|
 Hörmətli
sədarət!
Hörmətli qurultay iştirakçıları!
İlk öncə sizin qarşınızda çıxış etməyə imkan
verdikləriinə görə tədbirin təşkilatçılarına təşəkkürümü
bildirmək istəyirəm. Mən biznes aləminin təmsilçisiyəm
və ilk baxışdan təhsil sahəsi ilə birbaşa əlaqəm yoxdur.
Çoxunuzda belə sual yarana bilər ki, niyə məhz mən bu
tribunada çıxış etmək şərəfinə layiq görülmüşəm. Burada
olmağımın bir neçə səbəbi var. Birincisi odur ki, mən
özüm iki övladın valideyniyəm. Və onların təhsilinə və
böyüməsinə laqeyd qala bilmərəm. Mən hesab edirəm ki,
valideynlər məktəb həyatına daha fəal cəlb
olunmalıdırlar. Keyfiyyətli təhsil almış layiqli
vətəndaşın yetişdirilməsi yalnız məktəbin yox, daha çox
valideynlərin məsuliyyətidir. Valideyn özü bir müəllim
olmalıdır. Biz valideynlər övladlarımız qarşısında
düzgün prioritetlər qoymalıyıq. Övladlarımızın məktəbə
motivasiyası və yanaşması həmin prioritetlərdən çox
asılıdır. Eyni zamanda hesab edirəm ki, effektiv və
şəffaf fəaliyyət göstərən valideyn-müəllim-şagird
icmaları yaradılmalıdır. Bu, valideynlər və məktəb
arasında sıx əməkdaşlığa bir addım olacaqdır. Son
vaxtlar bu istiqamətdə mühüm işlər görülür və mən ümid
edirəm ki, yaxın gələcəkdə biz sizinlə bunun
nəticələrini görəcəyik.
Hörmətli müəllimlər!
Mən eyni zamanda bir valideyn kimi yox, bir biznes
təmsilçisi kimi də sizə müraciət etmək istəyirəm. Mən
beynəlxalq audit və konsaltinq şirkətinin Azərbaycan
üzrə rəhbəriyəm. Biz hər il onlarla gənc mütəxəssisi işə
qəbul edirik. İnanın ki, işə qəbul edilən işçilərin
dərin biliklərə sahib olması hər bir şirkət üçün çox
vacib bir amildir. Və burada söhbət yalnız nəzəri
biliklərdən yox, daha çox praktik, peşəkar biliklərdən
gedir. Qeyd etmək istərdim ki, gələcək peşəkarların
hazırlanması üçün bütün məsuliyyət yalnız təhsil
sisteminin üzərinə düşməməlidir. Bu sahədə biznesin də
öz vəzifəsi və məsuliyyəti var. Bütün dünyada, o
cümlədən Azərbaycanda biznesin cəmiyyət qarşısında
sosial məsuliyyəti konsepsiyası getdikcə geniş yayılır.
Mən bu konsepsiyanın böyük tərəfdarıyam və hesab edirəm
ki, biz təhsil müəssisələri ilə daha sıx əməkdaşlıq
etməliyik. İşəgötürənlə işçi arasında münasibət əmək
kitabçasında yazılışdan başlamamalıdır. O əslində
təhsil ocağının divarlarında bir müddət bundan öncə
başlamalıdır. Hazırkı dövrdə respublikamızda həyata
keçirilən uğurlu siyasət nəticəsində iqtisadiyyatımız
çox sürətlə inkişaf edir. Bu səbəbdən işçilərə olan
tələbat da çoxalır. Təhsil müəssisələri bazarın
tələblərinə cavab verən peşəkarlar hazırlamalıdırlar.
Biznes qurumlarının qarşısında isə təhsil ocaqlarına
konkret tələbatı çatdırmaq vəzifəsi durur. Bununla bağlı
ideyalarımız çoxdur. Amma vaxt məhdud olduğuna görə
bunlardan yalnız bir qismini sadalamaq istərdim. Mən
təhsil nazirinin çıxışında səslənən bir fikri çox
dəstəkləyirəm. Qabaqcıl şirkətlərin aparıcı
mütəxəssislərini tədris prosesinə cəlb etmək lazımdır.
Bu çox vacib bir faktordur. Tələbələr üçün keyfiyyətli
və aktual təcrübə proqramları yaratmaq lazımdır və s.
Hörmətli müəllimlər!
Çıxışımın sonunda mən sizə dərin təşəkkürümü bildirmək
istəyirəm. İşinizdə olan çətinliklərə baxmayaraq siz öz
peşənizə, daim sadiq qalmısınız. Çünki müəllimlik, mənim
fikrimcə, adi bir peşə deyil. Müəllimlik insanın üzərinə
düşən ən şərəfli missiyalardan biridir. Sizə çətin və
şərəfli işinizdə uğurlar arzu edirəm.
Diqqətinizə görə çox sağ olun. |
