|
"Azərbaycan müəllimi",
2 iyun 1949-cu il,
№21
...Əsərləri Azərbaycan dilinə tərcümə edilmiş böyük rus
yazıçıları sırasında Puşkin xüsusi yer tutur. Puşkin
əsərlərinin Azərbaycan dilinə tərcüməsi ədəbiyyat
tariximizin inkişafında çox mühüm mədəni və ədəbi
hadisə olmuşdur. Çünkü bu əsərlər ədəbiyyatımıza yeni
rus realist sənətinin gözəl nümunələrini, zəngin
ictimai-inqilabi məzmun, yeni bədii üslub gətirmişdir.
Rus ədəbiyyatından və xüsusilə Puşkin əsərlərindən
tərcümə etmək sahəsində ciddi addımlar atan şair Abbas
Səhhət olmuşdur... O, Puşkinin "Qış yolu", "Qaraçılar" (bir
parça), "Qafqaz", "Suda boğulmuş", "Peyğəmbər" və başqa
şeirlərini tərcümə etmişdir.
Səhhət Puşkindən etdiyi tərcümələrdə əsərin orijinalını
mümkün qədər tam və doğru bir şəkildə verməyə səy etmiş
və buna müvəffəq olmuşdur.
Onun tərcümələri bugün də yaxşı şeir tərcümələrindən
sayılmaqdadır.
...Dahi rus şairinin ölümünün 100 illiyi ərəfəsində...
Azərbaycanın istedadlı şairi iki dəfə Stalin mükafatı
laureatı Səməd Vurğun Puşkinin ölməz romanı olan "Yevgeni
Onegin"i tərcümə etdi. "Rus həyatının ensiklopediyası"
adlanan bu əzəmətli sənət abidəsinin Azərbaycan dilinə
tərcümə edilməsi ictimai ədəbi həyatımızda mühüm bir
hadisə idi...
Mirzağa QULUZADƏ,
Filoloji elmləri namizədi |
