|
Azərbaycan Respublikasının Prezidenti yanında Dövlət
İdarəçilik Akademiyasının tələbələrinə hüquq elmi ilə
bağlı 14 adda dərsliklər hədiyyə edilib. Bununla bağlı
dekabrın 25-də Azərbaycan Hüquqşünasları Konfederasiyası
və Dövlət İdarəçilik Akademiyasının birgə təşkilatçılığı
ilə tədbir keçirilib.
Dövlət İdarəçilik Akademiyasında təşkil olunan tədbirdə
akademiyanın rektoru, akademik Urxan Ələkbərov, Milli
Məclisin Hüquq siyasəti və dövlət quruculuğu komitəsinin
sədri, Azərbaycan Hüquqşünasları Konfederasiyasının
sədri Əli Hüseynli, Birləşmiş Millətlər Təşkilatının
Qaçqınlar üzrə Ali Komissarlığının nümayəndəsi
vəzifəsini müvəqqəti icra edən Əhməd Cəlil Sahibzadə
çıxış ediblər.
Bildirilib ki, kitablar Azərbaycan Hüquqşünasları
Konfederasiyası və Azərbaycan Gənc Hüquqşünaslar
Birliyinin birgə təşəbbüsü, Gənclər və İdman
Nazirliyinin, BMT-nin Qaçqınlar üzrə Ali
Komissarlığının, Azərbaycan Respublikasının Prezidenti
yanında QHT-lərə Dövlət Dəstəyi Şurasının dəstəyi ilə
nəşr olunub. Bütün dərsliklərdə "YARAT!" Müasir
İncəsənət Məkanının rəssamlarının əsərləri yer alıb.
Akademiyanın rektoru Urxan Ələkbərov bu təşəbbüsü irəli
sürənlərə minnətdarlığını bildirərək hədiyyə edilən
kitabların tələbələr üçün çox faydalı olacağını qeyd
edib.
Hüquq elminə dair kitabların vacibliyindən danışan Milli
Məclisin Hüquq siyasəti və dövlət quruculuğu komitəsinin
sədri, Azərbaycan Hüquqşünasları Konfederasiyasının
sədri Əli Hüseynli hədiyyə edilən bu dərsliklərin və
dərs vəsaitlərinin beynəlxalq iqtisadiyyat və hüquqi
münasibətlər kontekstində Azərbaycanın milli
qanunvericiliyini özündə əks etdirdiyini vurğulayıb. O,
kitabların tələbələrdə böyük maraq doğuracağına
əminliyini bildirib.
Samirə KƏRİMOVA,
"Azərbaycan müəllimi" |
