İnsanın şəxsiyyət kimi formalaşmasında, onun təhsil və
inkişafında müəllimin rolu danılmazdır. Müəllim şərəfli
ömür sürən, ömrünü bir şam kimi gələcək nəsillər üçün
əridən ideal varlıqdır. Çünki o, şərəfli işlə məşğul
olur. Şərəfli əmək isə insanı daim ucaldar, ona şöhrət
gətirər. Mənim babam-Kəmaləddin Fətəliyev də öz halal
əməyi, alın təri ilə ucalan əmək qəhrəmanlarından biri
olmuşdur. O, əməyi ilə ucalaraq cəmiyyətin nüfuzlu
fərdinə çevrilmişdir. Böyük Vətən müharibəsində nümunəvi
bir əsgər kimi iştirak etmiş, dəhşətli müharibənin
qorxunc izini ömrünün sonuna kimi daşımışdır.
Düşünürəm ki, bu gün mənim də müəllim olmağımda babamın
şərəfli müəllim ömrünün böyük təsiri var.
Qabaqcıl maarif xadimi, ziyalı, sözün əsl mənasında, el
ağsaqqalı olan Kəmaləddin Fətəliyev 1920-ci ildə Zərdab
rayonu İsaqbağı kəndində sadə, zəhmətkeş bir ailədə
anadan olub. Sovet dövrünün bütün çətinliklərinə,
məhdudiyyətlərinə baxmayaraq, o, təhsil yolunda
irəliləmiş, cəmiyyət üçün savadlı kadrlar
yetişdirmişdir. Onu da qeyd edim ki, övladlarının hər
birinin təhsil almasına nail olan Kəmaləddin müəllim
eləcə də dərs dediyi hər bir şagirdinin öz övladı kimi
təhsilə istiqamətlənməsində mühüm rol oynamışdır. Bu gün
onun şagirdləri ölkəmizin ictimai-siyasi həyatında
əsas rol oynayan, mühüm inzibati orqanlarda çalışan
şəxslər, savadlı alimlər, həkimlər və müəllimlərdir.
Bir sözlə, dövrünün çətinlikləri onu bu missiyasından
çəkindirə bilməmişdir.
Çox təəssüf edirəm ki, babam çiçəklənən, günü-gündən
inkişaf edən ölkəmizdə müəllimə xüsusi diqqət və qayğı
göstərilən bu günləri görə bilmədi. Babamın mənim
aləmimdə özünəməxsusluğu, xüsusiliyi var. Çünki mənim
nadir adımın müəllifi babamdır. Adımı soruşan hər
insanın ikinci sualında babam xatırlanır.
Nümunəvi həyat yolu keçən, ömrünün sonuna kimi şərəfli
müəllim adını ləyaqətlə qoruyan babamın əziz xatirəsi
daim onu sevənlərin-övladlarının, nəvələrinin,
şagirdlərinin qəlbində yaşayacaqdır.
Çiyələk İSMAYILOVA,
Zərdab rayon İsaqbağı kənd tam orta məktəbinin tərbiyə
işləri üzrə direktor müavini |