|
Rusiyanın Azərbaycanlı Gənclər Birliyinin (RAGB)
Həştərxan regional bölməsi Nikolay Kupriyanovun çoxdankı
arzusunu yerinə yetirmişdir. Birliyin regional
bölməsinin sədri Elvin Hüseynov bildirmişdir ki,
azərbaycanlı tələbələr RAGB sədri Leyla Əliyevanın
adından Nikolaya Yeni il hədiyyəsi - Qaraçay-Çərkəz
Respublikasının Dombay kurort qəsəbəsində istirahət üçün
sertifikat təqdim etmişlər.
Kolya üçün illər boyu valideynlərini əvəz edən nənəsi də
diqqətdən yayınmamışdır: o, nəvəsi ilə birlikdə
istirahətə getmişdir.
Nikolayın 5 yaşı olanda valideynləri təyyarə qəzasında
həlak olmuşdur. O vaxtdan onu nənəsi tərbiyə edir. İndi
17 yaşı olan Nikolay dərs əlaçısıdır. Həştərxanlı gənc
indiyə qədər heç vaxt vilayətdən kənarda olmamışdır. O,
hələ uşaq yaşlarından öz ölkəsinin və dünyanın başqa
guşələrini görməyi arzulayırdı.
Nikolay Kupriyanov bu hədiyyəyə görə RAGB rəhbəri Leyla
Əliyevaya və azərbaycanlı dostlarına minnətdarlığını
bildirmişdir.
AzərTAc |
