|
Salyan rayonunun Dayıkənd tam orta məktəbinin binası
əsaslı təmirdən sonra istifadəyə verilmişdir.
AzərTAc xəbər verir ki, ötən əsrin 80-ci illərində inşa
olunmuş məktəbdə təmir, bərpa və gücləndirmə işlərinə bu
ilin əvvəllərində başlanılmışdır. Ümumilikdə 57
müəllimin çalışdığı, 375 məktəblinin təhsil aldığı 460
şagird yerlik bina 22 sinif otağından, fənn
kabinetlərindən, laboratoriya, akt və idman zallarından,
kitabxanadan, kompüter otağından ibarətdir.
Açılış mərasimində çıxış edənlər sakinləri, məktəbin
pedaqoji kollektivini təbrik etmişlər. Ölkədə təhsilə,
elmə dövlət qayğısından danışan natiqlər son illərdə
rayonda 16 yeni məktəb binasının istifadəyə verilməsini,
uşaq bağçaları və digər təhsil ocaqlarının inşasını
bunun bariz nümunəsi kimi səciyyələndirmişlər.
Prezident İlham Əliyevin Salyana səfəri zamanı verdiyi
tapşırıqlara əsasən rayonda həyata keçirilən
infrastruktur layihələr sırasında təhsil müəssisələrinin
maddi-texniki bazasının möhkəmləndirilməsinin mühüm yer
tutduğu diqqətə çatdırılmışdır. Təkcə son bir ildə
"Plasmas" yaşayış massivində 640, Boranıkənddə 220,
Qarabağlıda 480, Yolüstüdə 360, Quyuçu kəndində isə 80
şagird yerlik məktəblərin inşa olunduğu, 8 nömrəli şəhər
məktəbinin isə əsaslı təmir edildiyi bildirilmişdir.
Hazırda bir məktəbdə 160 şagird yerlik əlavə korpusun,
Peyk kəndində isə 220 yerlik yeni məktəbin tikildiyi
qeyd edilmişdir.
Sakinlər xalqımızın gələcəyi olan uşaqların təhsilinə
göstərdiyi diqqət və qayğıya görə dövlətimizin başçısına
minnətdarlıqlarını bildirmişlər.
Sonda mərasim iştirakçıları yeni avadanlıqla təchiz
edilən məktəb binasında yaradılan şəraitlə tanış
olmuşlar. |
