Javascript DHTML Drop Down Menu Powered by dhtml-menu-builder.com

ARXİV

24 Yanvar 2014 - №03

 

"Azərbaycan müəllimi" - 80

Yubiley təbrikləri

 

Müəllimlər müəllimi - "Azərbaycan müəllimi" 

Əjdər AĞAYEV,
Azərbaycan Təhsil Şurasının sədri,
pedaqoji elmlər doktoru, professor,
ə
məkdar müəllim

Yaranmış, dünyaya gəlmiş hər bir varlığın, hər şeyin doğuluşu və inkişaf yolu var. Mətbuat da belədir. İnsanlar təkcə şifahi sözdən yararlanmaqla kifayətlənmir, yazılı sözdən bəhrələnməyə də üstünlük verirlər. Çünki yazılı söz - mətbuat günlər, aylar, illər keçdikcə yaşayır, dövrün tarixini əks etdirən mənbəyə çevrilir. Bu baxımdan Təhsil Nazirliyinin mətbu orqanı olan 80 yaşlı "Azərbaycan müəllimi" qəzetini də təhsilin inkişafının 80 illik tarixini əks etdirən ən etibarlı məxəz, mənbə saymaq olar.

Altmış ildən çoxdur ki, mən bu qəzetin mütaliəçisi, əlli ildən artıqdır ki, səhifələrində müxtəlif yazılarla imzası görünən müəllifəm. Mənim müəllimlik təcrübəmin təkmilləşməsində, elmi-nəzəri və metodik biliklərə yiyələnməyimdə, araşdırma nəticələrimin yayılmasında, qələmimin püxtələşməsində "Azərbaycan müəllimi"nin böyük rolu olmuşdur.

Ötən 50 ildən bəri qəzetin redaktorlarının və tanınmış yazarlarının istiqamətverici, öyrədici, sensasiya doğuran məqalələri öz dövrünün hadisəsi kimi qəbul olunmuş, əks-səda doğurmuşdur. Nüfuzlu redaktorlardan Rüstəm Hüseynovun, Ağaəli Bədəlovun, Mirabbas Aslanovun, Şahin Səfərovun səyləri nəticəsində qəzet özünün oxunaqlılığı, elmi-metodiki səviyyəsi, kütləviliyi ilə diqqəti cəlb etmişdir.

Şöbə redaktorlarından Habil Məmmədovun, Tofiq Mahmudun, Cavad Cavadlının, Tükəzban Əsədovanın, Xalidə Xəlilovanın, Şamxəlil Məmmədovun, Allahverdi Eminovun, Malik Novruzovun, Yusif  Əliyevin, Tahir Əliyevin, Nadir Abdullayevin, redaktor müavini Məhyəddin Əbdülovun və müxtəlif illərdə redaksiyada yeni-yeni ideyaların irəli sürülməsi və reallaşmasında xidmətləri olan digər jurnalistlərin qələm məhsulları "Azərbaycan müəllimi"nin salnaməyə çevrilməsinə xidmət etmişdir.

Pedaqoji elmin və təhsilin görkəmli nümayəndələri Mehdi Mehdizadənin, Əhməd Seyidovun, Mərdan Muradxanovun, Tələt Əfəndiyevin, Yusif Talıbovun, İsfəndiyar Vəlixanlının, psixoloqlardan Əhməd Kərədi Zəkuzadənin, Fuad İbrahimbəylinin, Məmmədəli Məhərrəmovun, Əkbər Bayramovun, Əbdül Əlizadənin və metodistlərdən Camal Əhmədovun, Mirabbas Aslanovun, Bəşir Əhmədovun, Şəmistan Mikayılovun, Zəhra Əliyevanın və digər onlarla alimin, qabaqcıl müəllimin, təhsil işçisinin məqalələri elmin və təhsilin inkişafında önəmli əhəmiyyət daşımışdır.

Bu gün fəaliyyət göstərən orta və gənc nəslin mətbu tribunası yenə "Azərbaycan müəllimi"dir. 1990-cı illərin əvvəllərindəki ziddiyyətlər "Azərbaycan müəllimi"ndən də yan keçməmişdir. Müstəqillik illərində qəzetin fəaliyyətini davam etdirmiş redaktorlar Məhəmməd Baharlı, Valeh Mirzə qəzetin ənənələrini yaşatmaqla, mətbuatda plüralizm və demokratiya meyillərini gücləndirmişlər. Bu gün qəzet yeniləşən Azərbaycan təhsilinin tam mənzərəsini əks etdirir.

80 illik fəaliyyətində "Azərbaycan müəllimi" özünəməxsus dəst-xətti olan pedaqoji mətbuat məktəbini yaratmışdır. Ölkəmizin inkişaf strategiyası milli mətbuatın da yeni məzmunda formalaşmasını, davamlılığını və genişlənməsini təmin etmişdir. 80 yaşlı "Azərbaycan müəllimi" bu gün müəllimlərin müəllimi funksiyasını məharətlə yerinə yetirir.

80 yaşın mübarək, sevimli "Azərbaycan müəllimi"miz!

Şərəfli yubiley münasibətilə redaksiyanın bütün əməkdaşlarını, müəlliflərini və oxucularını təbrik edir, yeni-yeni yaradıcılıq uğurları arzulayıram.

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov