. Ulu öndər haqqında danışan məktəbin direktoru Vahid Xəlilov bildirib ki, tarix güclü şəxsiyyətləri sevir. O şəxsiyyətləri ki, onlar öz xalqını yüksəklərə qaldırır və gözəl gələcəyə aparır.  O adamlar ki, gələcək nəsillər naminə qurub yaradır və milli dövlətçilik binasının özülünü qoyur. Bu gün xatirəsini anmaq üçün bura yığışdığımız ümummilli liderimiz Heydər Əliyev də məhz belə şəxsiyyətlərdəndir.  Dahi lider hələ  1969-cu ildə ilk dəfə hakimiyyətə gələndən sonra ölkəmizdə bütün sahələrdə sürətli dönüş yarandı. Həmin dövrdən başlayaraq respublikamızda bir çox sənaye müəssisələri, zavod və fabriklər tikildi, aqrar sahə sürətlə inkişaf etdirildi, yeni  məktəblər yaradıldı. Çox keçmədi ki, Azərbaycan keçmiş SSRİ-nin aparıcı respublikalarından birinə çevrildi. Ümummilli lider bununla yanaşı, Azərbaycanın gələcək intellektual kapitalının formalaşması istiqamətində də bir sıra ciddi layihələr həyata keçirdi.

Ümummilli lider Heydər Əliyevin zəngin və qədim tarixə malik bir xalqın müstəqillik arzusunu həyata keçirdiyini, ölkəmizin müstəqilliyini əbədi etdiyini vurğulayan tədbirin aparıcıları olan X "a" sinif şagirdləri xalqımızın təkidli tələbi ilə ulu öndərin ikinci dəfə hakimiyyətə gəlməsini, xalqı ağır bəlalardan xilas edərək çox güclü və müstəqil dövlət qurduğunu diqqətə çatdırıblar. Qeyd olunub  ki,  ümummilli liderin siyasi kursu bu gün   möhtərəm Prezidentimiz  İlham Əliyev  tərəfindən uğurla davam etdirilir.

Məktəbin tarix müəllimləri Xəyalə Əhmədova və Vüsal Məmmədov ulu öndər Heydər Əliyevin keçdiyi ömür yolu haqqında danışıblar.

Tədbir Heydər Əliyevə həsr olunmuş filmin nümayişi ilə başa çatıb.   

Rəşad RAMAZANOĞLU,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov